Read Елизаветинская Библия, 1751 Числа 8 Bible Online

Числа 8 - Елизаветинская Библия, 1751 bible

Числа 8

¹И рече Господь к моисею, глаголя:

²глаголи аарону и речеши к нему: егда поставиши светила, от страны спреди светилника да светят седмь светила.

³И сотвори тако аарон: от единыя страны спреди светилника возжже светила его, якоже повеле Господь моисею.

⁴И сие устроение светилника: слияно злато стебль его и крины его, слияно все: по образу, егоже показа Господь моисею, тако сотвори светилник.

⁵И рече Господь к моисею, глаголя:

⁶поими левиты от среды сынов израилевых, и да очистиши я:

⁷и сице да сотвориши им очищение их: покропиши на них воду очищения, и да взыдет бритва на все тело их, и исперут ризы своя, и чисти будут:

⁸и да возмут телца единаго от волов, и сего жертву муки пшеничны, спряжены с елеем, и телца единолетна от волов да возмеши греха ради:

⁹и да приведеши левиты пред скинию свидения, и собереши весь сонм сынов израилевых:

¹⁰и приведеши левиты пред Господа, и да возложат сынове израилстии руки своя на левиты:

¹¹и да отлучит аарон левиты отдание пред Господа от сынов израилевых, и да служат службы Господеви:

¹²левити же да возложат руки на главы телцев: и да сотвориши единаго от гресе и единаго во всесожжение Господу, умилостивити о них:

¹³и поставиши левиты пред Господем и пред аароном и пред сынми его, и отдаси я отдание Господу:

¹⁴и да отлучиши левиты от среды сынов израилевых, и будут мне:

¹⁵и по сих да внидут левиты делати дела скинии свидения: и да очистиши их, и отдаси я пред Господем: яко отдание отданы сии мне суть от среды сынов израилевых:

¹⁶вместо отверзающих всяка ложесна первенцев всех от сынов израилевых, приях я себе:

¹⁷яко мне есть всяк первенец от сынов израилевых, от человека до скота: в день в оньже поразих всякаго первенца в земли египетстей, освятих я себе,

¹⁸и взях левиты вместо всякаго первенца сынов израилевых,

¹⁹и отдах левиты отданием аарону и сыном его от среды сынов израилевых делати дела сынов израилевых в скинии свидения и умилостивляти о сынех израилевых: да не будет язва на сынех израилевых, внегда приступати им к святым.

²⁰И сотвори моисей и аарон и весь сонм сынов израилевых левитом, якоже заповеда Господь моисею о левитех, тако сотвориша им сынове израилевы.

²¹И очистишася левити и испраша ризы своя: и отдаде я аарон отдание пред Господем, и помолися о них аарон, очищения ради их.

²²И но сих внидоша левити служити службы своя в скинии свидения пред аароном и пред сыны его: якоже повеле Господь моисею о левитех, тако сотвориша им.

²³И рече Господь к моисею глаголя:

²⁴сие есть еже о левитех: от двадесяти пяти лет и вышше, да внидут служити служение в скинии свидения:

²⁵и от пятидесяти лет да отстанут от служения и не служат ктому.

²⁶И да служат братия его в скинии свидения еже стрещи стражи, дел же да не делают. Тако сотвориши левитом в стражах их.