Read Елизаветинская Библия, 1751 Иоиль 1 Bible Online

Иоиль 1 - Елизаветинская Библия, 1751 bible

Иоиль 1

¹Слово Господне, иже бысть ко иоилю сыну вафуилеву.

²Слышите сия, старцы, и внушите, вси живущии на земли: аще быша сицевая во днех ваших или во днех отец ваших?

³О сих чадом своим поведите, а чада ваша чадом своим, а чада их роду другому:

⁴останок гусениц поядоша прузи, и останок пругов поядоша мшицы, и останок мшиц поядоша сиплеве.

⁵Утрезвитеся, пиянии, от вина своего и плачитеся: рыдайте, вси пиющии вино до пиянства, яко отяся от уст ваших веселие и радость.

⁶Понеже язык взыде на землю мою крепок и безчислен: зубы его (якоже) зубы львовы, и членовныя его якоже львичища:

⁷положи виноград мой в погубление и смоквы моя в сломление: взыскуя оыска и и сверже, обели лозие его.

⁸Восплачися ко мне паче невесты препоясаныя во вретище по мужи своем девственнем.

⁹Извержеся жертва и возлияние из дому Господня: плачитеся, жерцы, служащии жертвеннику Господню,

¹⁰яко опустеша поля. плачися, земле, яко пострада пшеница, и изсше вино, умалися елей,

¹¹посрамишася земледелателе. плачитеся, села, по пшенице и по ячмени, яко погибе оымание от нивы,

¹²виноград изсше, и смоквы умалишася: шипки, и финикс, и яблонь, и вся древа польская изсхоша, яко посрамиша радость сынове человечи.

¹³Препояшитеся и бийтеся, жерцы, плачитеся, служащии жертвеннику: внидите, поспите во вретищих, служащии Богу, яко отяся от дому Бога вашего жертва и возлияние:

¹⁴освятите пост, проповедите цельбу, соберите старейшины вся живущыя на земли в дом Бога вашего и воззовите ко Господу усердно:

¹⁵увы мне, увы мне, увы мне в день! яко близ есть день Господень, и яко беда от беды приидет:

¹⁶яко пред очима вашима пищы взяшася и от дому Бога вашего веселие и радость.

¹⁷Вскочиша юницы у яслей своих, погибоша сокровища, раскопашася точила, яко посше пшеница.

¹⁸Что положим себе? восплакашася стада волов, яко не бе пажити им, и паствы овчыя погибоша.

¹⁹К тебе, Господи, возопию, яко огнь потреби красная пустыни, и пламень пожже вся древа польская,

²⁰и скоти польстии воззреша к тебе, яко посхоша источницы воднии, и огнь пояде красная пустыни.