Read Елизаветинская Библия, 1751 Аввакум 3 Bible Online

Аввакум 3 - Елизаветинская Библия, 1751 bible

Аввакум 3

¹Молитва аввакума пророка с песнию. Господи, услышах слух твой и убояхся:

²Господи, разумех дела твоя и ужасохся: посреде двою животну познан будеши: внегда приближитися летом, познаешися: внегда приити времени, явишися: внегда смутитися души моей во гневе, милость (твою) помянеши.

³Бог от юга приидет, и святый из горы приосененныя чащи: покры небеса добродетель его, и хваления его исполнь земля.

⁴И сияние его яко свет будет: рози в руках его, и положи любовь державну крепости своея.

⁵Пред лицем его предидет слово, и изыдет на поле при ногу его.

⁶Ста, и подвижеся земля: призре, и растаяша языцы: стрышася горы нуждею, и растаяша холми вечнии, шествия вечная его,

⁷за труд видеша селения ефиопская, убоятся и кровы земли мадиамския.

⁸Еда в реках прогневаешися, Господи? еда в реках ярость твоя? или в мори устремление твое? яко всядеши на кони твоя, и яждение твое спасение.

⁹Наляцая налячеши лук твой на скиптры, глаголет Господь: реками разсядется земля.

¹⁰Узрят тя и поболят людие, расточая воды шествия его: даде бездна глас свой, высота привидения своя:

¹¹воздвижеся солнце, и луна ста в чине своем: во свете стрелы твоя пойдут, в блистании молний оружий твоих.

¹²Прещением умалиши землю и яростию низложиши языки.

¹³Изшел еси во спасение людий твоих, спасти помазанныя твоя, вложил еси во главы беззаконных смерть, воздвигл еси узы даже до выи в конец:

¹⁴разсекл еси во изступлении главы сильных, сотрясутся в ней: разверзут узды своя яко снедаяй нищий тай.

¹⁵И навел еси на море кони твоя, смущающыя воды многи.

¹⁶Сохранихся, и убояся сердце мое от гласа молитвы устен моих, и вниде трепет в кости моя, и во мне смятеся крепость моя: почию в день скорби моея, да взыду в люди пришелствия моего.

¹⁷Зане смоковь не плодопринесет, и не будет рода в лозах: солжет дело маслинное, и поля не сотворят яди: оскудеша овцы от пищи, и не будет волов при яслех.

¹⁸Аз же о Господе возрадуюся, возвеселюся о Бозе спасе моем.

¹⁹Господь Бог мой сила моя, и учинит нозе мои на совершение, и на высокая возводит мя, еже победити ми в песни его.