Read Елизаветинская Библия, 1751 Числа 18 Bible Online

Числа 18 - Елизаветинская Библия, 1751 bible

Числа 18

¹И рече Господь ко аарону, глаголя: ты и сынове твои, и дом отца твоего с тобою, возмите грехи святых, ты же и сынове твои возмите грехи жречества вашего:

²и братию твою, племя левиино, сонм отца твоего приведи к себе, и да приложатся к тебе, и да служат тебе, и ты и сынове твои с тобою пред скиниею свидения,

³и да блюдут стражбы твоя и стражбы скинии: токмо к сосудом святым и ко олтарю да не приступают, да не измрут и сии, и вы:

⁴и приложатся к тебе и да блюдут стражбы скинии свидения по всем службам скинии, и иноплеменник да не приступит к тебе,

⁵и соблюдете стражбы святых и стражбы олтаря, и не будет ктому гнева на сынех израилевых:

⁶и аз взях братию вашу левиты от среды сынов израилевых в дар данный Господу служити службы скинии свидения.

⁷И ты и сынове твои с тобою сохраните жречество ваше по всему образу олтаря, и еже внутрь завесы, и да служите службы в дар жречества вашего: и иноплеменник приступаяй умрет.

⁸И рече Господь ко аарону: и се, аз дах вам снабдение начатков моих от всех освященных мне от сынов израилевых: тебе дах я в честь, и сыном твоим по тебе законно вечно:

⁹и сие да будет вам от освященных святых приношений, от всех даров их и от всех жертв их, и от всякаго преступления их и от всех грех их, елика отдают мне, от всех святынь, тебе да будут и сыном твоим.

¹⁰Во святем святых ядите я: всяк мужеский пол да яст я, ты и сынове твои: свята будут тебе.

¹¹И сие да будет вам от начатков даяний их, от всех возложений сынов израилевых: тебе дах я, и сыном твоим и дщерем твоим с тобою, законно вечно: всяк чистый в дому твоем да яст я.

¹²Всяк начаток елеа, и всяк начаток вина и пшеницы, начаток их, елика аще отдадят Господу, тебе дах я: первородная вся елика в земли их, елика аще принесут Господу, тебе да будут:

¹³всяк чистый в дому твоем да яст я.

¹⁴Всяко освященное в сынех израилевых тебе да будет,

¹⁵и всякое разверзающее всяка ложесна от всякия плоти, елика приносят Господу, от человека до скота, тебе да будут: но токмо искуплением искупятся первенцы человечестии, и первенцы скотов нечистых да искупятся:

¹⁶и искуп его от единаго месяца, сценение пять сикль, по сиклю святому: двадесять медниц есть:

¹⁷обаче первородная телцев и первородная овец и первородная коз да не искупятся: свята суть: и кровь их пролиеши у олтаря, и тук принесеши принос в воню благовония Господу.

¹⁸И мяса тебе да будут, якоже и груди возложения: и по раму десному тебе да будут.

¹⁹Всяко участие святых, елика аще отлучат сынове израилтестии Господу, тебе дах и сыном твоим и дщерем твоим с тобою, законно вечно: завет соли вечныя есть пред Господем, тебе и семени твоему по тебе.

²⁰И рече Господь ко аарону: в земли их да не наследиши наследия, и части да не будет тебе в них: яко аз часть твоя и наследие твое посреде сынов израилевых.

²¹И сыном левииным, се, дах всю десятину во израили в жребий за службы их, елико служат тии служение в скинии свидения:

²²и да не приступают по сем сынове израилтестии к скинии свидения прияти грех смертоносный:

²³и да служат левити сами службу скинии свидения, и тии возмут грехи их: законно вечно в роды их: и посреде сынов израилевых да не наследят наследия:

²⁴яко десятины сынов израилевых, елики аще отлучат Господу, участие дах левитом в жребий: сего ради рекох им: среди сынов израилевых да не наследят жребия.

²⁵И рече Господь к моисею, глаголя:

²⁶и левитом да глаголеши и речеши к ним: аще возмете десятину от сынов израилевых, юже дах вам от них во жребий, и отделите вы от нея участие Господу, десятину от десятины ея,

²⁷и вменятся вам участия ваша яко пшеница от гумна и яко участие от точила:

²⁸тако отделите их и вы от всех участий Господних, от всех десятин ваших, елики аще возмете от сынов израилевых, и дадите от них участие Господу, аарону жерцу:

²⁹от всех даяний ваших отделите участие Господу, или от всех начатков освященное от него,

³⁰И речеши к ним: егда отделите начаток от него, и вменится левитом аки жито от гумна и яко участие от точила:

³¹и ядите то во всяком месте вы и сынове ваши и домове ваши, яко мзда сия вам есть за службы вашя, яже в скинии свидения:

³²и не приимете за сие греха, яко аще отлучите начаток от него: и святынь сынов израилевых не оскверните, да не умрете.