Read Елизаветинская Библия, 1751 Числа 3 Bible Online

Числа 3 - Елизаветинская Библия, 1751 bible

Числа 3

¹И сия рождения аарона и моисеа, в день в оньже глагола Господь моисею на горе синайстей:

²и сия имена сынов аароних: первенец надав и авиуд, и елеазар и ифамар:

³сия имена сынов аароних, жерцы помазаныя, имже совершишася руце их жрети:

⁴и скончашася надав и авиуд пред Господем, приносящым им огнь чуждь пред Господем в пустыни синайстей, и чад не бе им: и жречествоваху елеазар и ифамар со аароном, отцем своим.

⁵И рече Господь к моисею, глаголя:

⁶поими племя левиино, и поставиши я пред аароном жерцем, и да служат ему:

⁷и да стрегут стражбы его и стражбы сынов израилевых пред скиниею свидения, делати дела скинии:

⁸и да хранят вся сосуды скинии свидения и стражбы сынов израилевых по всем делом скинии:

⁹и да даси левиты аарону брату твоему и сыном его жерцем: в дар даны сии мне суть от сынов израилевых:

¹⁰и аарона и сыны его поставиши над скиниею свидения, и да хранят жречество свое, и вся яже у олтаря и внутрь завесы: иноплеменник же прикасаяйся умрет.

¹¹И рече Господь к моисею, глаголя:

¹²и се, аз взях левиты от среды сынов израилевых, вместо всякаго первенца, отверзающаго ложесна от сынов израилевых: искупления их будут, и да будут мне левити:

¹³мне бо всяк первенец: в оньже день побих всякаго первенца в земли египетстей, освятих себе всякаго первенца во израили, от человека до скота мне да будут: аз Господь.

¹⁴И рече Господь к моисею в пустыни синайстей, глаголя:

¹⁵соглядай сынов левииных по домом отечеств их по сонмом их, по рождению их: всяк мужеск пол от месяца единаго и вышше да соглядаете их.

¹⁶И сочте их моисей и аарон повелением Господним, якоже повеле им Господь.

¹⁷И бяху сии сынове левиины от имен их: гирсон, кааф и мерари.

¹⁸И сия имена сынов гирсоних по сонмом их: ловени и семей.

¹⁹И сынове каафовы по сонмом их: амрам и иссаар, хеврон и озиил.

²⁰И сынове мерарины по сонмом их: мооли и муси: сии суть сонми левитстии по домом отечеств их.

²¹От гирсона сонм ловениин и сонм семеинь: сии суть сонми гирсоновы.

²²Соглядание их по числу всего мужеска полу, от месяца единаго и вышше, соглядание их седмь тысящ и пять сот.

²³И сынове гирсоновы за скиниею да ополчаются к морю.

²⁴И князь дому отечества сонма гирсоня елисаф сын даиль.

²⁵И стражба сынов гирсоновых в скинии свидения, скиния и покров ея, и покров дверий скинии свидения,

²⁶и опоны двора, и завеса дверий двора, иже есть у скинии, и прочая всех дел его.

²⁷От каафа сонм амрамль един и сонм иссааров един, и сонм хевронь един и сонм озиил един: сии суть сонми каафовы:

²⁸по числу всяк мужеск пол от месяца единаго и вышше осмь тысящ и шесть сот, стрегущии стражбы святых.

²⁹Сонми сынов каафовых да ополчаются от страны скинии к югу,

³⁰и князь дому отечеств сонмов каафовых елисафан сын озиил:

³¹и стражба их кивот и трапеза, и светилник и олтари, и сосуды святаго, в нихже служат, и покров, и вся дела их.

³²И князь над князи левитскими елеазар сын аарона жерца, поставлен стрещи стражбы святых.

³³От мерара же сонм мооли и сонм муси: сии суть сонми мерарины,

³⁴соглядание их по числу, всяк мужеск пол от месяца единаго и вышше, шесть тысящ и двести.

³⁵И князь дому отечеств сонма мерарина суриил сын авихеов: от страны скинии да ополчаются к северу,

³⁶соглядание стражбы сынов мерариных главицы скинии и вереи ея, и столпы ея и стояла ея, и вся сосуды их и вся дела их,

³⁷и столпы двора окрест и стояла их, и колки их и верви их.

³⁸Ополчающиися сопреди скинии свидения на востоки моисей и аарон и сынове его, стрегуще стражбы святаго, в стражбах сынов израилевых: и иноплеменник прикасаяйся да умрет.

³⁹Все соглядание левитов, ихже согляда моисей и аарон повелением Господним по сонмом их, всяк мужеск пол от месяца единаго и вышше, двадесять и две тысящы.

⁴⁰И рече Господь к моисею, глагола: соглядай всякаго первенца мужеска полу сынов израилевых от месяца единаго и вышше, и возми число их по имени,

⁴¹и да поймеши мне левиты за вся первенцы сынов израилевых: аз Господь: и скоты левитски вместо всех первенцев в скотех сынов израилевых.

⁴²И согляда моисей, якоже заповеда ему Господь, всякаго первенца в сынех израилевых.

⁴³И быша вси первенцы мужескаго полу, по числу имен от месяца единаго и вышше, от соглядания их двадесять две тысящы двести и седмьдесят три.

⁴⁴И рече Господь к моисею, глаголя:

⁴⁵поими левиты вместо всех первенцев сынов израилевых, и скоты левитски вместо скотов их, и будут мне левиты: аз Господь:

⁴⁶и искуп дву сот седмидесяти трех, иже преизбывают сверх левитов от первенцов сынов израилевых:

⁴⁷и да возмеши по пяти сикль на главу, по сиклю святому возмеши двадесять пенязей сикль,

⁴⁸и даси сребро аарону и сыном его искуп от преизбывающих в них.

⁴⁹И взя моисей сребро искупное от преизбывающих в них на искуп левитом:

⁵⁰от первенец сынов израилевых взя сребра тысящу три ста шестьдесят пять сиклев, по сиклю святому.

⁵¹И даде моисей окуп от преизбывших аарону и сыном его, повелением Господним, якоже заповеда Господь моисею.