Read Елизаветинская Библия, 1751 Осия 8 Bible Online

Осия 8 - Елизаветинская Библия, 1751 bible

Осия 8

¹В недре их, яко земля непроходима, яко орел в дому Господни: понеже преступиша завет мой и на закон мой нечествоваша.

²Ко мне воззовут: Боже, познахом тя,

³яко израиль отвратися благих, врага прогнаша.

⁴Сами себе царя поставиша, а не мною, началствоваша, и не явиша ми: от сребра своего и от злата своего сотвориша себе кумиры, яко да потребятся.

⁵Сокруши телца твоего, самарие, разгневася ярость моя на ня: доколе не могут очиститися, иже во израили?

⁶И то древодель сотвори, и несть Бог: зане льстяй бяше телец твой, самарие.

⁷Яко ветром истлено всеяша, и разрушение их приимет я: рукоять не имущая силы еже сотворити муку, аще же и сотворит, то чуждии поядят ю.

⁸Поглощен бысть израиль, ныне бысть во языцех яко сосуд непотребен,

⁹понеже тии взыдоша ко ассирианом: процвете о себе ефрем, дары возлюби.

¹⁰Сего ради предадутся во языки: ныне восприиму их, и почиют мало еже помазати царя и князи.

¹¹Яко умножи ефрем требища, во грехи быша ему требища возлюбленная.

¹²Впишу ему множество, и законная его в чуждая вменишася требища возлюбленная.

¹³Темже аще и пожрут жертву и снедят мяса, Господь не приимет их: ныне помянет неправды их и отмстит грехи их: тии во египет возвратишася и во ассирии нечистая снедят.

¹⁴И забы израиль сотворшаго и и возгради требища, и иуда умножи грады утверждены: но послю огнь на грады его, и потребит основания его.