Read Елизаветинская Библия, 1751 Аввакум 2 Bible Online

Аввакум 2 - Елизаветинская Библия, 1751 bible

Аввакум 2

¹На стражи моей стану, и взыду на камень, и посмотрю еже видети, что возглаголет во мне и что отвещаю на обличение мое.

²И отвеща Господь ко мне и рече: впиши видение, и яве на дске, яко да постигнет читаяй я.

³Зане еще видение на время, и просияет в конец, а не вотще: аще умедлит, потерпи ему, яко идый приидет и не умедлит.

⁴Аще усумнится, не благоволит душа моя в нем: праведник же (мой) от веры жив будет.

⁵Презорливый же и обидливый муж и величавый ничесоже скончает: иже разшири аки ад душу свою, и сей яко смерть ненасыщен: и соберет к себе вся языки и приимет к себе вся люди.

⁶Не сия ли вся на него притчу приимут и гадание в повесть его? и рекут: горе умножающему себе не сущая его, доколе? и отягчающему узу свою тяжце.

⁷Яко внезапу востанут угрызающии его, и ободрятся наветницы твои, и будеши в разграбление им.

⁸Понеже ты пленил еси страны многи, пленят тя вси оставшии людие крове ради человечи и нечестия земли и града и всех живущих на ней.

⁹Горе лихоимствующым лихоимство злое дому своему, еже учинити на высоте гнездо свое, еже исторгнути от руки злых.

¹⁰Умыслил еси стыдение дому своему, скончал еси люди многи, и согреши душа твоя.

¹¹Зане камень из стены возопиет, и хрущь от древа возглаголет сия:

¹²у, люте созидающему град кровьми и уготовляющему град неправдами.

¹³Не сия ли суть от Господа вседержителя? и оскудеша людие мнози огнем, и языцы мнози изнемогоша:

¹⁴яко наполнится вся земля ведения славы Господни, якоже вода многа в мори покрыет я.

¹⁵Горе напаяющему подруга своего развращением мутным, и упоявающему, яко да взирает к пещерам их.

¹⁶Сытость безчестия от славы испий и ты: сердце, поколеблися и сотряснися: обыде о тебе чаша десницы Господни, и собрася безчестие на главу твою.

¹⁷Занеже нечестие ливаново покрыет тя, и страсть зверей престрашит тя, крове ради человечи и нечестия земли и града и всех живущих на ней.

¹⁸Что пользует изваяное, яко изваяша е? создаша слияние, мечтание ложное, яко упова создавый на создание свое, сотворити кумиры немыя.

¹⁹У, люте глаголющему ко древу: ободрися, востани: и камению: возвысися: и то есть мечтание, и сие есть скование злата и сребра, и всякаго духа несть в нем.

²⁰Господь же во храме святем своем: да убоится от лица его вся земля.