Read Елизаветинская Библия, 1751 1 Маккавеев 1 Bible Online

1 Маккавеев 1 - Елизаветинская Библия, 1751 bible

1 Маккавеев 1

¹И бысть, егда поражаше александр македонский сын филиппа, иже изыде от земли хеттиим, порази и дариа царя персскаго и мидскаго, и воцарися вместо его первый во елладе,

²и состави брани многи, и одержа твердыни многи, и уби цари земския,

³и пройде даже до краев земли, и взя корысти многих языков. и умолче земля пред ним. и возвысися, и вознесеся сердце его.

⁴И собра силу крепку зело, и началствова над странами и языки и мучительми, и быша ему в данники.

⁵И по сих паде на ложе и позна, яко умирает:

⁶и созва отроки своя благородныя, иже с ним бяху совоспитани от юности его, и раздели им царство свое еще жив сый.

⁷И царствова александр лет дванадесять и умре.

⁸И обладаша отроцы его кийждо в месте своем.

⁹И возложиша вси диадимы по смерти его, и сынове их по них лета многа, и умножиша злая на земли.

¹⁰И изыде от них корень греха антиох епифан, сын антиоха царя, иже бе залогом в риме: и царствова в лете сто тридесять седмем царства еллинскаго.

¹¹Во днех тех изыдоша от израиля сынове беззаконнии и наустиша многих глаголюще: пойдем и завещаем завет с языки, иже окрест нас, яко отнележе отлучихомся от них, обретоша нас многа злая.

¹²И благоувидеся слово во очию их:

¹³и предизбрашася нецыи от людий и идоша ко царю: и даде им власть творити оправдания языческая.

¹⁴И создаша (себе) училище во Иерусалиме по законом языческим.

¹⁵И сотвориша себе необрезание, и отступиша от завета святаго, и сопрягошася языком, и продашася еже творити лукавое.

¹⁶И уготовася царство пред антиохом: и умысли царствовати во египте, яко да царствует над двема царствома.

¹⁷И вниде во египет в народе тяжце, на колесницах и на слонех, и на всадниках и на кораблех многих.

¹⁸И состави брань на птоломеа царя египетскаго: и убояся птоломей от лица его и побеже, и падоша язвени мнози.

¹⁹И взяша грады тверды в земли египетстей: и взя корысти земли египетския.

²⁰И обратися антиох, повнегда порази египта во сто четыредесять третие лето: и взыде на израиля и на Иерусалим в народе тяжце,

²¹и вниде во святилище с гордынею, и взя олтарь златый и светилник свещный и вся сосуды его,

²²и трапезу предложения и возлиялники, и фиалы и кадилницы златыя, и катапетасму и венцы и украшение златое, еже на лицы церкви (бяше), и сокруши вся:

²³и взя сребро и злато и сосуды вожделенныя: и взя сокровища тайная, ихже обрете.

²⁴И взем вся отиде в землю свою, и сотвори убийство, и глагола в гордости велицей.

²⁵И бысть плачь велик во израили на всяцем месте их.

²⁶И возстенаша началницы и старейшины, девы и юноши изнемогоша, и красота женская изменися.

²⁷Всяк жених прия плачь, и седящая на одре брачне бысть в печали.

²⁸И потрясеся земля на обитающих на ней, и весь дом иаковль облечеся студом.

²⁹И по двою лету дний посла царь началника данем во грады иудины. и прииде во Иерусалим с народом великим

³⁰и глагола к ним словеса мирная во льсти. и вероваша ему. и нападе на град внезапу и порази его язвою великою и погуби люди многи от израиля:

³¹и взя корысти града и сожже его огнем, и разори домы его и стены его окрест:

³²и плениша жен и чад, и скоты разделиша,

³³и оградиша град давидов стеною великою и крепкою и башнями крепкими, и бысть им в крепость:

³⁴и посадиша тамо людий грешников, мужей беззаконных, и возмогоша в ней:

³⁵и положиша оружия и брашна, и собираху корысти Иерусалимския, и полагаху тамо: и быша в сеть велику,

³⁶и бысть в ловителство святыни и в диавола лукаваго израилю выну.

³⁷И пролияша кровь неповинную окрест святилища и оскверниша святыню.

³⁸И бежаша обитающии во Иерусалиме их ради, и бысть обитание чуждим: и бысть чуждо семени рождения своего, и чада его оставиша его.

³⁹святыня его разорена яко пустыня, праздницы его обращени суть во плачь, субботы его в поношение, честь его во уничижение:

⁴⁰по славе его умножися безчестие его, и высота его обращена бысть во плачь.

⁴¹И писа царь антиох всему царству своему, да будут вси людие едино,

⁴²и оставит кийждо закон свой. и соизволиша вси языцы по слову царя (антиоха).

⁴³И мнози от израиля изволиша служению его и пожроша идолом и оскверниша субботу.

⁴⁴И посла царь книги рукою вестников во Иерусалим и во грады иудины, да пойдут вслед законов чуждих земли

⁴⁵и возбранят всесожжения и жертву и возлияние от святыни, и омерзят субботы и праздники,

⁴⁶и осквернят святыню и святых,

⁴⁷и созиждут требища и капища и кумирницы, и да жрут мяса свиная и скоты общыя:

⁴⁸и да оставят сыны своя необрезаны, еже осквернити душы их во всяцей нечистоте и осквернении,

⁴⁹яко да забудут закон и изменят вся оправдания (Божия).

⁵⁰И иже аще не сотворит по глаголу цареву, да умрет.

⁵¹По всем словесем сим написа всему царству своему и пристави надзиратели над всеми людьми: и повеле градом иудиным жрети во всяцем граде.

⁵²И собрашася мнози от людий к ним, всяк оставивый закон Господень: и сотвориша лукавая на земли

⁵³и положиша израиля в тайных во всяцем убежищи их.

⁵⁴И в пятыйнадесять день месяца хаслева, в лето сто четыредесять пятое создаша мерзость запустения на олтари (Божии), и во градех иудиных окрест создаша требища.

⁵⁵И пред дверьми домов и на стогнах кадяху,

⁵⁶и книги закона (Божия), ихже обретоша, сожгоша огнем, раздирающе (их).

⁵⁷И идеже обреташеся у кого книга завета Господня, и аще кто соизволяше закону Господню, по повелению цареву закалаху его.

⁵⁸В силе своей творяху сице людем израилевым, обретающымся во всяцем месяце и месяце во градех.

⁵⁹И в двадесять пятый день месяца жряху в капищи, еже бе на олтари.

⁶⁰И жен обрезавших чада своя закалаша по повелению (цареву),

⁶¹и обешаху детища за шии их, домы их расхищаху, и обрезавших я умерщвляху.

⁶²И мнози от людий израилевых удержашася и утвердишася в себе, еже не ясти скверных,

⁶³и избраша паче умрети, неже осквернитися брашны, и не хотеша преступити закона Божия святаго: и заклани быша.

⁶⁴И бысть гнев велий на израиля зело.