Read Елизаветинская Библия, 1751 Захария 14 Bible Online

Захария 14 - Елизаветинская Библия, 1751 bible

Захария 14

¹Се, дние Господни грядут, и разделятся корысти твоя в тебе:

²и соберу вся языки на Иерусалим в брань, и пленится град, и расхитятся домове, и жены осквернятся: и изыдет пол града в пленение, а останок людий моих не потребятся от града.

³И изыдет Господь и ополчится на языки оны, якоже день ополчения его в день брани.

⁴И станут нозе его в день он на горе елеонстей, яже есть прямо Иерусалиму на восток: и разделится гора елеонская, пол ея к востоком и пол ея к морю, пропасть велия зело: и уклонится пол горы на север и пол ея на юг:

⁵и засыплется дебрь гор моих, и прильпнет дебрь горняя даже до асаила и наполнится, якоже наполнися от лица труса во днех озии царя иудова: и приидет Господь Бог мой, и вси святии с ним.

⁶И будет в день он, не будет свет, но зима и мраз:

⁷и будет день един, и день той знаемь будет Господеви, и не день и не нощь, и при вечере будет свет.

⁸И в день он изыдет вода жива из Иерусалима, пол ея в море первое и пол ея в море последнее: и в жатву и в весну будет тако.

⁹И будет Господь в Царя по всей земли: в день он будет Господь един, и имя его едино,

¹⁰обходя всю землю и пустыню, от гаваи и до реммона, на юг Иерусалиму: и вознесется на месте и пребудет от врат вениаминих до места врат первых, даже до врат уголных и до столпа анамеиля и до подточилия царева.

¹¹И вселятся в нем, и анафема не будет ктому, и вселится Иерусалим надеяйся.

¹²И сие будет падение, имже изсечет Господь вся люди, елицы воеваша на Иерусалим: истают плоти их стоящих на ногах своих, и очеса им истекут из обочий их, и язык их истает во устех их.

¹³И будет в день он ужас Господень велий на них: и имутся кийждо за руку ближняго своего, и соплетется рука его к руце ближняго своего.

¹⁴И иуда ополчится во Иерусалиме и соберет крепость всех людий окрест, злато и сребро и ризы во множество зело.

¹⁵И сие будет падение конем и мском, и велблюдом и ослом, и всем скотом сущым в полцех онех, по падению сему.

¹⁶И будет, елицы аще останутся от всех язык пришедших на Иерусалим, и взыдут на всякое лето покланятися Царю Господу вседержителю и праздновати праздник скинопигии.

¹⁷И будет, елицы аще не взыдут от всех племен земли во Иерусалим поклонитися Царю Господу вседержителю, и сии онем приложатся, не будет на них дождя.

¹⁸Аще же колено египетское не взыдет, ни приидет, и на сих будет язва, еюже поразит Господь вся языки, елицы аще не взыдут, еже праздновати праздник скинопигии.

¹⁹Сей будет грех египту и грех всем языком, елицы аще не взыдут, еже праздновати праздник скинопигии.

²⁰В день он будет еже во узде коня, свято Господу вседержителю: и будут коноби в дому Господни яко чашы пред лицем олтаря,

²¹и будет всяк коноб во Иерусалиме и во иуде свят Господеви вседержителю: и приидут вси жрущии и приимут от них и сварят в них, и не будет хананей ктому во храме Господа вседержителя в день он.