Read Елизаветинская Библия, 1751 1 Маккавеев 8 Bible Online

1 Маккавеев 8 - Елизаветинская Библия, 1751 bible

1 Маккавеев 8

¹И слыша иуда имя римлян, яко суть сильни крепостию, и тии благоволят о всех приложившихся к ним, и елицы приидут к ним, составляют с ними дружбу, и яко суть сильни крепостию.

²И поведаша ему брани их и мужества блага, яже творят в галатех, и яко одержаша их и приведоша их под дань:

³и колика сотвориша во стране испанийстей, еже удержати руды сребра и злата, еже тамо: и одержаша всяко место советом своим и долготерпением,

⁴и место бе далече отстоящо от них зело: и царей нашедших на них от края земли сотроша, и поразиша их язвою великою, прочии же дают им дань по вся лета:

⁵и филиппа и персеа китиейскаго царя, и воставших на них сокрушиша их в брани и одержаша их:

⁶и антиоха великаго царя асийскаго, шедшаго противу их на брань, имущаго сто двадесять слонов, конники и колесницы и силу велию зело, и сотрен бысть от них:

⁷и яша его жива, и уставиша, да дает им той и царствующии по нем дань велику, и даяти залог и уставление,

⁸и страну индийску и мидию, и лидию и от предобрых стран их, и взявше их от него даша я евмению царю:

⁹и яко совещаша сущии от еллады приити и взяти их: и уведано бысть слово тем,

¹⁰и послаша на них воеводу единаго и воеваша на них, и падоша от них язвении мнози, и плениша жен их и чад их, и разграбиша их и землю их одержаша, и разориша твердыни их и поработиша их даже до сего дне:

¹¹и прочая царства и островы, иже некогда противишася им, истребиша и поработиша их:

¹²с други же своими и примиряющимися к ним сохраняху дружбу, и одержаху царства ближняя и дальняя, и елицы слышаху имя их, бояхуся от них:

¹³елицем же аще хотят помогати и воцаряти, царствуют: и ихже аще хотят, пременяют: и вознесошася зело:

¹⁴и во всех сих не возлагаше ни един от них диадимы, ни облачашеся в порфиру, еже возвеличитися о ней:

¹⁵и советную палату сотвориша себе, и на всяк день советоваху в ней о множестве (народов) еже благоустрояти их:

¹⁶и вверяют единому человеку началство свое по лету, и господствовати всею землею их, и вси повинуются единому, и несть зависти ниже рвения в них.

¹⁷И избра иуда евполемона сына иоаннова, сына аккосова, и иасона сына елеазарова, и посла их в рим, составити с ними дружбу и споборение,

¹⁸и еже отяти от них иго их, понеже видеша царство еллинское порабощающее израиля в работу.

¹⁹И идоша в рим, путь же велий зело, и внидоша в палату советную, и отвещаша и реша:

²⁰иуда маккавей и братия его и множество иудейское послаша нас к вам составити с вами дружбу и мир и вписати нас споборниками и другами вашими.

²¹И угодно бысть слово пред ними.

²²И сие списание послания, еже восписаша на дщицах медяных и послаша во Иерусалим быти у них тамо в память мира и споборства:

²³благо да будет римляном и языку иудейску на мори и на земли в век, оружие же и врази далече да будут от них:

²⁴аще же наступит брань римляном первее или всем споборником их во всем господстве их,

²⁵споборет язык иудейский, якоже время определит им, сердцем полным:

²⁶и ратующым не дадут, ниже ссудят пшеницею, оружием, сребром, кораблями, якоже угодно римляном, и сохранят заповеди их ничтоже вземлюще:

²⁷такожде аще и языку иудейску прежде случится брань, помогут римляне от души, якоже им время определит:

²⁸и споборающым не дастся пшеница, оружие, сребро, корабли, якоже угодно римляном: и сохраняти заповеди их, и без лести.

²⁹По сим словесем уставиша римляне людем иудейским.

³⁰Аще же по словесех сих совещаются сии и онии приложити или отяти нечто, сотворят от произволения своего, и еже аще приложат или отимут, будут тверда.

³¹А о злобах, яже царь димитрий творит в них, писахом ему, глаголюще: вскую отяготил еси иго твое на други нашя споборники иудеи?

³²аще убо паки прибегнут к нам на тя, сотворим им суд и ополчимся на тя морем и землею.