Read Елизаветинская Библия, 1751 Числа 7 Bible Online

Числа 7 - Елизаветинская Библия, 1751 bible

Числа 7

¹И бысть в день в оньже сконча моисей, якоже поставити скинию, и помаза ю, и освяти ю и вся сосуды ея, и олтарь и вся сосуды его, и помаза я.

²И приведоша князи израилтестии дванадесять, князи домов отечеств своих, сии князи коегождо племене, сии предстоящии над согляданием:

³и приведоша дары своя пред Господа шесть колесниц покрытых и дванадесять волов: колесницу едину от двоих князей, и телца от коегождо и приведоша пред скинию.

⁴И рече Господь к моисею, глаголя:

⁵возми от них, и да будут на дела служебная скинии свидения: и даси я левитом, коемуждо по его служению.

⁶И взем моисей колесницы и волы, даде я левитом:

⁷две колесницы и четыри волы даде сыном гирсоним по службам ихже,

⁸и четыри колесницы и осмь волов даде сыном мерариным по службам их, чрез ифамара, сына аарона жерца:

⁹и сыном каафовым не даде, яко службы святаго имеют: на раменах да воздвизают я.

¹⁰И принесоша князи на обновление олтаря в день, в оньже помаза его, и принесоша князи дары своя пред олтарь.

¹¹И рече Господь к моисею: князь един на день, князь на день да принесут дары своя на обновление олтаря.

¹²И бяше приносяй дар свой в первый день наассон сын аминадавль, князь племене иудина:

¹³и принесе дар свой, блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву:

¹⁴фимиамник един десяти златник, полн фимиама:

¹⁵телца единаго от волов, овна единаго, агнца единаго единолетна во всесожжение:

¹⁶и козла от коз единаго греха ради:

¹⁷и на жертву спасения юницы две, овнов пять, козлов пять, агниц единолетных пять: сей дар наассона сына аминадавля.

¹⁸Во вторый день принесе нафанаил сын согаров, князь племене иссахаря:

¹⁹и принесе дар свой, блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву:

²⁰фимиамник един десяти златник, полн фимиама:

²¹телца единаго от волов, овна единаго, агнца единаго единолетна во всесожжение:

²²и козла от коз единаго греха ради:

²³и на жертву спасения юницы две, овнов пять, козлов пять, агниц единолетных пять: сей дар нафанаила сына согарова.

²⁴В третий день князь сынов завулоних, елиав сын хелонов:

²⁵дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву:

²⁶фимиамник един десяти златник, полн фимиама:

²⁷телца единаго от волов, овна единаго, агнца единаго единолетна во всесожжение:

²⁸и козла от коз единаго греха ради:

²⁹и на жертву спасения юницы две, овнов пять, козлов пять, агниц единолетных пять: сей дар елиава сына хелонова.

³⁰В четвертый день князь сынов рувимлих, елисур сын седиуров:

³¹дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву:

³²фимиамник един десяти златник, полн фимиама:

³³телца единаго от волов, овна единаго, агнца единаго единолетна во всесожжение:

³⁴и козла от коз единаго греха ради:

³⁵и на жертву спасения юницы две, овнов пять, козлов пять, агниц единолетных пять: сей дар елисура сына седиурова.

³⁶В пятый день князь сынов симеоних, саламиил сын сурисадаиль:

³⁷дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву:

³⁸фимиамник един десяти златник, полн фимиама:

³⁹телца единаго от волов, овна единаго, агнца единаго единолетна во всесожжение:

⁴⁰и козла от коз единаго греха ради:

⁴¹и на жертву спасения юницы две, овнов пять, козлов пять, агниц единолетных пять: сей дар саламиила сына сурисадаиля.

⁴²В шестый день князь сынов гадовых, елисаф сын рагуилев:

⁴³дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву:

⁴⁴фимиамник един десяти златник, полн фимиама:

⁴⁵телца единаго от волов, овна единаго, агнца единаго единолетна во всесожжение:

⁴⁶и козла от коз единаго греха ради:

⁴⁷и на жертву спасения юницы две, овнов пять, козлов пять, агниц единолетных пять: сей дар елисафа сына рагуилева.

