Read Елизаветинская Библия, 1751 2 Маккавеев 12 Bible Online

2 Маккавеев 12 - Елизаветинская Библия, 1751 bible

2 Маккавеев 12

¹Содеянным же бывшым заветом сим, лисиа убо отиде ко царю, иудее же в земледелии упражняхуся.

²От сущих же по местом воевод, тимофей и аполлоний сын генеов, еще же иероиим и димофон, к сим же и никанор киприарх, не оставляху их благостояти и в покои быти.

³Июппиане же толико сотвориша нечестие, умоливше иудей с ними живущих внити во представленыя от них ладии с женами и чады, акибы ни единей вражде между ими настоящей:

⁴на общее же уставление градское и сим соизволившым, яко мир имети хотящым и ничтоже подозрения имущым, отвезше их погрузиша, сущх не мнее дву сот.

⁵Познав же иуда бывшую на сродники своя жестокость, возвестив мужем иже с ним и призвав праведнаго судию Бога,

⁶прииде на скверноубийц братий его, и пристанища нощию сожже, и ладии попали, избегших же от огня закла.

⁷Стране же заключене бывшей отиде, яко паки приити имущь и все июппиан искоренити гражданство.

⁸Уразумев же, яко и во амнии живущий хотят обитающым иудеом темже образом сотворити,

⁹и на иамнитян нощию напад, зажже пристанище с кораблями яко явитися зарям огня во Иерусалиме, стадиям сущым двум стам четыредесяти.

¹⁰Оттуду же отшедшым девять стадий, творящым путь на тимофеа, сразишася с ним аравлян множае пяти тысящ мужей и конник пять сот.

¹¹Бывшей же крепцей брани, и сущым при иуде помощию Божиею преуспевающым, напольнии аравляне одолени, прошаху от иуды десницы себе, обещающе и пажить дати и во прочиих пользовати их.

¹²Иуда же уразумев, яко истинно во многих они потребни, обеща мир содержати с ними: взявше же десницу, отидоша в кущы своя.

¹³Нападе же и на некий град мостами тверд и стенами огражден, иже от всяких смешеных языков обитаемый, емуже имя каспин.

¹⁴Сущии же внутри надеющеся на крепость стен и на уготовление брашен, нерадиво пребываху, проклинающе сущих при иуде, и ктому хуляще, и глаголюще, яже не подобает.

¹⁵Сущии же со иудою призвавше великаго обладателя мира, иже без овнов и механических орудий во времена иисуса разруши иерихон, нападоша зверообразно на стену.

¹⁶И вземше град Божиею волею, безчисленна заклания сотвориша, яко прилежащему езеру, в широту имущему стадии две, текущею (убиенных) кровию исполнену явитися.

¹⁷Оттуду же отшедше стадий седмь сот пятьдесят, приидоша в харак, ко глаголемым тувиином иудеом.

¹⁸И тимофеа убо на местех не достигоша, ни едино дело совершивша от мест отшедша, оставльша же стражу в некоем месте зело тверду:

¹⁹досифей же и сосипатр сущии от воевод, иже со маккавеом, изшедше погубиша от тимофеа оставших в твердыни более десяти тысящ мужей.

²⁰Маккавей же устроив воя своя по полком, постави их над полками, и на тимофеа пойде имущаго с собою сто двадесять тысящ пешец, конник же две тысящы и пять сот.

²¹Познав же тимофей пришествие иудино, посла жены и дети и прочая уготования в твердыню нарицаемую карнию: бе бо непреборима и ко всходу неудобна ради тесноты всех мест.

²²Егда же полк иудин первый явися, и бысть ужас на супостаты и страх от явления всевидящаго бывшаго на них, в бегство устремишася един от другаго бежащь, яко множицею от своих повредишася и оружии своими прободахуся.

²³Творяше же иуда гонение прилежно, убивая иноплеменников, и изби от них тридесять тысящ мужей.

²⁴Сам же тимофей впад между сущих со досифеем и сосипатром, со многим ухищрением моляше, да жив отпустится: зане многих убо (от иудей) родителей и некиих братию имеяше (у себе), и сим зло случится, аще умрет.

²⁵Егда же многими словесы вероятен сотвори обет, еже возвратити оных невредных, пустиша его ради спасения братии.

²⁶Изшед же (маккавей) на карнию и на атаргатию, уби двадесять пять тысящ.

²⁷По победе же сих и погублении обрати иуда воинство и на ефрон, град твердый, в немже живяше лисиа и множество разных язык: юноши же сильнии стояще пред стенами крепко противуратоваху, в немже беху орудия и стрел многое уготовление.

²⁸Призвавше же всесильнаго с державою сокрушающаго ратных силы, взяша град под руку и убиша сущих внутрь двадесять пять тысящ:

²⁹и отшедше оттуду устремишася на скифский град, отстоящь от Иерусалима стадий шесть сот.

³⁰Освидетелствовавшым же живущым тамо иудеом о скифских гражданех, яко имеют к ним благоприятство и во времена злополучная кротцы пребываху,

³¹благодаривше им и умоливше, дабы и в прочее к роду их благоприятни были, приидоша во Иерусалим, дню великаго праздника седмиц настоящу.

³²По глаголемей же пентикостии, идоша противу горгиа стратига идумейска.

³³Изыде же с пешцы треми тысящьми, и конник четыре ста,

³⁴и сотворшым брань, случися пасти малым от иудей.

³⁵Досифей же некто от вакинора, конный муж и крепок, ят горгию, и взем его за хламиду, ведяше его крепко, и хотящь проклятаго взяти жива, некто от фракийских конник нападе нань и рамо отсече, горгиа же избеже во марису.

³⁶Воином же горгиевым на мнозе борющымся и утружденным бывшым, призвав иуда Господа спомощника, да будет и воевода брани,

³⁷начат гласом отеческим с песньми вопль, возопив и нечаянне на воя горгиевы напад, в бегство их обрати.

³⁸Иуда же собрав воя прииде во град одоллам: и егда седмый день прмииде, по обычаю очистившеся в том месте субботу праздноваша.

³⁹На утрие же прииде со своими иуда, да, якоже подобаше, телеса падших возмет и со сродниками положит во гробех отеческих.

⁴⁰Обретоша же у коегождо от умерших под ризами убиенных от даров идолских, яже во иамнии, о нихже закон запрещаше иудеом, всем же яве бысть, яко сея ради вины тии падоша.

⁴¹Вси убо благословивше правый суд гдиень, яко тайная сотвори явлена,

⁴²к молению обратишася моливше, да сотвореный грех весьма изгладится: добльственный же иуда моляше людий, да сохранят себе от греха, очима видяще бывшая падших за грех.

⁴³И сотворив от мужей собрание утварей, яко две тысящы драхм сребра, посла во Иерусалим принести за грех (мертвых) жертву, предобре и благочестно творя, о воскресении помышляя.

⁴⁴Аще бо падшым востати не чаял бы, излишно было бы и всуе о мертвых молитися.

⁴⁵Ктому взирающь, яко во благочестии усопшым изряднейшая уготовася благодать:

⁴⁶преподобное и благочестивое помышление: отонуду же за умерших моление сотвори, яко да от греха очистятся.