Read Елизаветинская Библия, 1751 Числа 35 Bible Online

Числа 35 - Елизаветинская Библия, 1751 bible

Числа 35

¹И рече Господь к моисею на западе моавли у иордана при иерихоне, глаголя:

²заповеждь сыном израилевым, да дадят левитом от жребий одержания своего грады вселитися, и предградия градская окрест их да дадят левитом:

³и будут им грады вселятися, и участия их да будут скотом их и всем четвероножным их:

⁴и прилежащая градом, ихже дадите левитом, от стены града и вне, две тысящы лакот окрест:

⁵и да измериши страну вне града, яже на восток, две тысящы лакот, и страну, яже к ливе, две тысящы лакот, и страну, яже к морю, две тысящы лакот, и страну, яже к северу, две тысящы лакот, и град посреде сего будет вам, и пределы градов:

⁶и грады яже дадите левитом, шесть градов (да будут) убежных, ихже дадите убегати в ня убившему, и к сим четыредесять и два града:

⁷всех градов дадите левитом четыредесять и осмь градов, сия и предградия их:

⁸и грады, ихже дадите от одержания сынов израилевых, от многих многа, а от малых мала: кийждо по наследию своему, еже наследят, да дадят от градов левитом.

⁹И рече Господь к моисею, глаголя:

¹⁰глаголи сыном израилевым и речеши к ним: вы преходите иордан в землю ханааню:

¹¹и разделите сами себе грады убежища да будут вам убегати в ня убийце, всяк убивый душу нехотяй:

¹²и будут гради вам убежища от ужика крове, и да не умрет убивый, дондеже станет пред сонмом на суде:

¹³и грады, яже дадите, шесть градов, убежища да будут вам.

¹⁴Три грады дадите об ону страну иордана, и три грады дадите в земли ханаани:

¹⁵убежище да будет сыном израилевым, и пришелцу, и обиталнику иже в вас, да будут гради сии во убежище убегати тамо всякому убившему душу нехотением.

¹⁶Аще же орудием железным убиет его, и умрет, убийца есть: смертию да умрет убийца.

¹⁷Аще же камением из руки убиет его, и умрет от него, убийца есть: смертию да умрет убийца.

¹⁸Аще же орудием древяным из руки, от негоже умрет, убиет его, и умрет, убийца есть: смертию да умрет убийца.

¹⁹ужик крове, сей да убиет убившаго: егда усрящет его, сей да убиет его.

²⁰Аще же вражды ради ринет его и вержет на него всяк сосуд по навету, и умрет,

²¹или от ненависти поразил его рукою, и умрет, смертию да умрет убивый, убийца есть: смертию да умрет убиваяй: ужик крове да убиет убийцу, егда сретится с ним.

²²Аще же внезапу не вражды ради ринет его, или вержет на него всяк сосуд не по навету,

²³или всяким каменем, имже вержет не ведый, и падет на него, и умрет, он же враг его не бе, ниже ищяй зла ему творити,

²⁴и да судит сонм между убившим и между ужиком крове, по судбам сим,

²⁵и избавит сонм убившаго от ужика крове, и да возвратит его сонм во град убежища его, в оньже убежа, и да поживет тамо, дондеже умрет жрец великий, егоже помазаша елеем святым.

²⁶Аще же исходом изыдет убивый вне предел града, в оньже убежа тамо,

²⁷и обрящет его ужик крове вне предел града убежища его, и убиет ужик крове убившаго, несть повинен:

²⁸во граде бо убежания да живет, дондеже умрет жрец великий, и по умертвии жерца великаго да возвратится убивый в землю одержания своего.

²⁹И да будут сия вам во оправдание суда в роды вашя во всех селениих ваших.

³⁰Всякаго убившаго душу, пред свидетелми да убиеши убившаго: и свидетель един да не свидетелствует на смерть души.

³¹И да не возмете искупа за душу от убившаго, повинна суща убиению: смертию бо умрет:

³²ниже да возмете искупа убежания во град убежища, да паки живет на земли, дондеже умрет жрец великий.

³³И да не убиете земли, на нейже вы обитаете: кровь бо сия убивает землю, и не очистится земля от крове пролиянныя на ней, но токмо кровию проливающаго:

³⁴и да не оскверните земли, на нейже живете, на нейже аз вселяюся посреде вас: аз бо есмь Господь вселяяйся посреде сынов израилевых.