Read Елизаветинская Библия, 1751 Осия 9 Bible Online

Осия 9 - Елизаветинская Библия, 1751 bible

Осия 9

¹Не радуйся, израилю, ни веселися якоже людие, понеже соблудил еси от Господа Бога твоего: возлюбил еси даяния на всяцем гумне пшеницы.

²Гумно и точило не позна их, и вино солга им.

³Не вселишася на земли Господни: вселися ефрем во египте, и во ассириах снедят нечистая.

⁴Не возлияша Господеви вина, и не усладишася ему требы их, яко хлеб жалости им: вси ядущии тыя осквернятся: понеже хлебы их душ их, не внидут в дом Господень.

⁵Что сотворите во днех торжества и в день праздника Господня?

⁶Сего ради, се, пойдут от труда египетска, и приимет их мемфис, и погребет я махмас: сребро их пагуба наследит, терние во дворех их.

⁷Приспеша дние отмщения твоего, приидоша дние воздаяния твоего, и озлобится израиль, якоже пророк изумленный, человек духом носимый: от множества неправд твоих умножися изумление твое.

⁸Страж ефрем с Богом, пророк пругло строптиво на всех путех его: изумление в дому Божии утвердиша.

⁹Растлешася по днем холма: воспомянет неправды их, отмстит грехи их.

¹⁰Якоже грезн в пустыни обретох израиля и яко стража на смоковнице ранняго увидех отцы их: тии внидоша ко веельфегору и отчуждишася на стыдение, и быша мерзостнии якоже возлюбленнии.

¹¹Ефрем яко птица отлете, славы их от порождений и болезней и от зачатий.

¹²Темже аще и воскормят чада своя, безчадны будут от человек: понеже и люте им есть, (зане оставих я,) плоть моя от них.

¹³Ефрем, якоже видех, в ловитву предпоставиша чада своя, и ефрем еже извести на заколение чада своя.

¹⁴Даждь им, Господи: что даси им? даждь им утробу неплодящую и сосцы сухи.

¹⁵Вся злобы их во галгалех, яко тамо их возненавидех за злобы начинаний их: из дому моего изжену я, (ксему) не приложу любити их:

¹⁶вси князи их непокориви. Поболе ефрем: корение его изсхоша, плода ксему да не принесет: понеже аще и породят, побию вожделенная утроб их.

¹⁷Отринет я Бог, яко не послушаша его, и будут заблуждающии в языцех.