Read Елизаветинская Библия, 1751 1 Маккавеев 13 Bible Online

1 Маккавеев 13 - Елизаветинская Библия, 1751 bible

1 Маккавеев 13

¹И слыша симон, яко собра трифон силу многу приити в землю иудину и сокрушити ю,

²и виде люди, яко суть в страсе и трепете, и взыде во Иерусалим и собра люди,

³и увеща их и рече им: вы весте, елика аз и братия моя и дом отца моего сотворихом и о законех и о святых, и брани и тесноты, ихже видехом:

⁴сего ради погибоша братия моя вси ради израиля, и остах аз един:

⁵и ныне не буди ми пощадити души моея во всяко время скорбей, не бо лучший есмь братии моея:

⁶обаче отмщу о языце моем и о святых и о женах и чадех наших: яко собрашася вси языцы сотрети нас вражды ради.

⁷И возгорешася духом людие вкупе послушати словес сих

⁸и отвещаша гласом велиим, глаголюще: ты еси вождь наш вместо иуды и ионафана брата твоего:

⁹побори брань нашу, и вся, елика аще речеши нам, сотворим.

¹⁰И собра вся мужы бранники и ускори совершити вся стены Иерусалимския и утверди его окрест:

¹¹и посла ионафана сына авессаломова и с ним силу доволную во июппию, и изгна сущих в ней и пребысть тамо в ней.

¹²И воздвижеся трифон от птолемаиды с силою велиею внити в землю иудину, и ионафан с ним в стражи.

¹³Симон же ополчися во адиде на лицы поля.

¹⁴И позна трифон, яко воста симон вместо брата своего ионафана и яко сразитися с ним хощет бранию,

¹⁵посла к нему послы глаголя: сребра ради, еже должен брат твой ионафан царю, потреб ради, ихже имеяше, содержим его:

¹⁶и ныне посли сребра талантов сто и два сына его в залог, яко да не отпущен отступит от нас, и отпустим его.

¹⁷И позна симон, яко лестию глаголют к нему, и посла сребро и отроки, да не когда вражду приимет велию от людий, глаголющих:

¹⁸яко не посла ему сребра и отроков, и погибе.

¹⁹И посла отроки и сто талант. И солга и не отпусти ионафана.

²⁰И по сих прииде трифон, да внидет во страну и сотрет ю, и обыде путь, иже ведет во адору: а симон и полк его противоидяше ему на всяко место, аможе идяше.

²¹Сущии же от краеградия послаша к трифону послов понуждающих его, да потщится приити к ним пустынею и послати им пищы.

²²И уготова трифон вся конники своя, еже приити в нощь оную. и бе снег велий зело, и не прииде снега ради: и воста и отиде в галаадитиду.

²³Егда же приближися к васкаме, уби ионафана, и погребен бысть тамо.

²⁴И возвратися трифон и иде в землю свою.

²⁵И посла симон и взя кости ионафана брата своего и погребе я в модине граде отец своих.

²⁶И плакаша его весь израиль плачем велиим и рыдаху его дни многи.

²⁷И созда симон над гробом отца своего и братий своих, и вознесе его видением, камением тесаным созади и сопреди,

²⁸и постави на них седмь пирамид, едину противу единоя, отцу и матери и четырем братиям:

²⁹и сим сотвори ограды, и обложи столпы великия, и сотвори на столпех всеюружия в память вечную, и при всеюружиих корабли изваянныя, во еже видимым быти от всех плавающих на мори.

³⁰Сей гроб, егоже сотвори в модине, даже до сего дне.

³¹Трифон же хождаше лестию со антиохом царем юным, и уби его,

³²и воцарися вместо его, и возложи на ся диадиму асийскую, и сотвори язву великую на земли.

³³И созда симон твердыни иудейския, и огради столпами высокими и стенами велиими, и вратами и заворами, и положи пищы в твердынех.

³⁴И избра симон мужы и посла ко димитрию царю, да сотворит ослабление стране, яко вся дела трифонова беша хищения.

³⁵И посла ему димитрий царь по словесем сим, и отвеща ему, и написа ему епистолию сицеву:

³⁶царь димитрий симону архиерею и другу царей и старейшинам и языку иудейску радоватися:

³⁷венец златый и перстень, яже послал еси, восприяхом, и готови есмы сотворити с вами мир велик и писати к сущым над даньми, еже оставити вам дани:

³⁸и елика уставихом вам, крепка суть, и твердыни, яже создасте, да будут вам:

³⁹отпущаем же неведения и согрешения даже до днешняго дне, и венец, егоже должни бысте, и аще кая иная дань бе во Иерусалиме, ктому да не будут даваемая:

⁴⁰и аще нецыи угодни от вас вписатися к нашым, да впишутся, и да будет между нами мир.

⁴¹Лета сто седмьдесятаго отято бысть иго языческое от израиля,

⁴²и начаша людие израилевы писати в писаниих и в совещаниих: лета перваго при симоне архиереи велицем и воине и вожди иудейстем.

⁴³Во днех онех прииде симон в газу и окружи ю полками, и сотвори миханы и приближися ко граду, и изби столп един и взя.

⁴⁴И вскачаху во град иже бяху в михане, и бысть смятение велие в граде.

⁴⁵И взыдоша иже беху во граде с женами и чады на стену, растерзаны имуще ризы своя, и возопиша гласом велиим, моляще симона десницу им дати,

⁴⁶и рекоша: не сотвори нам по лукавством нашым, но по милости твоей.

⁴⁷И умилостивися им симон, не воева их, и изгна их от града: и очисти домы, в нихже бяху идоли, и тако вниде в онь с песньми благословя Господа:

⁴⁸и изверже из него всякую нечистоту, и всели в нем мужы, иже закон творят, и утверди его, и сотвори себе в нем обитание.

⁴⁹Сущым же от краеградия во Иерусалиме возбраняшеся исходити и входити во страну, и куповати и продавати: и взалкаша зело, и мнози от них гладом погибоша.

⁵⁰И возопиша к симону десницу прияти, и даде им, и изгна их оттуду и очисти краеградие от осквернений.

⁵¹И вниде в не в двадесять третий день втораго месяца, лета сто седмьдесят перваго с хвалением и ваиями, и в гуслех и кимвалех и сопелех, и в песнех и пениих, яко сокрушися враг велий от израиля.

⁵²И устави на всякое лето провождати день той с веселием, и утверди гору святилища, яже близ краеградия, и вселися ту сам и иже с ним.

⁵³И виде симон иоанна сына своего, яко муж есть, и постави его вожда сил всех, и вселися в газарех.