Read Елизаветинская Библия, 1751 2 Маккавеев 8 Bible Online

2 Маккавеев 8 - Елизаветинская Библия, 1751 bible

2 Маккавеев 8

¹Иуда же маккавей и иже с ним, входяще тайно в села, созываху сродники и пребываюших во иудействе приемлюще собраша до шести тысящ мужей.

²И призываху Господа призрети на люди от всех попираемых, ущедрити же и храм от нечестивых человек осквернен

³помиловати же и разореный град и имеющь равно со землею быти, и глас кровей вопиющих к нему услышати,

⁴помянути же и безгрешных младенцев беззаконное погубление и бывшая хуления на имя его, и возненавидети лукавства.

⁵Собрав же множество, маккавей нестерпимь яже языком бысть, гневу Господню в милость обратившуся.

⁶И нападая на веси и грады нечаянно сожигаше, и благовременна места взимающь, не мало супостат побеждаше убивая,

⁷наипаче же нощы на таковая нападения в помощь приемляше: и слава некая мужества его прохождаше всюду.

⁸Виде же филипп по малу в предуспеяние грядуща мужа, частее же во благоденствиих успевающа, ко птоломею воеводе килисирии и финикии писа, дабы помогал в царских делех.

⁹он же скоро избрав никанора, сына патроклова от первейших другов посла, подчинив ему от всяких языков вооруженных виев не менше двадесяти тысящ, да весь иудейский род избиет: придаде же ему и горгию мужа стратига и в ратных делех искусство имуща.

¹⁰Устави же никанор дань царю, яже римляном даяшеся, две тысящы талантов от пленения иудейскаго наполнити.

¹¹Абие же в поморских грады посла, созывая на куплю иудейских пленников, обещаяся девятьдесят пленников за талант дати, не чая мщения хотящаго последовати ему от вседержителя.

¹²Иуде же возвещено бе о приществии никанорове: и егда он возвести сущым с собою о пришествии воинства,

¹³ужасшеся и не веровавше Божию отмщению разбегахуся и от места своего отступаху:

¹⁴инии же оставшая вся продаяху, купно же Господа моляху, да избавит от нечестиваго никанора проданых, прежде даже снитися,

¹⁵и аще не их ради, то ради завета, иже бысть ко отцем их, и призывания ради честнаго и великолепаго имене своего на них.

¹⁶Собрав же маккавей сущих окрест его числом шесть тысящ, моляше, да не ужаснутся от супротивников, ниже да устрашатся неправедно грядущих на ня языков множества, но мужественно да подвизаются,

¹⁷пред очима имеюще беззаконно на место святое соделанную от них укоризну и посмеяннаго града обиду, еще же и прародителнаго жителства разрушение.

¹⁸Они бо на оружие надеются купно и на дерзость, рече: мы же на вседержителя Бога могущаго и грядущих мгновением низложити надеемся.

¹⁹Воспомянув же им и бывшая заступления при прародителех, и яко под сеннахиримом сто осмьдесят пять тысящь погибоща,

²⁰и в вавилоне на галатов бывшее ополчение, како вси, егда на брань приидоша, осмь тысящ с четырию тысящами македонян, македоняном отчаявшымся, едини осмь тысящ побиша сто двадесять тысящ помощию данною им от небесе, и пользу многу взяша.

²¹Сими (воспомяновении) дерзостны оныя поставив и готовы умрети за законы и отечество, четверочастно воинство постави:

²²учинив и братию свою воеводами обоего ополчения, симона и иосифа и ионафана, поддав коемуждо тысящу и пять сот,

²³еще же и елеазару (повелев) чести святую книгу и дав знамение помощи Божию, первому полку сам предводителствуя сразися с никанором.

²⁴Бывшу же им вседержителю споборнику, убиша супостатов более девяти тысящ, язвеных же и безчленных болшую часть сотворища воев никаноровых, всех же в бегство понудиша.

²⁵Сребреники же от пришедших на куплю их взяша.

²⁶Гонивше же их зелне, возвратишася от времене заключени: бе бо (день) пред субботою, сея ради вины не продолжиша гоняще их.

²⁷оружия же их собирающе и корысти от супостат отемлюще, субботу праздноваху попремногу благословяще и исповедаюшеся Господеви спасшему их в день сей, начало милости учинившему им.

²⁸По субботе же немощным и сиротам, и вдовам (и обидимым) разделивше от корыстей, прочая сами и отроцы разделиша.

²⁹Сия же содеявше и общую молитву сотворше, милосердаго Господа моляху, в конец примиритися рабом своим.

³⁰И от сущих с тимофеем и вакхидом противных множае двадесяти тысящ убиша и твердыни зело высокия одержаша, и многия корысти разделиша, равночастне себе и немощным, и сиротам и вдовам, еще же и старейшинам сотворше.

³¹Собравше же оружия их, прилежне вся положиша в местех благовременных, прочыя же корысти во Иерусалим принесоша.

³²И филарха тимофеева убиша мужа беззаконнейшаго и вельми иудеов озлобившаго,

³³иобедителная же празднующе во отечестве, зажегших свяшенная врата, калисфена и некиих иных сожгоша убегших во едину храмину, иже достойную мзду нечестия восприяша.

³⁴Треклятейший же никанор, иже тысящу купцев на куплю иудеов приведый,

³⁵смирен помощию Господнею от тех, ихже противу себе за ничтоже вменяше, славную отложив ризу, чрез средиземное (море) беглеца образом уединена себе сотворь, прииде во антиохию презелне неблагополучен о погублении воинства.

³⁶И иже обеща римляном дань воздати от пленения Иерусалимскаго, проповедаше, яко защитителя Бога имеют иудеи, и сего ради не уязвляеми суть иудее, зане последуют законом от того уставленым.