Read Елизаветинская Библия, 1751 1 Маккавеев 10 Bible Online

1 Маккавеев 10 - Елизаветинская Библия, 1751 bible

1 Маккавеев 10

¹И в лето сто шестьдесятое взыде александр сын антиохов епифан и одержа птолемаиду: и прияша его, и царствова тамо.

²И слыша димитрий царь, и собра воев много зело, и изыде противу ему на брань.

³И посла димитрий ко ионафану епистолии словесы мирными, величая его.

⁴Рече бо: предварим сотворити мир с ним, прежде неже сотворит со александром противу нас:

⁵воспомянет бо вся злая, яже сотворихом на него и на братию его и на язык его.

⁶И даде ему власть собирати воины и уготовляти оружия, и быти ему другом его, и залог, иже бе в краеградии, повеле отдати ему.

⁷И прииде ионафан во Иерусалим и прочте епистолии во услышание всем людем и иже от краеградия.

⁸И устрашишася страхом велиим, егда услышаша, яко даде ему царь власть собирати воины.

⁹И предаша иже от краеградия ионафану залог, и отдаде их родителем их.

¹⁰И обита ионафан во Иерусалиме, и нача созидати и обновляти град,

¹¹и рече ко творящым дела созидати стены и гору сион окрест от камений четвероуголных ко утверждению, и сотвориша сице.

¹²И побегоша иноплеменницы, иже бяху в твердынех, яже созда вакхид:

¹³и остави кийждо место свое и отиде в землю свою.

¹⁴Обаче в вефсуре осташася нецыи от оставльших закон и заповеди (Божия): бе бо им убежище.

¹⁵И слыша александр царь обещания, елика посла димитрий ионафану, и поведаша ему брани и мужества, яже сотвори той и братия его, и труды, яже имеху.

¹⁶И рече: еда обрящем коего мужа такова? и ныне сотворим его в друга и споборника нашего.

¹⁷И написа епистолии и посла ему по словесем сим, глаголя:

¹⁸царь александр брату ионафану радоватися:

¹⁹слышахом о тебе, яко муж силен еси крепостию и угоден еси быти нам друг:

²⁰и ныне поставихом тя днесь архиереа языка твоего, и еже другом царевым нарицатися (и посла ему порфиру и венец злат), и мудрствовати таяжде с нами и снабдевати дружбу к нам.

²¹И облечеся ионафан во святую ризу седмаго месяца лета сто шестьдесятаго, в день праздника сенопотчения, и собра силы и уготова оружия многа.

²²И слыша димитрий словеса сия, и опечалися зело, и рече:

²³что сие сотворихом, яко предвари нас александр составити дружбу со иудеи во утверждение?

²⁴напишу и аз им словеса просителная и возвышения и дары, яко да будут со мною в помощь.

²⁵И написа им по словесем сим: царь димитрий языку иудейскому радоватися:

²⁶понеже сохранисте заветы к нам и пребывасте в дружбе нашей и не приступисте ко врагом нашым, слышахом и радовахомся:

²⁷и ныне пребывайте еще сохранити к нам веру, и воздадим вам благая, ихже ради творите с нами,

²⁸и оставим вам дани многи, и дадим вам дары:

²⁹и ныне свободных творю вас и оставляю всем иудеом дани и цену от соли и от венцев:

³⁰и еже вместо третины семене и вместо половины плода древеснаго надлежащаго ми взяти, оставляю от днесь и потом, еже не взимати от земли иудины и от триех стран прилежащих ей, от самарии и галилеи, и от днешняго дне и в вечное время:

³¹и Иерусалим да будет свят и свободен со пределы своими, и десятины и дани:

³²оставляю и власть краеградия еже во Иерусалиме, и даю архиерею, да поставит в нем мужы, ихже аще изберет сам, хранити его:

³³и всяку душу иудейскую, яже пленена есть от земли иудины, во всем царстве моем оставляю свободну туне, и вси да оставятся от даней и скотов своих:

³⁴и вси праздницы и субботы и новомесячия и дние вчиненнии, и три дни прежде праздника и три дни по празднице, да будут вси дние свободы и оставления всем иудеом сущым во царствии моем:

³⁵и никто имети будет власти делати и стужати кому от них о всяцей вещи:

³⁶и да напишутся от иудей в воины царския до тридесяти тысящ мужей, и да дадутся им оброцы, якоже подобает всем воем царским:

³⁷и да поставятся от них в твердынех царских велиих, и от сих поставятся на потребы царства сущыя в верность: и сущии над ними и началницы да будут от них, и да ходят в законех своих, якоже повеле царь в земли иудине:

³⁸и три пределы, прилежащии иудеи от страны самарийския, да приложатся ко иудеи, да вменятся быти под единым, еже не послушати иныя власти, но токмо архиереа:

³⁹птолемаиду и пределы ея дах в дар святым, сущым во Иерусалиме, на приличное иждивение святым,

⁴⁰и аз дам на коеждо лето пятьнадесять тысящ сикль сребра от сокровищ царских от мест прилежащих:

⁴¹и всякое излишнее, еже не воздаша от потреб, якоже в первых летех, отныне дадут в дела храму:

⁴²и свыше сих пять тысящ сиклей сребра, ихже взимаху от потреб святилища, якоже в прежних летех от собрания на всякое лето, и сия оставляются, понеже надлежат сия жерцем служащым:

⁴³и елицы аще прибегнут к церкви сущей во Иерусалимех и во всех пределех его, одолжени суще царскими и всякою вещию, да отрешаются, и вся елика суть им во царствии моем:

⁴⁴и созидати и обновляти дела святых, и иждивение дастся от сокровища царскаго:

⁴⁵и еже созидати стены Иерусалима и утвердити окрест, и иждивение дастся от собрания царска, и еже создати стены во иудеи.

