Read Елизаветинская Библия, 1751 Числа 33 Bible Online

Числа 33 - Елизаветинская Библия, 1751 bible

Числа 33

¹И сии станове сынов израилевых, егда изыдоша из земли египетския с силою своею рукою моисеовою и ааронею.

²И написа моисей воздвижения их и станы их, по словеси Господню. И сии станове шествия их:

³воздвигошася от рамессы в месяц первый, в пятыйнадесять день перваго месяца: наутрие пасхи изыдоша сынове израилтестии рукою высокою пред всеми ег¦птяны:

⁴и египтяне погребаху умершыя от них вся, яже изби Господь всякаго первенца в земли египетстей: и в бозех их сотвори отмщение Господь.

⁵И воздвигшеся сынове израилевы от рамессы, ополчишася в сокхофе:

⁶и воздвигшеся от сокхофа, ополчишася в вуфане, иже есть часть некая пустыни:

⁷и воздвигошася от вуфана, и ополчишася во устии ирофа, иже есть прямо веельсепфону, и ополчишася прямо магдолу:

⁸и воздвигошася прямо ирофу, и проидоша среди моря в пустыню: и идоша путем три дни в пустыни тии, и ополчишася в горькостех.

⁹И воздвигошася от горькостей и приидоша в елим: и в елиме (быша) дванадесять источники вод, и седмьдесят стеблий фиников, и ополчишася у воды тамо.

¹⁰И воздвигошася от елима и ополчишася у моря чермнаго:

¹¹и воздвигошася от моря чермнаго и ополчишася в пустыни син:

¹²и воздвигошася от пустыни син и ополчишася в рафаке:

¹³и воздвигошася от рафака и ополчишася в елусе:

¹⁴и воздвигошася от елуса и ополчишася в рафидине: и не бысть тамо воды людем пити.

¹⁵И воздвигошася от рафидина и ополчишася в пустыни сина:

¹⁶и воздвигошася от пустыни сина и ополчишася во гробех похотения:

¹⁷и воздвигошася от гробов похотения и ополчишася во асирофе:

¹⁸и воздвигошася от асирофа и ополчишася в рафаме:

¹⁹и воздвигошася от рафама и ополчишася в ремнон-фаресе:

²⁰и воздвигошася от ремнон-фареса и ополчишася в лемвоне:

²¹и воздвигошася от лемвона и ополчишася в рессане:

²²и воздвигошася от рессана и ополчишася в макеллафе:

²³и воздвигошася от макеллафа и ополчишася во арсафафе:

²⁴и воздвигошася от арсафафа горы и ополчишася в харадафе:

²⁵и воздвигошася от харадафа и ополчишася в макидофе:

²⁶и воздвигошася от макидофа и ополчишася в катаафе:

²⁷и воздвигошася от катаафа и ополчишася во фарафе:

²⁸и воздвигошася от фарафа и ополчишася в мафекке:

²⁹и воздвигошася от мафекка и ополчишася во аселмоне:

³⁰и воздвигошася от аселмона и ополчишася в масуруфе:

³¹и воздвигошася от масуруфа и ополчишася в ванаккане:

³²и воздвигошася от ванаккана и ополчишася в горе гаддад:

³³и воздвигошася от горы гаддад и ополчишася во етевафе:

³⁴и воздвигошася от етевафа и ополчишася во евроне:

³⁵и воздвигошася от еврона и ополчишася в гесион-гавере:

³⁶и воздвигошася от гесион-гавера и ополчишася в пустыни син: и воздвигошася от пустыни син и ополчишася в пустыни фарани, яже есть кадис:

³⁷и воздвигошася от кадиса и ополчишася в горе ор близ земли едомли.

³⁸И взыде аарон жрец на гору ор повелением Господним, и умре тамо в четыредесятое лето изшествия сынов израилевых из земли египетския, месяца пятаго в первый день месяца.

³⁹И аарон бяше ста двадесяти трех лет, егда умре в горе ор.

⁴⁰И услыша хананей царь арадский, и сей живяше в земли ханаани, егда вхождаху сынове израилевы.

⁴¹И воздвигошася от горы ор и ополчишася в селмоне:

⁴²и воздвигошася от селмона и ополчишася в финоне:

⁴³и воздвигошася от финона и ополчишася во овофе:

⁴⁴и воздвигошася от овофа и ополчишася в гаи, об ону страну предел моавлих:

⁴⁵и воздвигошася от гаи и ополчишася в девон-гаде:

⁴⁶и воздвигошася от девон-гада и ополчишася в гелмон-девлафаиме:

⁴⁷и воздвигошася от гелмон-девлафаима и ополчишася в горах аваримлих прямо нававу:

⁴⁸и воздвигошася от гор аваримлих и ополчишася на западе моавли, у иордана при иерихоне:

⁴⁹и воздвигошася от запада моавля и ополчишася у иордана, между есимофом, до велсаттима на запады моава.

⁵⁰И рече Господь к моисею в западе моава у иордана при иерихоне, глаголя:

⁵¹глаголи сыном израилевым и речеши к ним: вы преходите иордан в землю ханааню,

⁵²и погубите вся живущыя на земли от лица вашего, и разрушите стражбы их, и вся идолы излиянныя их сокрушите я, и вся капища их разрушите,

⁵³и погубите вся живущыя на земли, и вселитеся в ню: вам бо дах землю их по жребию:

⁵⁴и наследите землю их жребием по племенам вашым: многим умножите одержание их, и малым умалите одержание их: в неже изыдет имя его, тамо да будет жребий его: по племенам отечествий ваших наследите:

⁵⁵аще же не погубите живущих на земли от лица вашего, будут, ихже оставите от них, остны во очесех ваших и стрелы в ребрах ваших, и совраждуют вам на земли, на нейже вы вселитеся:

⁵⁶и будет якоже умыслих сотворити онем, то сотворю вам.