Read Елизаветинская Библия, 1751 Числа 12 Bible Online

Числа 12 - Елизаветинская Библия, 1751 bible

Числа 12

¹И возглаголаста мариам и аарон на моисеа жены ради ефиопляныни, юже поя моисей, ибо жену поя ефиопляныню,

²и рекоста: еда моисею единому глагола Господь? еда и нам не глаголаше? и услыша Господь.

³И человек моисей кроток зело паче всех человек сущих на земли.

⁴И рече Господь внезапу к моисею и аарону и мариаме: изыдите вы трие в скинию свидения.

⁵И изыдоша трие в скинию свидения. И сниде Господь в столпе облачне ста над дверми скинии свидения: и призва аарона и мариам. И изыдоста оба.

⁶И рече к ним: послушайте словес моих: аще будет в вас пророк Господнь, в видении ему познаюся, и во сне возглаголю ему:

⁷не тако якоже раб мой моисей, во всем дому моем верен есть:

⁸усты ко устом возглаголю ему яве, и не гаданием, и славу Господню виде: и почто не убоястеся глаголати на раба моего моисеа?

⁹И гнев ярости Господни (бысть) на них. И отиде.

¹⁰И облак отступи от скинии, и се, мариам прокажена бысть яко снег: и воззре аарон на мариам, и се, прокажена.

¹¹И рече аарон к моисею: молю тя, господи, не возлагай на ны греха, понеже не ведяхом, яко согрешихом:

¹²да не будет сия яко мертва, яко изверг извержен из ложесн матерних, и (се, уже) пояде пол плоти ея.

¹³И возопи моисей ко Господу, глаголя: Боже, молютися, исцели ю.

¹⁴И рече Господь к моисею: аще бы отец ея плюя заплевал в лице ея, не посрамится ли седмь дний? да отлучится седмь дний вне полка, и по сих да внидет.

¹⁵И отлучися мариам вне полка на седмь дний: и людие не воздвигошася, дондеже очистися мариам.