⁴⁸В седмый день князь сынов ефремлих, елисама сын емиудов:

⁴⁹дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву:

⁵⁰фимиамник един десяти златник, полн фимиама:

⁵¹телца единаго от волов, овна единаго, агнца единаго единолетна во всесожжение:

⁵²и козла от коз единаго греха ради:

⁵³и на жертву спасения юницы две, овнов пять, козлов пять, агниц единолетных пять: сей дар елисамы сына емиудова.

⁵⁴В осмый день князь сынов манассииных, гамалиил сын фадассуров:

⁵⁵дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву:

⁵⁶фимиамник един десяти златник, полн фимиама:

⁵⁷телца единаго от волов, овна единаго, агнца единаго единолетна во всесожжение:

⁵⁸и козла от коз единаго греха ради:

⁵⁹и на жертву спасения юницы две, овнов пять, козлов пять, агниц единолетных пять: сей дар гамалиила сына фадассурова.

⁶⁰В девятый день князь сынов вениаминих, авидан сын гадеонин:

⁶¹дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву:

⁶²фимиамник един десяти златник, полн фимиама:

⁶³телца единаго от волов, овна единаго, агнца единаго единолетна во всесожжение:

⁶⁴и козла от коз единаго греха ради:

⁶⁵и на жертву спасения юницы две, овнов пять, козлов пять, агниц единолетных пять: сей дар авидана, сына гадеонина.

⁶⁶В десятый день князь сынов дановых, ахиезер сын амисадаин:

⁶⁷дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву:

⁶⁸фимиамник един десяти златник, полн фимиама:

⁶⁹телца единаго от волов, овна единаго, агнца единаго единолетна во всесожжение:

⁷⁰и козла от коз единаго греха ради:

⁷¹и на жертву спасения юницы две, овнов пять, козлов пять, агниц единолетных пять: сей дар ахиезера сына амисадаина.

⁷²В первыйнадесять день князь сынов асировых, фагаиил сын ехрань:

⁷³дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву:

⁷⁴фимиамник един десяти златник, полн фимиама:

⁷⁵телца единаго от волов, овна единаго, агнца единаго единолетна во всесожжение:

⁷⁶и козла от коз единаго греха ради:

⁷⁷и на жертву спасения юницы две, овнов пять, козлов пять, агниц единолетных пять: сей дар фагаиила сына ехраня.

⁷⁸Во вторыйнадесять день князь сынов неффалимлих, ахирей сын енань:

⁷⁹дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву:

⁸⁰фимиамник един десяти златник, полн фимиама:

⁸¹телца единаго от волов, овна единаго, агнца единаго единолетна во всесожжение:

⁸²и козла от коз единаго греха ради:

⁸³и на жертву спасения юницы две, овнов пять, козлов пять, агниц единолетных пять: сей дар ахиреа сына енаня.

⁸⁴Сие обновление олтаря, в оньже день помаза его, от князей сынов израилевых, блюд сребряных дванадесять, чаш сребряных дванадесять, фимиамников златых дванадесять:

⁸⁵по святу и тридесяти сикль в коемждо блюде, и по седмидесяти сикль чаша едина: всего сребра в сосудех две тысящы четыреста сиклев, по сиклю святому:

⁸⁶фимиамников златых дванадесять полных фимиама, по десяти златник в коемждо фимиамнике, по сиклю святому: всего злата в фимиамницех сто и двадесять златник.

⁸⁷Всех говяд во всесожжение, телцов дванадесять, овнов дванадесять, агнцев единолетных дванадесять, и жертвы их и возлияния их: и козлов от коз дванадесять, греха ради:

⁸⁸всех говяд на жертву спасения, юниц двадесять четыре, овнов шестьдесят, козлов единолетных шестьдесят, агниц единолетных непорочных шестьдесят. Сие обновление олтаря, по исполненнии рук его и по помазании его.

⁸⁹Егда вхождаше моисей в скинию свидения глаголати ему, и услыша глас Господа, глаголюща к нему свыше очистилища, еже есть над ковчегом свидения между двема херувимы: и глаголаше к нему.