Read Елизаветинская Библия, 1751 Захария 3 Bible Online

Захария 3 - Елизаветинская Библия, 1751 bible

Захария 3

¹И показа ми Господь иисуса, иереа великаго, стояща пред лицем ангела Господня, и диавол стояше одесную его, еже противитися ему.

²И рече Господь ко диаволу: да запретит Господь тебе, диаволе, и да запретит Господь тебе, избравый Иерусалима: не се ли, сие яко главня исторжена из огня?

³Иисус же бе оболчен в ризы гнусны и стояше пред лицем ангела.

⁴И отвеща и рече к стоящым пред лицем его глаголя: отимите ризы гнусныя от него. И рече к нему: се, отях от тебе беззакония твоя и грехи твоя очищу, и облецыте его в подир

⁵и возложите кидар чист на главу его. И возложиша кидар чист на главу его и облекоша его в ризы. И ангел Господень стояше,

⁶и засвидетелствоваше ангел Господень ко иисусу глаголя:

⁷сице глаголет Господь вседержитель: аще в путех моих пойдеши и повеления моя сохраниши, и ты разсудиши храм мой: и аще сохраниши двор мой, и дам ти сообращающыяся посреде стоящих сих.

⁸Послушай убо, иисусе, иерею великий, ты и искреннии твои седящии пред лицем твоим, зане мужие дивозрителие суть: зане, се, аз ввожду раба моего востока:

⁹зане камень, егоже дах пред лицем иисусовым, на камени единем седмь очес суть: се, аз изрыю ров, глаголет Господь вседержитель, и осяжу всю обиду земли оныя в день един.

¹⁰В день оный, глаголет Господь вседержитель, созовете кийждо искренняго своего под виноград и под смоковницу.