⁴⁶Егда же услыша ионафан и людие словеса сия, не вероваша им, ниже прияша, яко помянуша злобу велию, юже сотвори во израили, и оскорби их зело.

⁴⁷И благоволиша о александре, яко сей бысть им началник словес мирных, и споборяху ему во вся дни.

⁴⁸И собра царь александр силу велию и ополчися противу димитриа.

⁴⁹И сотвориша брань два царя, и побеже полк димитриев, и гна его александр и укрепися на них.

⁵⁰И превозможе брань зело, дондеже зайде солнце, и паде димитрий в день он.

⁵¹И посла александр ко птоломею царю египетскому послы по словесем сим, рекий:

⁵²понеже возвратихся в землю царства моего, и седох на престоле отец моих, и одержах началство, и сокруших димитриа, и возобладах страною нашею,

⁵³и составих противу его рать, и сокрушися той и ополчение его от нас, и седохом на престоле царства его:

⁵⁴и ныне составим между нами дружбу, и ныне даждь мне дщерь твою в жену, и буду зять твой, и дам тебе дары, и ей достойная тебе.

⁵⁵И отвеща царь птоломей глаголя: благ день, в оньже возвратился еси в землю отец твоих и сел еси на престоле царства их:

⁵⁶и ныне сотворю ти, яже писал еси: но срящися во птолемаиде, яко да видим друг друга, и будеши ми зять, якоже рекл еси.

⁵⁷И изыде птоломей от египта сам и клеопатра дщи его, и внидоша во птолемаиду лета сто шестьдесят втораго.

⁵⁸И срете его александр царь: и даде ему клеопатру дщерь свою и сотвори брак ея во птолемаиде, якоже царие во славе велицей.

⁵⁹И написа александр царь ионафану приити во сретение ему.

⁶⁰И иде со славою во птолемаиду и срете оба царя: и даде има сребро и злато и другом их, и дары многи, и обрете благодать пред нима.

⁶¹И собрашася нань мужие губителе от израиля, мужие беззаконнии клеветати нань. и не внят им царь.

⁶²И повеле царь совлещи ионафана с риз его и облещи его в порфиру. и сотвориша тако.

⁶³И посади его царь с собою и рече началником своим: изыдите с ним на среду града и проповедите ни единому клеветати нань ни о единей вещи, и ни един ему да стужит о всяцем глаголе.

⁶⁴И бысть егда увидеша клеветницы славу его, якоже проповедаша, и облечена его порфирою, и бежаша вси.

⁶⁵И прослави его царь, и написа его в первых друзех, и постави его воеводу и участника началства.

⁶⁶И возвратися ионафан во Иерусалим с миром и веселием.

⁶⁷И в лето сто шестьдесят пятое прииде димитрий сын димитриев от крита в землю отец своих.

⁶⁸И слыша александр царь, и опечалися зело, и возвратися во антиохию.

⁶⁹И постави димитрий аполлониа сущаго от килисирии: и собра силу велию, и ополчися во иамнии, и посла ко ионафану архиерею, глаголя:

⁷⁰ты ли един возносишися на ны, аз же бых в посмех и в поношение тебе ради: и чесо ради ты властелствуеши над нами в горах?

⁷¹ныне убо, аще надеешися в силах твоих, изыди к нам на поле и искусимся ту между собою, яко со мною есть сила градов:

⁷²вопроси и научися, кто есмь? и прочии помогающии нам, и глаголют: несть вам стояния ноги пред лицем нашим, яко дващи в бег обратишася отцы твои в земли их:

⁷³и ныне не возможеши стерпети конника и силы таковыя в поли, идеже несть камене, ни стены, ни места к бежанию.

⁷⁴Егда же услыша ионафан словеса аполлониева, подвижеся мыслию, и избра десять тысящ мужей, и изыде из Иерусалима, и снидеся с ним симон брат его в помощь ему.

⁷⁵И ополчися на июппию, и заступиша ему от града, яко стража аполлониева в июппии бысть, и ратоваша ю.

⁷⁶И убоявшеся отверзоша иже из града, и облада ионафан июппиею.

⁷⁷И слыша аполлоний, и собра три тысящы конник и силу велию, и иде во азот аки путьшествуя, и абие изыде на поле, зане имеяше множество конник и надеяшеся на них.

⁷⁸И гна ионафан вслед его во азот, и сразишася полцы на рать.

⁷⁹И остави аполлоний тысящу конник созади их в тайне.

⁸⁰И позна ионафан, яко есть засада созади его. и окружиша полк его и стреляху на люди от утра даже до вечера,

⁸¹людие же стояша, якоже заповеда ионафан: и утрудишася кони их.

⁸²И приведе симон силу свою и нападе на полк: конницы бо утруждени бяху, и сокрушишася от него и побегоша,

⁸³и конницы расточишася по полю и бегоша во азот, и внидоша в вифдагон капище его, еже уцелети.

⁸⁴И пожже ионафан азот и грады иже беху окрест его, и взя корысти их и капище дагоново, и вбегших в не пожже огнем.

⁸⁵И бысть падших мечем с сожжеными яко осмь тысящ мужей.

⁸⁶И отиде оттуду ионафан и прииде во аскалон, и изыдоша от града во сретение ему в славе велицей.

⁸⁷И возвратися ионафан во Иерусалим с сущими с ним, имуще корысти многи.

⁸⁸И бысть егда услыша александр царь словеса сия, и приложи прославити ионафана:

⁸⁹и посла ему гривну златую якоже обычай есть даяти сродником царевым, и даде ему аккарон и вся пределы его во одержание.