Read Елизаветинская Библия, 1751 Числа 16 Bible Online

Числа 16 - Елизаветинская Библия, 1751 bible

Числа 16

¹И глагола корей, сын иссаара сына каафа сына левиина, и дафан и авирон, сынове елиавли, и авнан сын фалефа сына рувимля:

²и восташа на моисеа, и мужи сынов израилевых двести и пятьдесят началницы сонма, сигклитики совета и мужи именити.

³Совосташа на моисеа и аарона и реша к ним: довлеет вам, яко весь сонм вси святи, и в них Господь: и чесо ради востаете на сонм Господнь?

⁴И слышав моисей, паде ниц.

⁵и глагола к корею и ко всему сонму его, глаголя: согляда и позна Господь сущих его и святых, и приведе к себе: и ихже не избра себе, не приведе к себе:

⁶сие сотворите: возмите себе сами кадилники, корей и весь сонм его,

⁷и вложите огнь в ня, и вложите в ня фимиам пред Господем утре: и будет муж, егоже аще изберет Господь, сей свят: да довлеют вам сынове левиины.

⁸И рече моисей корею: послушайте мене, сынове левиини:

⁹еда мало есть сие вам, яко отлучи вас Бог от сонма израилева и приведе вас к себе служити службы в скинии Господни и стояти пред сонмом Господним, еже служити им?

¹⁰и приведе тя и всю братию твою, сыны левиины с тобою, и просите священствовати?

¹¹тако ты и весь сонм твой собравшийся на Бога: и аарон кто есть, яко ропщете нань?

¹²И посла моисей призвати дафана и авирона, сыны елиавли. И реша: не идем:

¹³еда мало се, яко извел еси ны из земли кипящия млеком и медом, еже погубити нас в пустыни, яко владееши нами? князь еси:

¹⁴и ты ли в землю кипящую медом и млеком ввел еси нас и дал еси нам часть села и винограда? очи человек тех изткнул еси: не идем.

¹⁵И отягча моисей гневом зело и рече к Господу: не внемли на жертву их: ни единаго похотения от них приях, ниже озлобих кого от них.

¹⁶И рече моисей к корею: освяти сонм твой, и будите готови пред Господа ты и аарон и они заутра:

¹⁷и возмите кийждо кадилник свой, и возложите на ня фимиам, и принесите пред Господа кийждо кадилник свой, двести и пятьдесят кадилников, и ты и аарон кийждо кадилник свой.

¹⁸И взяша кийждо свой кадилник, и возложиша на ня огнь, и вложиша в ня фимиам, и сташа пред дверми скинии свидения моисей и аарон.

¹⁹И собра на ня корей весь сонм свой пред дверми скинии свидения: и явися слава Господня всему сонму.

²⁰И рече Господь к моисею и аарону, глаголя:

²¹отступите кийждо от среды сонма сего, и потреблю я абие.

²²И падоста на лица своя и рекоста: Боже, Боже духов и всякия плоти: аще человек един согреши, на весь ли сонм гнев Господнь?

²³И рече Господь к моисею, глаголя:

²⁴рцы сонму, глаголя: отступите окрест от сонма кореева и дафаня и авироня.

²⁵И воста моисей, и иде к дафану и авирону: и идоша с ним вси старцы израилтестии.

²⁶И рече к сонму, глаголя: отступите от кущ человек жестокосердых сих, и не прикоснитеся ко всем, елика суть им, да не погибнете купно во всем гресе их.

²⁷И отступиша от кущ кореа и дафана и авирона окрест: дафан же и авирон изыдоста и стаста пред дверми кущ своих, и жены их, и дети их и имение их.

²⁸И рече моисей: в сем познаете, яко Господь посла мя сотворити вся дела сия, яко не от себе (аз творю сия):

²⁹аще смертию всех людий умрут сии, и аще по присещению всех человек посещение будет их, то не Господь посла мене:

³⁰но явно покажет Господь, и отверзши земля уста своя пожрет я и домы их, и кущы их и вся, елика суть их, и снидут живи во ад, и уведите, яко разгневаша человецы сии Господа.

³¹Егда же преста глаголя вся словеса сия, разседеся земля под ногами их:

³²и разверзеся земля, и пожре я и домы их, и вся люди сущыя с кореом, и скоты их:

³³и снидоша тии, и вся, елика суть их, живи во ад, и покры их земля, и погибоша от среды сонма:

³⁴и весь израиль, и иже окрест их, отбегоша от вопля их, зане рекоша, глаголюще: да не пожрет нас земля.

³⁵И огнь изыде от Господа и пояде двести и пятьдесят мужей принесших фимиам.

³⁶И рече Господь к моисею.

³⁷и ко елеазару сыну ааронову жерцу: соберите кадилники медяныя от среды изгоревших, и огнь чуждий сей разсыплите тамо, яко освятишася кадилницы грешных сих в душах их:

³⁸и сотворите я дщицы кованы, обложение у олтаря, яко принесошася пред Господа и освятишася, и быша в знамение сыном израилевым.

³⁹И взя елеазар сын аарона жерца кадилники медяныя, елики принесоша изгоревшии, и обложиша я во обложение олтаря,

⁴⁰в память сыном израилевым яко да никтоже приидет иноплеменник, иже несть от семене аароня, еже возложити фимиам пред Господем, и да не будет, якоже корей и советницы его, якоже глагола ему Господь рукою моисеовою.

⁴¹И возропташа сынове израилтестии на утрие на моисеа и аарона, глаголюще: вы избисте люди Господни.

⁴²И бысть егда нападе сонм на моисеа и аарона, и устремишася к скинии свидения:

⁴³и покры оную облак, и явися слава Господня: и вниде моисей и аарон пред скинию свидения.

⁴⁴И рече Господь к моисею и аарону, глаголя:

⁴⁵уступите от среды сонма сего и потреблю я единицею . И падоста на лица своя.

⁴⁶И рече моисей ко аарону: возми кадилник, и вложи в него огнь от олтаря, и возложи нань фимиам, и понеси скоро в полк, и помолися о них: изыде бо гнев от лица Господня, и нача губити люди.

⁴⁷И взя аарон, якоже глагола ему моисей, и тече в сонм, уже бо начася пагуба в людех: и возложи фимиам, и помолися о людех:

⁴⁸и ста между мертвыми и живыми, и преста пагуба.

⁴⁹И бысть умерших в пагубе четыренадесять тысящ и седмь сот кроме умерших кореа ради.

⁵⁰И возвратися аарон к моисею, к дверем скинии свидения, и преста пагуба.