Read Елизаветинская Библия, 1751 Наум 3 Bible Online

Наум 3 - Елизаветинская Библия, 1751 bible

Наум 3

¹о, граде кровей, весь лживый, полн неправды! не осяжется ловитва.

²Глас бичей и глас труса колес, и коня текуща и колесницы шумящия,

³и конника душа, и блистающа меча и блистающих оружий, и множества язвеных и тяжкаго падения, и не бяше конца языком ея: и изнемогут в телесех своих от множества блужения.

⁴Блудница добра и приятна, началница волхвований, продающая языки во блужении своем и племена в чародеяниих своих.

⁵Се, аз на тя, глаголет Господь Бог вседержитель, и открыю задняя твоя к лицу твоему, и покажу языком срамоту твою и царствам безчестие твое,

⁶и возвергу на тя огнушение по нечистотам твоим, и положу тя в притчу.

⁷И будет, всяк видяй тя снидет с тебе и речет: окаянная ниневиа, кто постенет по ней? откуду взыщу утешение ей?

⁸Уготовити часть, устроити струну, уготовити часть аммону, живущая в реках, вода окрест ея, ейже начало море, и вода забрала ея:

⁹и ефиопиа крепость ея и египет, и несть конца бегству твоему: и фуд и ливиане быша помощницы ея.

¹⁰И сия в преселение пойдет пленница, и младенцы ея разбиют в началех всех путий ея, и о всех славных ея вергут жребия, и вси воеводы ея свяжутся путы.

¹¹И ты упиешися и будеши презрена, и ты сама себе взыщеши помощи от враг.

¹²Вся твердели твоя яко смоквичие стражу имущее: аще поколеблются, впадут во уста ядущаго.

¹³Се, людие твои, яко жены в тебе: врагом твоим отворяема отворятся врата земли твоея, и пояст огнь вереи твоя.

¹⁴Воду одержания восхити себе сама и утверди твердели твоя: влези в брение и поперися в плевах, утверди паче плинфа.

¹⁵Тамо пояст тя огнь, потребит тя мечь, поядят тя аки прузи, и отягчаеши аки мшица.

¹⁶Умножила еси купли твоя паче звезд небесных: мшицы устремишася и возлетеша.

¹⁷Возскочи аки пруг смесник твой, аки акрида восходящая на ограду в день студеный: солнце взыде, и отлете, и не познася место ея: люте имъ!

¹⁸Воздремашася пастуси твои, царь ассирийск успи сильныя твоя, воздвигошася людие твои на горы, и не бяше приемлющаго.

¹⁹Несть цельбы сокрушению твоему, разгореся язва твоя: вси слышащии весть твою восплещут руками о тебе: понеже на кого не найде злоба твоя всегда?