Read Елизаветинская Библия, 1751 Малахия 2 Bible Online

Малахия 2 - Елизаветинская Библия, 1751 bible

Малахия 2

¹И ныне заповедь сия к вам, священницы:

²аще не услышите и аще не положите на сердцах ваших, еже дати славу имени моему, глаголет Господь вседержитель, то послю на вы клятву и проклену благословение ваше и оклену е: и разорю благословение ваше, и не будет в вас, зане вы не влагаете в сердца ваша.

³Се, аз отлучу вам рамо, и раскидаю требухи на лица ваша, требухи праздников ваших, и прииму вы вкупе:

⁴и уразумеете, яко аз Господь послах к вам заповедь сию, еже быти завету моему к левитом, глаголет Господь вседержитель.

⁵Завет мой бе с ним жизни и мира, и дах ему боязнию боятися мене и от лица имене моего устрашатися ему.

⁶Закон истины бе во устех его, и неправда не обретеся во устнах его: в мире исправляяй иде со мною и многи обрати от неправды.

⁷Понеже устне иереовы сохранят разум, и закона взыщут от уст его: яко ангел Господа вседержителя есть.

⁸Вы же уклонистеся от пути и изнемоществисте многих в законе, растлисте завет левиин, глаголет Господь вседержитель.

⁹И аз дах вы уничижены и отвержены во вся языки, зане вы не сохранисте путий моих, но лиц обинустеся в законе.

¹⁰Не Отец ли един всем вам? не Бог ли един созда вас? что яко остависте кийждо брата своего, осквернити завет отец ваших?

¹¹Оставлен бысть иуда, и мерзость бысть во израили и во Иерусалиме: зане оскверни иуда святая Господня, яже возлюби, и прейде к богом чуждим.

¹²Потребит Господь человека творящаго сия, дондеже смирится от селений иаковлих и от приносящих жертву Господу вседержителю.

¹³И сия, яже ненавидех, твористе: покрывасте слезами олтарь Господень, и плачем и воздыханием от трудов: еще ли достойно призрети на жертву (вашу), или прияти приятно из рук ваших?

¹⁴И ресте: чесо ради? Яко Господь засвидетелствова между тобою и между женою юности твоея, юже оставил еси, и та общница твоя и жена завета твоего:

¹⁵и не добро ли сотвори, и останок духа его? И ресте: что ино кроме семене ищет Бог? И сохраните духом вашим и жены юности твоея да не оставиши:

¹⁶но аще возненавидев отпустиши ю, глаголет Господь Бог израилев, и покрыет нечестие помышления твоя, глаголет Господь вседержитель: и сохраните духом вашим и не оставите.

¹⁷Прогневляющии Бога словесы вашими, и ресте: о чесом прогневахом его? Зане ресте: всяк творяй зло добр пред Господем, и в них сам благоволи: и где есть Бог правды?