Read Елизаветинская Библия, 1751 2 Маккавеев 3 Bible Online

2 Маккавеев 3 - Елизаветинская Библия, 1751 bible

2 Маккавеев 3

¹Егда убо святый град обитаемь бе во всяцем мире, и законы еще изрядно храняхуся, онии архиереа благочестия ради и ненавидения лукавства,

²случашеся и самим царем почитати место и церковь великими дары прославляти,

³яко и селевк асийский царь подаяше от своих доходов вся, яже ко служением жертв надлежащая иждивения.

⁴Симон же некий от колена вениаминя настоятель церкви поставленный, пряшеся со архиереем о началстве еже во граде.

⁵Но егда премощи онии не можаше, прииде ко аполлонию фрасееву, иже во оно время бяше воевода килисирии и финикии,

⁶и возвести ему, яко богатствы неизчетными наполнено есть во Иерусалиме сокровищное хранилище, яко множеству сокровищ безчислену быти, и яко не надлежат сия к вине жертв, быти же мощно, да под власть цареву подпадут вся сия.

⁷Егда же прииде ко царю аполлоний, о возвещеиных ему богатствах изяви: он же избрав илиодора, иже бе над делами его, посла заповедав, да предреченная богатства принесет.

⁸Скоро же илиодор творяше шествие, под видом убо акибы грады килисирийския и финикийския проходя, самою же вещию царево повеление исполнити хотящь.

⁹Пришед же во Иерусалим и любомудренно от архиереа градскаго прият, поведа о бывшем изявленщ, и чесо ради прииде, сказа: вопрошаше же, аще истинно сия тако суть.

¹⁰Тогда архиерей показа положена быти сия вдов и сирот,

¹¹некая же быти и ириана сына товиина мужа зело честна, а не якоже бе оболгаяй нечестивый симон, всего же сребра талант четыреста, а злата двесте:

¹²обидети же вверивших места святыни, и честности и безопасству честныя по всему миру церкве, весьма не возможно есть.

¹³Илиодор же, царских ради повелений, ихже имяше, глаголаше, яко всячески подобает взяти сия в царское сокровище.

¹⁴Определив же день, вхождаше, присмотрение о сих хотя сотворити: бе же не мало по всему граду смятение.

¹⁵Священницы же пред олтарем в священнических ризах повергше себе, призываху с небесе давшаго закон о положенных, дабы положившым сия цело сохранил.

¹⁶Бе же зрящему лице архиереево узвлятися мыслию: зрак бо и вид изменен являше душевную тугу.

¹⁷Облия бо мужа боязнь некая и страх телесный, имиже явленна бысть зрящым сердца настоящая болезнь.

¹⁸Инии же купно из домов истекаху на всенародную молитву, зане хотяше прщти место в поругание.

¹⁹Жены же препоясавшяся по персем власяницами на путех умножахуся: заключеныя же девицы едины убо прибегаху ко вратом, иныя же на стены, некия же оконцами приницаху.

²⁰Вси же воздевающе руце на небо моляхуся.

²¹Умилително же бе множества смешеное падение и зело бедствующаго архиереа чаяние.

²²И сии убо призываху вседержителя Бога, да вверенная вверившым цела сохранит со всяким безопасством.

²³Илиодор же еже умысли, совершаше: таможе ему со копиеносцы в газофилакию уже пришедшу,

²⁴(вседержитель) отцев Господь и всякия власти обладатель явление велие сотвори, яко всем дерзнувшым совнити ужаснувшымся Божия силы, во ослабление и во ужас пременитися.

²⁵Явися бо им некий конь страшна имея всадника и предобрым покровом украшен, напад же со устремлением вонзе во илиодора предняя копыта: седяй же на нем являшеся злато оружие имея.

²⁶инии же два явистася ему юноши силою благолепни, предобри славою, украшени же одеянием: иже и обступльща его от обоих стран, бияста его непрестанно, многи налагающа ему раны.

²⁷Внезапу же (илиодора) падша на землю и многою тмою объята восхитивше и на носило положивше,

²⁸того, иже недавно со многим ристанием и со всяким дориношением в предреченную вниде газофилакию, изношаху безпомощна себе суща, явно Божию силу познавше.

²⁹И той убо Божественным действом безгласен и всякаго упования и спасения лишен повержен бяше.

³⁰Сии же Господа благословляху прославльшаго свое место: и малым прежде страха и смятения полная церковь, вседержителю явльшуся Господу, радости и веселия исполнися.

³¹Скоро же нецыи от другов илиодоровых моляху онию призвати вышняго, да живот дарует ему весьма в последнем издыханщ лежащему.

³²Помыслив же архиерей, да не когда царь мнение возимеет, яко злодейство некое на илиодора иудее сотвориша, принесе жертву о спасенщ мужа.

³³Егда же архиерей моляшеся, тиижде юноши паки явистася илиодору темижде одеяньми облечена и ставша реста: многая онии архиерею благодарения воздаждь, его бо ради Господь тебе живот дарова:

³⁴ты же от него биен возвести всем величие Божие и державу. И сия рекша невидими быста.

³⁵илиодор же жертву принес Господеви, и обеты превеликия обещав живот даровавшему, и онии возблагодарив, возвратися ко царю с воины,

³⁶свидетелствоваше же всем, яже виде очима дела превеликаго Бога.

³⁷Егда же царь вопрошаше илиодора, кто был бы ключимь еще единою во Иерусалимли послан быти, отвеща:

³⁸аще коего имаши врага, или царству твоему наветника, посли его онамо, и язвена его приимеши, аще и спасется: зане в месте том истинно есть Божия некая сила:

³⁹той бо обитание на небеси имеяй надзиратель есть и помощник месту тому, и грядущих на озлобление поражает и погубляет.

⁴⁰И сия убо яже о илиодоре и о хранении газофилакии сице имеются.