Read Елизаветинская Библия, 1751 Числа 21 Bible Online

Числа 21 - Елизаветинская Библия, 1751 bible

Числа 21

¹И услыша хананей царь арадский живый при пустыни, яко прииде израиль путем афаримским, и ратова противу израиля, и взя от них плен.

²И обещася израиль обетом Господу и рече: аще мне предаси люди сия подручны, погублю их и грады их.

³И услыша Господь глас израилев и предаде хананеа подручна ему: и опустоши его и грады его, и прозва има месту тому запустение.

⁴И воздвигшеся от ора горы путем иже к морю чермному, обыдоша землю едомлю: и малодушествоваша людие на пути,

⁵и роптаху людие на Бога и на моисеа, глаголюще: вскую извел еси ны из египта убити нас в пустыни, яко несть хлеба, ни воды? и душа наша негодует о хлебе сем тщем.

⁶И посла Господь на люди змиев умерщвляющих, и угрызаху людий: и умроша люди мнози от сынов израилевых.

⁷И пришедше людие к моисеови глаголаша: согрешихом, яко роптахом на Господа и на тя: помолися убо ко Господу, да отженет от нас змии. И помолися моисей ко Господу о людех.

⁸И рече Господь к моисею: сотвори себе змию (медяну) и положи ю на знамя: и будет аще угрызет змия человека, всяк угрызенный видев ю жив будет.

⁹И сотвори моисей змию медяну и постави ю на знамени: и бысть егда угрызаше змия человека, и взираше на змию медяну, и оживаше.

¹⁰И воздвигошася сынове израилевы, и ополчишася во овофе:

¹¹и воздвигшеся от овофа, ополчишася во ахалгеи об ону страну пустыни, яже есть пред лицем моавитским, на восток солнца:

¹²и оттуду воздвигошася, и ополчишася в дебри заред:

¹³и оттуду воздвигшеся, ополчишася об ону страну арнона в пустыни, яже исходит от предел аморрейских: есть бо арнон предел моавль между моавом и между аморреом.

¹⁴Сего ради глаголется в книзе брань Господня: зоову попали, и потоки арнони,

¹⁵и потоки устрои в селение ир, и прилежит пределом моавлим.

¹⁶И оттуду (воздвигошася) ко кладязю: сей есть кладязь, о немже рече Господь к моисею: собери люди, и дам им воду пити.

¹⁷Тогда воспе израиль песнь сию у кладязя: начинайте ему:

¹⁸кладязь, ископаша его князи, изсекоша его царие язычестии во царствии их, внегда обладати ими. И от кладязя (воздвигошася) в манфанаил:

¹⁹и от манфанаила в наадиил, и от наадиила в вамоф:

²⁰и от вамофа в напин, иже есть на поли моавли, от верха изсеченаго, зрящаго пред лице пустыни.

²¹И посла моисей послы к сиону царю аморрейску, словесы мирными глаголя:

²²да пройдем сквозе землю твою, путем пойдем: не уклонимся ни на села, ни на винограды, не испием воды от кладязь твоих: путем царским пойдем, дондеже пройдем пределы твоя.

²³И не даде сион израилю проити сквозе пределы своя: и собра сион вся люди своя, и изыде ополчитися на израиля в пустыню: и прииде во иассан, и ополчися на израиля.

²⁴И порази его израиль убийством меча, и обладаше землею его от арнона до иавока, даже до сынов амманих: яко иазир пределы сынов амманих суть.

²⁵И взя израиль вся грады сия: и вселися израиль во всех градех аморрейских, во есевоне и во всех подлежащих ему:

²⁶есть бо есевон град сиона царя аморрейска: и сей повоева царя моавля прежде и взя всю землю его от ароира даже до арнона.

²⁷Сего ради рекут приточницы: приидите во есевон, да соградится и созиждется град сион:

²⁸яко огнь изыде от есевона и пламень от града сиона, и пояде даже до моава, и пожре столпы арнонския:

²⁹горе тебе, моаве, погибосте, людие хамосовы: продани быша сынове их в заключение и дщери их пленницы царю аморрейскому сиону:

³⁰и семя их погибнет, есевон даже до девона: и жены их еще разожгоша огнь на моава.

³¹Вселися же израиль во вся грады аморрейски:

³²и посла моисей соглядати иазира: и взяша его и села его, и изгнаша аморреа живущаго тамо:

³³и возвратившеся, приидоша путем в васан. И изыде ог, царь васанский, противу им и вси людие его на брань во едраин.

³⁴И рече Господь к моисею: не убойся его, яко в руце твои предах его и вся люди его и всю землю его: и сотвориши ему, якоже сотворил еси сиону царю аморрейску, иже живяше во есевоне.

³⁵И порази его и сыны его и вся люди его, даже не оста в них живый: и наследиша землю его.