Read Елизаветинская Библия, 1751 1 Маккавеев 15 Bible Online

1 Маккавеев 15 - Елизаветинская Библия, 1751 bible

1 Маккавеев 15

¹И посла царь антиох сын димитриа царя послания от островов морских симону архиерею и началнику языка иудейска и всему языку.

²И бяху содержаще образ сей: царь антиох симону жерцу великому и языка началнику и языку иудейскому радоватися:

³понеже мужие губителе одержаша царствия отец наших, хощу же снабдети царство, да устрою е якоже бе прежде, и от стран собрах множество сил и сотворих корабли воинския,

⁴хощу же изыти во страну, да отмщу растлившым страну нашу и опустошившым грады многи в царствии (моем),

⁵ныне убо утверждаю тебе вся оставления даней, яже оставиша тебе бывшии прежде мене царие, и елики ины дары оставиша тебе,

⁶и попустих тебе творити кование особых пенязей во стране твоей,

⁷Иерусалиму же и святынем быти свободным: и вся оружия, елика уготовал еси, и твердыни, ихже создал еси, ихже держиши, да будут тебе:

⁸и весь долг царев, и яже подобают цареви, отныне и во все время да оставятся тебе:

⁹егда же одержим царство наше, прославим тебе и люди твоя и святилище славою великою, яко да явленна будет слава ваша по всей земли.

¹⁰Лета сто седмьдесят четвертаго изыде антиох в землю отец своих, и собрашася к нему вси вои, яко малым быти оставшым со трифоном.

¹¹И гнаше его антиох царь, и прииде бежащь в дору, яже при мори:

¹²ведяше бо, яко собрашася злая нань и оставиша его воини.

¹³И ополчися антиох на дору, и с ним дванадесять тем мужей бранных и осмь тысящ конников:

¹⁴и обступи град, и корабли от моря приидоша, и оскорбляше град от земли и моря, и не остави ни единаго изыти и внити.

¹⁵Прииде же нуминий и иже с ним от рима, имуще послание царем и странам, в нихже написана сия:

¹⁶левкий ипат римский птоломею царю радоватися:

¹⁷послы иудейстии приидоша к нам друзи наши и споборницы, обновляюще прежнюю дружбу и споборение, послани от симона архиереа и людий иудейских,

¹⁸принесоша же и щит златый мнас тысящи:

¹⁹угодно убо бысть нам писати ко царем и странам, да не наносят им зол и да не ратуют их, ни градов их, ни страны их, и да не споборают ратующым противу их:

²⁰и изволися нам прияти от них щит:

²¹аще убо нецыи губителе пребежаша от страны их к вам, предайте их симону архиерею, да отмстит им по закону своему.

²²Таяжде написа димитрию царю и атталу, и ариарафу и арсаку,

²³и во вся страны, и сампсаку и спартиатом, и в дилон и в миндон, и в сикион и в карию, и в самон и в памфилию, и в ликию и в аликарнас, и в род и в фасилиду, и в кою и в сидину, и в арад и в гортину, и в книд и в кипр и в киринию.

²⁴Списание же их написаша симону архиерею.

²⁵Антиох же царь ополчися на дору вторицею, наводя выну на ню руки и миханы творя, и заключи трифона еже не входити ниже исходити.

²⁶И посла ему симон две тысящы мужей избранных в помощь ему и сребро и злато и сосуды многи.

²⁷И не восхоте их прияти, но отверже вся, елика завеща ему прежде, и отчуждися от него.

²⁸И посла к нему афиновиа единаго от другов своих, да побеседует с ним, глаголя: вы держите июппию и газару и краеградие еже во Иерусалиме, грады царства моего,

²⁹пределы их опустошисте, и сотвористе язву велику на земли, и господствовасте местами многими в царствии моем:

³⁰ныне убо отдадите грады, ихже взясте, и дани мест, имиже огосподствовасте вне пределов иудейских:

³¹аще же ни, дадите место сих пять сот талантов сребра, и за опустошение, имже опустошисте, и за дани градов другия пять сот талантов: аще же ни, пришедше поратуем вас.

³²И прииде афиновий друг царский во Иерусалим, и виде славу симонову, и сокровище злата и сребра, и устроение доволно, и ужасеся, и возвести ему словеса царска.

³³И отвещав симон, рече ему: ниже чуждую землю прияхом, ниже чуждая одержахом, но наследие отец наших, от враг же наших в некое время неправедно удержася:

³⁴мы же время имуще восприяхом наследие отец наших:

³⁵о июппии же и газарех, ихже просиши, сии творяху в людех язву велию в стране нашей, от сих дадим талант сто. И не отвеща ему афиновий словесе.

³⁶Возвратися же с яростию ко царю и возвести ему словеса сия и славу симонову и вся елика виде. И прогневася царь гневом велиим.

³⁷Трифон же всед к корабль, отбеже во орфосиаду.

³⁸И постави царь кендевеа воеводою приморским и силы пехотныя и конныя даде ему.

³⁹И повеле ему ополчитися противу лица иудейска, и заповеда ему создати кедрон и утвердити врата, и да ратует люди. Царь же гоняше трифона.

⁴⁰И прииде кендевей во иамнию и нача раздражати люди и входити во иудею и пленити люди и убивати: и созда кедрон

⁴¹и постави тамо конники и силы, яко да исходяще проходят пути иудейския, якоже повеле ему царь.