Read Елизаветинская Библия, 1751 Михей 4 Bible Online

Михей 4 - Елизаветинская Библия, 1751 bible

Михей 4

¹И будет в последния дни явлена гора Господня, уготована над верхи гор, и вознесется выше холмов, и потщатся к ней людие,

²и приидут языцы мнози и рекут: приидите, взыдем на гору Господню и в дом Бога иаковля: и покажут нам путь его, и пойдем по стезям его: яко от сиона изыдет закон, и слово Господне из Иерусалима,

³и разсудит среде людий многих и изобличит языки крепки даже до земли дальния: и раскуют мечы своя на рала и сулицы своя на серпы, и не ктому возмет язык на язык меча, и не научатся ксему воевати.

⁴И почиет кийждо под лозою своею и кийждо под смоковницею своею, и не будет устрашающаго, зане уста Господа вседержителя глаголаша сия.

⁵Яко вси людие пойдут кийждо в путь свой, а мы пойдем во имя Господа Бога нашего в век и далечае.

⁶В той день, глаголет Господь, соберу сокрушенную, и отриновенную прииму, и ихже отринух:

⁷и положу сокрушенную во останок и отриновенную в язык крепок, и воцарится Господь над ними в горе сионе отныне и до века.

⁸И ты, столпе паствы мгляный, дщи сионя, к тебе приидет и внидет власть первая, царство из вавилона дщери Иерусалимли.

⁹И ныне вскую познала еси зло? не бе ли тебе царя? или совет твой погибе, яко обыдоша тя болезни, аки раждающия?

¹⁰Болезнуй и мужайся и приближайся, дщи сионя, яко раждающая: зане ныне изыдеши из града и вселишися на поли и дойдеши вавилона: оттуду изимет тя и оттуду избавит тя Господь Бог твой от руки враг твоих.

¹¹И ныне собрашася на тя языцы мнози глаголющии: порадуемся: и воззрят на сион очи наши.

¹²Сии же не разумеша помышления Господня и не домыслишася совета его, яко собра их аки снопы гуменныя.

¹³Востани и измлати их, дщи сионя, яко роги твоя положу железны и пазнокти твоя положу медяны, и истончиши люди многи, и возложиши Господеви множество их и крепость их Господеви всея земли.