Read Елизаветинская Библия, 1751 Числа 32 Bible Online

Числа 32 - Елизаветинская Библия, 1751 bible

Числа 32

¹И скота множество бяше сыном рувимлим и сыном гадовым, много зело. И видеша страну иазирову и страну галаадову, и бяше место, место скотно.

²И пришедше сынове рувимли и сынове гадовы рекоша к моисею и ко елеазару жерцу и ко князем сонма, глаголюще:

³атароф и девон, и иазир и намра, и есевон и елеали, и севама и навав и веан,

⁴Земля, юже предаде Господь пред сыны израилевыми, земля скотопитателна есть, рабом же твоим скот есть.

⁵И реша: аще обретохом благодать пред тобою, да дастся нам земля сия рабом твоим во одержание, и не преводи нас чрез иордан.

⁶И рече моисей сыном гадовым и сыном рувимлим: братия вашя пойдут на брань, и вы ли сядете ту?

⁷и вскую развращаете сердце сынов израилевых, не прейти на землю, юже дает Господь им?

⁸не тако ли сотвориша отцы ваши, егда послах я от кадис-варни соглядати землю?

⁹и взыдоша до дебри грезновныя, и соглядаша землю, и отвратиша сердце сынов израилевых, яко да не внидут в землю, юже даде им Господь?

¹⁰И разгневася яростию Господь в день он и клятся, глаголя:

¹¹аще узрят человецы сии изшедшии из египта, от двадесяти лет и вышше, ведущии добро и зло, землю, еюже кляхся аврааму и исааку и иакову: не последоваша бо вслед мене,

¹²точию халев сын иефонниин отлученный и иисус сын навин, яко последоваша вслед Господа.

¹³И разгневася яростию Господь на израиля, и томи я в пустыни четыредесять лет, дондеже потребися весь род творящий злая пред Господем.

¹⁴Се, востасте вместо отец ваших, сокрушение человек грешников, приложити еще к ярости гнева Господня на израиля:

¹⁵яко отвратитеся от него, приложити еще оставити его в пустыни, и возбеззаконнуете на весь сонм сей.

¹⁶И приидоша к нему и глаголаша: ограды овцам да соградим зде скотом своим, и грады имением нашым:

¹⁷и мы вооружени пойдем на стражбу первии сыном израилевым, дондеже введем я в место их: и да вселятся имения наша во градех утвержденых ради живущих на земли:

¹⁸не возвратимся в домы нашя, дондеже разделятся сынове израилтестии, кийждо в наследие свое:

¹⁹и ктому не наследим в них об ону страну иордана и далее, яко прияхом жребия нашя сию страну иордана на востоки.

²⁰И рече к ним моисей: аще сотворите по словеси сему, аще вооружитеся пред Господем на брань,

²¹и прейдет всяк оружник ваш иордан пред Господем на брань, дондеже потребится враг его от лица его,

²²и обладана будет земля пред Господем, и посем возвратитеся, и будете безвинни пред Господем и от израиля: и будет земля сия вам во одержание пред Господем:

²³аще же не сотворите тако, согрешите пред Господем, и увесте грех ваш, егда вас постигнут злая:

²⁴и соградите вы себе грады имению вашему и ограды скотом вашым: и исходящее из уст ваших сотворите.

²⁵И рекоша сынове рувимли и сынове гадовы к моисею, глаголюще: раби твои сотворят, якоже Господь наш повелел есть:

²⁶имение наше, и жены наши, и весь скот наш да будут во градех галаадовых:

²⁷раби же твои прейдут вси вооружени и уготовани пред Господем на брань, якоже глаголет Господь.

²⁸И пристави им моисей елеазара жерца и иисуса сына навина, и князи отечеств племен сынов израилевых.

²⁹И рече к ним моисей: аще прейдут сынове рувимли и сынове гадовы с вами чрез иордан, всяк вооружен на брань пред Господем, и обладаете землею пред собою, и дадите им землю галаадову во одержание.

³⁰Аще ли не прейдут вооружени с вами на брань пред Господем, то предпослите имение их и жены их и скоты их прежде вас на землю ханааню, и да наследят купно с вами в земли ханаани.

³¹И отвещаша сынове рувимли и сынове гадовы, глаголюще: елика глаголет Господь рабом своим, тако сотворим мы:

³²прейдем вооружени пред Господем в землю ханааню, и дадите нам во одержание страну сию иордана.

³³И даде им моисей сыном гадовым и сыном рувимлим и полуплемени манассиину сынов иосифовых царство сиона царя аморрейска и царство ога царя васанска, землю и грады с пределы ея, грады окрестныя земли.

³⁴И соградиша сынове гадовы девон и атароф и ароир,

³⁵и софан и иазир, и вознесоша их,

³⁶и намрам и вефаран грады тверды, и ограды овцам.

³⁷И сынове рувимли соградиша есевон и елеали и кариафаим,

³⁸и навон и веельмеон ограждены, и севама: и прозваша по именом своим имена градом, яже соградиша.

³⁹И иде ур сын махиров, внук манассиев, в галаад, и взя его, и погуби аморреа живущаго в нем:

⁴⁰и даде моисей галаад махиру сыну манассиину, и вселися ту.

⁴¹И иаир сын манассиев иде и взя села их, и прозваша я села иаирова.

⁴²И навав иде и взя каафа и села его, и именова я навоф от имене своего.