Read Елизаветинская Библия, 1751 Числа 4 Bible Online

Числа 4 - Елизаветинская Библия, 1751 bible

Числа 4

¹И рече Господь к моисею и аарону, глаголя:

²возми сочисление сынов каафовых от среды сынов левииных, по сонмом их, по домом отечеств их,

³от двадесяти и пяти лет и вышше, даже до пятидесяти лет, всяк входяй служити, творити вся дела в скинии свидения.

⁴И сия дела сынов каафовых от среды сынов левииных, по сонмом их, по домом отечеств их, в скинии свидения святое святых.

⁵И да внидут аарон и сынове его, егда воздвигнется полк, и да снимут завесу осеняющую, и да обвиют в ню кивот свидения,

⁶и да покрыют его покровом кожаным синим, и да возложат нань одежду всю синетную сверху, и да вложат носила:

⁷и на трапезе предложения да положат на ней одежду всю багряную и блюда, и кадилницы и чашы, и возливалницы, имиже возливают, и хлебы на ней всегда да будут:

⁸и да возложат на ню одежду червлену, и да покрыют ю покровом кожаным синим, и да вложат носила ея:

⁹и да возмут одежду синю, и покрыют светилник светящий и свещы его, и щипцы его и очищала его, и вся сосуды елеа его, имиже служат в них:

¹⁰и да вложат его и вся сосуды его в покров кожан синий, и да возложат его на носила:

¹¹и на олтарь златый да положат одежду синю, и да покрыют его покровом кожаным синим, и да вложат носила его:

¹²и да возмут вся сосуды служебныя, еликими служат в них во святых, и вложат во одежду синю, и да покрыют их покровом кожаным синим, и да возложат на носила:

¹³и покров да возложат на олтарь, и покрыют его одеждою всею багряною:

¹⁴и да возложат на него вся сосуды его, еликими служат на нем в них, и кадилники, и вилицы и чашы, и покров и вся сосуды олтаря, и да возложат на него покров кожан синь и да вложат носила его: и да возмут одежду багряну, и да покрыют умывалницу и стояла ея: и да вложат ю в покров кожаный синий, и да возложат на носила.

¹⁵И совершат аарон и сынове его, покрывающе святая и вся сосуды святыя, внегда воздвизатися полку: и по сих да внидут сынове каафовы воздвизати, и да не прикоснутся святых, да не умрут. Сия да воздвизают сынове каафовы в скинии свидения.

¹⁶Надсмотритель елеазар, сын аарона жерца, елей светилный, и фимиам сложения, и жертва яже по вся дни, и елей помазания, надсмотрение всея скинии и елика суть в ней во святем, во всех делех.

¹⁷И рече Господь к моисею и аарону, глаголя:

¹⁸не потребите сонм племене каафова от среды левитов:

¹⁹сие сотворите им, и живи будут и не умрут: приходящым им ко святым святых, аарон и сынове его да внидут и да устроят их коегождо по ношению его,

²⁰и да не внидут внезапу видети святая, и умрут.

²¹И рече Господь к моисею, глаголя:

²²возми сочисление сынов гирсоних, и иже по домом отечеств их, по сонмом их и по племенем их,

²³от двадесяти и пяти лет и вышше, даже до пятидесяти лет, соглядайте я, всяк входяй служити и творити дела в скинии свидения.

²⁴Сия служба сонма гирсонова, служити и воздвизати.

²⁵И да воздвигнет опоны скинии и скинию свидения, и покров ея и покров синий сущий сверх ея, и опону дверий скинии свидения,

²⁶и опоны двора, и завесу дверий двора, елика над скиниею свидения, и яже окрест олтаря, и прочая их, и вся сосуды служебныя, еликими служат в них, да сотворят.

²⁷По слову аарона и сынов его да будет вся служба сынов гирсоновых по всем службам их и по всем делам их: и да соглядаеши их по именам, вся носимая ими.

²⁸Сия служба сонма сынов гирсоновых в скинии свидения, и стражба их рукою ифамара, сына аароня жерца.

²⁹Сынове мерарины по сонмом их, по домом отечеств их, соглядайте их,

³⁰от двадесяти и пяти лет и вышше, даже до пятидесяти лет, соглядайте их, всяк входяй служити дела скинии свидения.

³¹И сия хранения воздвизаемых ими, по всем делом их в скинии свидения: главицы скинии и вереи ея, и столпы ея и стояла ея, и покров и стояла их, и столпы их, и покров дверий скинии,

³²и столпы двора окрест и стояла их, и столпы завесы дверий двора и стояла их, и колки их и верви их, и вся сосуды их и вся служения их: по именам соглядайте их и вся сосуды стражбы воздвизаемых ими.

³³Сия служба сонма сынов мерариных во всех делех их, в скинии свидения рукою ифамара, сына аароня жерца.

³⁴И согляда моисей и аарон и князи израилевы сыны каафовы по сонмом их, по домом отечеств их,

³⁵от двадесяти и пяти лет и вышше, даже до пятидесяти лет, всяк входяй служити и творити дела в скинии свидения.

³⁶И бысть соглядание их по сонмом их, две тысящы седмь сот пятьдесят.

³⁷Сие сочтение сонма каафова, всех служащих в скинии свидения, якоже согляда моисей и аарон повелением Господним, рукою моисеовою.

³⁸И соглядани быша сынове гирсони по сонмом своим, по домом отечеств своих,

³⁹от двадесяти и пяти лет и вышше, даже до пятидесяти лет, всяк входяй служити и творити дела в скинии свидения.

⁴⁰И бысть соглядание их по сонмом их, по домом отечеств их, две тысящы шесть сот тридесять.

⁴¹Сие соглядание сонма сынов гирсоновых, всех служащих в скинии свидения, ихже соглядаша моисей и аарон по глаголу Господню, рукою моисеовою.

⁴²Соглядани же быша сынове мерарины по сонмом своим, по домом отечеств своих,

⁴³от двадесяти и пяти лет и вышше, даже до пятидесяти лет, всяк входяй служити на дела скинии свидения.

⁴⁴И бысть сочтение их по племеном их, по сонмом их, по домом отечеств их, три тысящы и двести.

⁴⁵Сие сочисление сонма сынов мерариных, ихже согляда моисей и аарон по глаголу Господню, рукою моисеовою.

⁴⁶Вси согляданнии левиты, ихже согляда моисей и аарон и князи сынов израилевых, по сонмом их и по домом отечеств их,

⁴⁷от двадесяти и пяти лет и вышше, даже до пятидесяти лет, всяк входяй на дело дел, и к делам воздвизаемым в скинии свидения.

⁴⁸И быша согляданнии осмь тысящ пять сот осмьдесят.

⁴⁹Повелением Господним соглядаше их моисей, мужа по мужу над делы их, и яже воздвизаху сии, и соглядани суть, якоже повеле Господь моисею.