Read Елизаветинская Библия, 1751 Числа 24 Bible Online

Числа 24 - Елизаветинская Библия, 1751 bible

Числа 24

¹И видев валаам, яко добро есть пред Господем благословляти израиля, не иде по обычаю своему в сретение волхвованием, и возврати лице свое в пустыню.

²И возвед валаам очи свои, узре израиля ополчившася по племеном: и бысть Дух Божий на нем.

³И восприим притчу свою рече: глаголет валаам, сын веоров, глаголет человек истинно зряй,

⁴глаголет слушаяй словеса крепкаго, иже видение Божие виде во сне: отверсты очи его:

⁵коль добри доми твои, иакове, и кущы твоя, израилю:

⁶яко дубравы осеняющыя и яко садие при реках, и яко кущы, яже водрузи Господь, и яко кедри при водах:

⁷изыдет человек от семене его, и обладает языки многими: и возвысится паче гога царство его, и возрастет царство его:

⁸Бог изведе его из египта, якоже слава единорога ему: пояст языки враг своих и толщы их измождит, и стрелами своими устрелит врага:

⁹возлег почи яко лев и яко скимен: кто возбудит его? благословящии тя благословени, и проклинающии тя прокляти.

¹⁰И разгневася валак на валаама, и плесну руками своими, и рече валак к валааму: кляти тя врага моего призвах, и се, благословил еси их в третие:

¹¹ныне убо бежи на место свое: рекох, почту тя: и ныне лиши тя Господь славы.

¹²И рече валаам к валаку: и послом твоим, ихже послал еси ко мне, не рекох ли, глаголя:

¹³аще ми даст валак храмину свою полну сребра и злата, не могу преступити слова Божия, еже сотворити е зло или добро от мене самаго: елика аще речет ми Бог, сия возглаголю?

¹⁴и ныне, се, иду до места своего: гряди, присоветую тебе, что сотворят людие сии людем твоим, в последняя дни.

¹⁵И восприим притчу свою рече: глаголет валаам сын веоров, глаголет человек истинно зряй,

¹⁶слышай словеса Божия, умея умение вышняго и видение Божие видевый во сне: отверсты очи его:

¹⁷покажу ему, и не ныне: ублажаю, и не приближается: возсияет звезда от иакова, и востанет человек от израиля и погубит князи моавитския, и пленит вся сыны сифовы:

¹⁸и будет едом наследие, и будет наследие исав враг его, и израиль сотвори крепость:

¹⁹и востанет от иакова, и погубит спасаемаго от града.

²⁰И видев амалика и восприим притчу свою, рече: начало языков амалик, и семя их погибнет.

²¹И видев кенеона и восприим притчу свою, рече: сильно селение твое: и аще положиши на камени гнездо твое,

²²и аще будет веору гнездо коварства, ассириане пленят тя.

²³И видев ога и восприим притчу свою, рече: горе, горе, кто жив будет, егда положит Бог сия?

²⁴и изыдут из рук китиейских, и озлобят ассура, и озлобят евреов, и сами вкупе погибнут.

²⁵И востав валаам отиде, возвратився на место свое: и валак отиде к себе.