Read Елизаветинская Библия, 1751 2 Маккавеев 15 Bible Online

2 Маккавеев 15 - Елизаветинская Библия, 1751 bible

2 Маккавеев 15

¹Никанор же уведав, яко иуда в местех самарийских, умысли со всем устремлением в день субботный на них напасти.

²По нужди же последующии ему иудее глаголаху: никакоже сице зверски и варварски да погубляеши, но славу воздаждь предпочтенному от всевидящаго со святынею дневи.

³Нечестивыи же вопроси: еда есть сильный на небеси, иже повеле праздновати день субботный?

⁴Онем же отвещавшым: есть Господь живый сей на небеси силен, иже повеле праздновати седмый день.

⁵Он же рече: и аз силен есмь на земли, повелеваяй взимати оружия и царския потребы исполняти. Обаче не одержа совершити окаяннаго своего совета.

⁶И никанор убо великою гордынею воздвижен умысли общую победу составити на иуду.

⁷Маккавей же всегда надеяшеся со всем упованием заступление от Господа получити

⁸и утешаше своих, да не убоятся пришествия языков, да имеют же во уме преждебывшую им от небесе помошь, и ныне да чают от вседержителя быти себе победе и помощи:

⁹и наказав их от закона и пророков, воспомянув же им преждебывшыя подвиги, усерднейших их сотвори:

¹⁰и душами воздвигнув их, увещаваше, вкупе показав им языческая льщения и клятвопреступление:

¹¹и коегождо их вооружив не тако щитов и копий утверждением, яко словес благих утешением, и сказав сон достоверен, утробы всех возвесели.

¹²Бысть же его сицево видение: онию бывшаго архиереа, мужа добраго и благаго, благоговейна видением, кротка же нравом и беседою благолепна, и от детства обучившагося всем добродетелем, сего руце воздеюща и молящася за вся люди иудейския (виде).

¹³И яко посем явися ин муж сединами и славою дивен, чудно же некое и великолепнейшее окрест его преизящество.

¹⁴Отвещав же ониа рече: сей есть братолюбец, иже много молится о людех и о святем граде, иеремиа Божий пророк.

¹⁵Простер же иеремиа десницу, даяше иуде мечь злат, дающь же возгласи сия:

¹⁶приими святый мечь дар от Бога, имже сокрушиши супостаты.

¹⁷Укрепившежеся иудиными словесы преблагими и могущими к мужеству устремити и дущы юнош исправити, умыслиша не ополчатися, но храбро напасти и со всякою доблестию сшедшымся сразитися за вещы святыя, понеже и град и святая и святилище бедствуют.

¹⁸Бе бо о женах и чадех еще же и о братии и ужиках менший им подвиг, величайший же и первый страх о освященнем храме.

¹⁹Такожде и во граде оставленным не малая печаль, мятущымся о сражении на поли хотящем быти.

²⁰И всем уже чающым имущаго быти сражения и супостатом уже смесившымся, и воинству чинно расположенну сущу и зверем в приличней стране поставленым и коннице по углам учиненней,

²¹разсуждая маккавей множества пришествие и оружия различное уготовление и свирепство зверей, простер руце на небо, призываше чудотворящаго и призирающаго Господа, ведая, яко не оружием победа, но якоже угодно ему, достойным дает одоление.

²²Рече же призывая сим образом: ты, Владыко, послал еси ангела твоего при езекии цари иудине и убил еси от воев сеннахиримовых сто осмьдесят пять тысящ:

²³и ныне, Владыко сильный на небесех, посли ангела твоего благаго пред нами в страх и трепет им:

²⁴величеством мышцы твоея да убоятся иже с хулением пришедшии на святыя люди твоя. И сей убо сице помолися.

²⁵Никанор же и иже с ним с трубами и песньми приближахуся.

²⁶Иуда же и сущии с ним в призывании и молитвах смесишася с супостаты:

²⁷и руками убо борющеся, сердцами же к Богу молящеся, постлаша не менши тридесяти пяти тысящ, явлением Божиим зело возрадовавшеся.

²⁸Преставше же от битвы и с радостию возвращающеся, познаша никанора падша со всеюружии (своими).

²⁹Бывшу же воплю и смятению, благословляху сильнаго отеческим гласом.

³⁰И повеле, иже весьма телом и душею первоподвижник за граждан, иже возраста благоприятство к своему народу сохранивый иуда, никанорову главу и руку со рамом отсещи и принести во Иерусалим.

³¹Пришед же тамо и созвав единоязычных своих и священников, пред олтарем став, призва сущих от краеградия

³²и показа им сквернаго никанора главу и руку хульникову, юже простре на храм святый вседержителев возносяся:

³³и язык нечестиваго никанора отрезав, рече, яко на раздробление птицам имать дати, и сия в возмездие безумия противу храма повеси.

³⁴Вси же на небо благословиша Господа явленаго, рекуще: благословен сохранивый место свое не осквернено.

³⁵Повеси же никанорову главу на краеградии во известное всем и явное Господни помощи знамение.

³⁶И узакониша вси общим советом никакоже оставити без празднования день сей:

³⁷имети же праздник сей в третийнадесять день вторагонадесять месяца, иже глаголется сирийским гласом адар, пред единым днем мардохеева дне.

³⁸И сия убо, яже о никаноре, имеются сице: и от тех времен одержан бысть град от еврей, и аз зде оставляю слово.

³⁹И аще убо благо и прилично сочинению, сего и сам хотех: аще же малоценно и мерно, сие по возможности моей бе.

⁴⁰Якоже бо вино особно пити, такожде и воду паки, сопротивно есть: но имже образом вино с водою смешенное сладко и веселую благодать совершает, такожде и сочинение (и украшение) слова веселит слухи чтущих историю. Зде же да будет и конец.