Read Елизаветинская Библия, 1751 Наум 1 Bible Online

Наум 1 - Елизаветинская Библия, 1751 bible

Наум 1

¹Пророчество о ниневии: книга видения наума сына елкесеева.

²Бог ревнив и мстяй Господь, мстяй Господь с яростию, Господь мстяй сопостатом своим и потребляяй сам враги своя.

³Господь долготерпелив, и велика крепость его, и очищаяй не очистит Господь: в скончании и трусе путь его, и облацы прах ног его:

⁴запрещаяй морю и изсушаяй е и вся реки опустошаяй. Умалися васанитида и кармил, и процветающая ливана оскудеша:

⁵горы потрясошася от него, и холми поколебашася, и ужасеся земля от лица его, вселенная и вси живущии на ней.

⁶От лица гнева его кто постоит? и кто сопротивится во гневе ярости его? ярость его растаевает власти, и камение сотрошася от него.

⁷Благ Господь терпящым его в день скорбения, и знаяй боящыяся его:

⁸и в потопе пути скончание сотворит: востающыя и враги его поженет тма.

⁹Что помышляете на Господа? скончание сам сотворит, не отмстит дважды купно в скорби:

¹⁰понеже до основания своего оляденеет, и аки блющь и оплетающься снеден будет, и аки трость сухоты полна.

¹¹Из тебе изыдет помысл на Господа злый, совещаваяй сопротивная.

¹²Сия глаголет Господь: обладаяй водами многими, и сице разступятся, и слух твой не услышится ктому:

¹³и ныне сокрушу жезл его от тебе и узы твоя расторгну.

¹⁴И заповесть о тебе Господь, не разсеется от имене твоего ктому: от дому Бога твоего потреблю изваянная и слиянная положу гроб твой, яко скори (есте).

¹⁵Се, на горах ноги благовествующаго и возвещающаго мир: празднуй, иудо, праздники твоя, воздаждь обеты твоя, зане не приложат ктому еже проити сквозе тебе во обетшание: скончася и извержеся.