Read Елизаветинская Библия, 1751 Осия 7 Bible Online

Осия 7 - Елизаветинская Библия, 1751 bible

Осия 7

¹Егда изцелю израиля, и открыется неправда ефремова и злоба самарийска, яко соделаша лжу: и тать к нему внидет, совлачаяй разбойник на пути его:

²яко да воспоют вкупе, аки поющии сердцем своим. Вся злобы их помянух: ныне обыдоша их совети их, противу лицу ми быша.

³Злобами своими возвеселиша царя и лжами своими князей.

⁴Вси любодеющии, яко пещь жегома на печение сожжения от пламене, от примешения тука, дондеже вскиснет то все.

⁵Во дни царей ваших начаша князи яритися от вина, простроша руки своя с губительми:

⁶зане разгорешася яко пещь сердца их, внегда устремлятися им: всю нощь сна ефрем насытися, заутра бысть, и разгореся яко пламень огненный.

⁷Вси согреяшася, яко пещь жегома, и огнь пояде судий их: вси царие их падоша, не бе в них моляйся ко мне.

⁸Ефрем в людех своих сам смесяшеся, ефрем бысть опреснок необращаемь.

⁹И снедоша чуждии крепость его, сей же не разуме: и седины явишася на нем, он же не позна.

¹⁰И смирится укоризна израилева в лице ему: и не возвратишася ко Господу Богу своему и не взыскаша его во всех сих.

¹¹И бяше ефрем яко голубь безумный, не имый сердца: египта моляше, и во ассирианы отидоша.

¹²Якоже идут, возложу на ня мрежу мою, якоже птицы небесныя свергу я, накажу я в слух скорбения их.

¹³Горе им, яко отскочиша от мене: боязливи суть, яко нечествоваша ко мне: аз же избавих я, сии же возглаголаша на мя лжу.

¹⁴И не возопиша ко мне сердца их, но плакахуся на ложах своих: о пшенице и вине сечахуся.

¹⁵Накажутся мною, аз же укрепих мышцу их, и на мя помыслиша злая.

¹⁶Совратишася ни во чтоже, быша яко лук напряжен: падутся князи их мечем ради ненаказания языка своего. Сие ругание их в земли египетстей.