Read Елизаветинская Библия, 1751 2 Маккавеев 7 Bible Online

2 Маккавеев 7 - Елизаветинская Библия, 1751 bible

2 Маккавеев 7

¹Случися же и седмим братиям вкупе с материю ятым, понуждаемым быти от царя ясти противу правил мяса свиная, бичми и жилами волуями мучимым.

²Един же от них, иже бе первый, тако рече: что хощеши вопрошати и научитися от нас? готови бо есмы умрети, нежели преступити отеческия законы.

³Разгневався же царь повеле сковрады и конобы разжещи.

⁴умже скоро разжженным бывшым, повеле сущему от них предводителю слова отрезати язык, и со всего кожу содравше, краи удов телесных отсещи, прочиим братиям и матери смотрящым.

⁵И егда уже неключимь сотворен бысть всеми (удесы), повеле огню предати еще дышуща и пещи на сковраде: пару же умножающуся от сковрады, (прочии купно) с материю друг друга поощряху умрети мужественно, глаголюще сице:

⁶Господь Бог зрит и о истине нашей утешается, якоже пред лицем свидетелствующею песнию изяви моисей глаголя: и о рабех своих утешится.

⁷Умершу же первому сим образом, втораго изводяху на поругание: и кожу со главы его со власы содравше, и вопрошаху: будеши ли ясти прежде неже умучено будет все тело по удам.

⁸Он же отвещав отеческим гласом, рече: ни. Темже и сей по ряду прият мучение, якоже и первый.

⁹В последнем же издыхании быв, рече: ты убо, окаяннейший, от настоящаго живота нас погубляеши, Царь же мира умерших нас своих ради законов воскресит нас в воскресение живота вечнаго.

¹⁰По сем же третий поругаемь бе, и языка испрошен, абие издаде и руце дерзостне простре и мужественне рече:

¹¹от небесе сия притяжах, и его ради законов презираю сия, и от него сия паки уповаю восприяти.

¹²Яко и сам царь и сущии с ним удивляхуся юнаго великодушию, яко ни во чтоже полагаше муки.

¹³И сему скончавшуся, и четвертаго такожде мучаху мучителе.

¹⁴И егда уже бысть к смерти тако рече: лучше убиваемым от человек упования чаяти от Бога, паки имущым воскрешеным быти от него, тебе же воскресение в живот не будет.

¹⁵По сем же пятаго приведше мучиша. И он воззрев нань, рече:

¹⁶власть в человецех имея тленен сый, еже хощеши, твориши: не мни же роду нашему от Бога оставлену быти:

¹⁷ты же потерпи и зри велию державу его, како тебе и семя твое умучит.

¹⁸По сем приведоша щестаго. И той умрети начинающь рече: не прельщайся суетио, мы бо себе ради сия страждем согрешающе к Богу нашему, сего ради достойная удивления быша:

¹⁹ты же да не возмниши неповинен быти, Богоборствовати начен.

²⁰безмерно же мати дивная и благия памяти достойная, яже погибающих седми сынов единаго дне и времене видящи, благодушно терпяше ради упования на Господа,

²¹и коегождо их увещаваше отеческим гласом, доблия исполнена мудрости и женское помышление мужескою душею воздвизающи, глаголаше к ним:

²²не вем, яко во чреве моем явистеся, ниже бо аз дух и живот дах вам, и коегождо уды не аз составих,

²³но мира творец, создавый род человечь и всех изобретый рождение, и дух и жизнь вам паки воздаст с милостию, яко ныне сами себе презираете ради законов его.

²⁴Антиох же непщуяй уничижен быти и понощающь глас презрев, еще юнейшему живу сущу, не токмо словесы творяше увещание, но и клятвою подкрепляше, богата купно и блажена сотворити, преведеннаго от отеческих законов, и друга возимети, и дела вверити ему.

²⁵Сим же юноше ни какоже внемлющу, призвав царь матерь увещаваше, да будет юноше советница на спасение.

²⁶Много же ему увещавающу, обещала советовати сыну своему.

²⁷Приклонившися же к нему, посмеяся жестокому мучителю и сице рече отеческим гласом: сыне, помилуй мя носившую тя во чреве девять месяцей и млеком питавшую тя лета три, и воскормившую тя и приведшую в возраст сей, и болезни воспитания понесшую:

²⁸молю тя, чадо, да воззриши на небо и землю, и вся, яже в них, видящь уразумееши, яко от не сущих сотвори сия Бог, и человечь род тако бысть:

²⁹не убойся плоторастерзателя сего, но достоин быв братии твоея, восприими смерть, да в милости с братиею твоею восприиму тя.

³⁰Еще же сия ей глаголющей, юноша рече: кого ожидаете? не слушаю повеления царева, но повеления закона слушаю даннаго отцем нашым чрез моисеа:

³¹ты же всякия злобы изобретатель быв на иудеи, не избежиши рук Божиих:

³²мы бо за грехи нашя сия страждем:

³³аще же ради устрашения и наказания живый Господь наш мало прогневася, но паки примирится рабом своим:

³⁴ты же, о, беззаконниче и всех человек сквернавейше, не возносися суетно кичася тщетным упованием, на небесныя рабы его возносящь руку:

³⁵не у бо вседержителя и бсевидца Бога суда избегл еси:

³⁶братия бо наша мало ныне болезни потерпевше по завету Божию вечный живот получиша: ты же судом Божиим праведную казнь гордыни (твоея) восприимеши:

³⁷аз же, якоже братия моя, душу и тело мое предаю за отеческия законы, призывая Бога милостива вскоре быти израилю: ты же с мучением и биением исповеси, яко един токмо Бог есть:

³⁸на мне и на братии моей престанет вседержителя гнев нанесенный праведно всему роду нашему.

³⁹Тогда царь разярися яростию нань паче иных лютее, горце терпящь посмеяние.

⁴⁰И сей убо чист от жития пременися, по всему на Господа уповая.

⁴¹Последи же сынов и мати скончася.

⁴²Сия убо о жертвах и о превосходящих мучителствах толико известишася.