Read Елизаветинская Библия, 1751 Захария 11 Bible Online

Захария 11 - Елизаветинская Библия, 1751 bible

Захария 11

¹Разверзи, ливане, двери твоя, и да пояст огнь кедры твоя:

²да плачевопльствит питис, зане паде кедр, яко вельможи вельми обеднеша. Восплачевопльствите, дуби васанитидстии, яко посечеся дубрава насажденная.

³Глас плачущих пастырей, яко возбедствова величие их: глас рыкающих львов, яко озлоблено бысть шатание иорданово.

⁴Сице глаголет Господь вседержитель: пасите овцы заколения,

⁵яже стяжавшии закалаху и не раскаявахуся, и продающии я глаголаху: благословен Господь, и обогатихомся: и пастырие их не печахуся ни чимже о них.

⁶Сего ради не пощажду ктому на живущих на земли, глаголет Господь: и се, аз предам человеки, коегождо в руце искреннему его и в руце царю своему: и изсекут землю, и не имам изяти от руки их.

⁷И упасу овцы заколения в земли ханаани: и прииму себе два жезла, единаго нарекох доброту, а другаго нарекох уже, и упасу овцы.

⁸И погублю три пастыри в месяц един, и отягчает душа моя на ня: ибо души их рыкаху на мя.

⁹И рех: не имам пасти вас: умирающее да умрет, и изчезающее да изчезнет, и прочая да пояст кийждо плоть ближняго своего.

¹⁰И прииму жезл мой добрый и отвергу его еже разорити завет мой, егоже завещах ко всем людем:

¹¹и разорится в день оный, и уразумеют хананее овцы хранимыя мне, зане слово Господне есть.

¹²И реку к ним: аще добро пред вами есть, дадите мзду мою, или отрецытеся. И поставиша мзду мою тридесять сребреник.

¹³И рече Господь ко мне: вложи я в горнило и смотри, аще искушено есть, имже образом искушен бых о них. И приях тридесять сребреник и вложих их в храм Господень в горнило.

¹⁴И отвергох жезл вторый уже, еже разорити завет иже посреде иуды и посреде израиля.

¹⁵И рече Господь ко мне: еще приими себе сосуды пастырски, пастыря неискусна:

¹⁶зане, се, аз воздвигну пастыря на землю: погибающаго не посетит и расточеннаго не имать взыскати, и сокрушеннаго не имать изцелити и здраваго не имать направити, и мяса избранных пояст и глезны их извиет.

¹⁷о, пасущии суетная и оставльшии овецъ! мечь на мышцу его и на око ему десное: мышца его изсыхающи изсхнет, и око ему десное ослепая ослепнет.