Read Елизаветинская Библия, 1751 Амос 9 Bible Online

Амос 9 - Елизаветинская Библия, 1751 bible

Амос 9

¹Видех Господа стояща на жертвеннице, и рече: порази очистилище, и поколеблются преддверия, и пресецы в главы всех: и оставшыя их оружием избию, не убежит от них бежай, и не уцелеет от них уцелеваяй:

²аще сокрыются во аде, то и оттуду рука моя исторгнет я, и аще взыдут на небо, то и оттуду свергу я:

³и аще скрыются на версе кармила, то и оттуду взыщу и возму я, и аще погрузятся от очию моею во глубинах морских, то и тамо повелю змиеви, и угрызет я:

⁴и аще пойдут в плен пред лицем враг своих, и тамо повелю оружию, и избиет их: и утвержу очи мои на них во злая, а не во благая.

⁵И Господь Бог вседержитель прикасаяйся земли и колебля ею, и возрыдают вси живущии на ней, и взыдет яко река скончание ея, и снидет яко река египетская:

⁶сотворяяй на небо восход свой и обещание свое на земли основаяй, призываяй воду морскую и проливаяй ю на лице земли: Господь Бог вседержитель имя ему.

⁷Не якоже ли сынове ефиопстии вы есте мне, сынове израилевы? глаголет Господь. Не израиля ли изведох из земли египетския и иноплеменники из каппадокии и сиряны из рова?

⁸Се, очи Господа Бога на царство грешных, и отвергу е от лица земли: обаче не в конец отвергу дом израилев, глаголет Господь.

⁹Понеже, се, аз заповедаю и развею дом израилев во вся языки, якоже веется на веяле, и не падет сотрение на землю.

¹⁰Оружием скончаются вси грешнии людий моих, глаголющии: не приближатся, ни приидут на нас злая.

¹¹В той день возставлю скинию давидову падшую, и возгражду падшая ея, и раскопаная ея возставлю, и возгражду ю якоже дние века:

¹²яко да взыщут мене оставшиися человецы и вси языцы, в нихже призвася имя мое в них, глаголет Господь творяй сия вся.

¹³Се, дние грядут, глаголет Господь, и постигнет жатва оымание винограда, и созреет гроздие в сеятву, и искапают горы сладость, и вси холми насаждени будут:

¹⁴и возвращу плен людий моих израиля, и возградят грады разореныя, и населятся, и насадят винограды и испиют вино их, и сотворят вертограды и снедят плод их:

¹⁵и насажду я на земли их, и не исторгнутся ктому от земли своея, юже дах им, глаголет Господь Бог вседержитель.