Read Елизаветинская Библия, 1751 3 Ездра 10 Bible Online

3 Ездра 10 - Елизаветинская Библия, 1751 bible

3 Ездра 10

¹И бысть, егда вниде сын мой в чертог свой, паде и умре:

²и превратихом вся светлая, и восташа вси граждане мои во утешение мое, и почих даже до другаго дне до нощи:

³и бысть, егда вси почиваху, да мя утешат, да покоюся: и востах нощию, и бежах, и приидох, якоже видиши, на сие поле,

⁴и помышляю уже не возвратитися во град, но зде пребывати, и не ясти, ниже пити, но безпрестани рыдати и поститися дондеже умру.

⁵И оставих словеса, в нихже бех, и отвещахъ с яростию к ней и рекох:

⁶буя паче всех жен, не видиши ли плача нашего и яже нам случишася?

⁷яко сион мати наша всякою скорбию скорбитъ и смирением смирена есть и плачет вельми:

⁸и ныне понеже вси рыдаем и скорбни есмы, яко вси прискорбни есмы, ты же скорбиши о единем сыне:

⁹вопроси бо земли, и речет тебе, яко сия есть, ейже подобает рыдати падения толикихъ на ней раждающихся:

¹⁰и от нея от начала вси рождени, инии же приидут, и се, едва не вси в погибель отходят, и истребление бывает множеству их:

¹¹и кто убо имать рыдати паче сея, яже толь велие множество погубила, нежели ты, яже о единем болезнуеши?

¹²аще же речеши мне: яко несть плачь мой подобен земли, понеже плод чрева моего погубих, егоже в печалех породих и с болезнию родих,

¹³земля же по пути земли, отиде же в ней множество настоящее, якоже случися:

¹⁴и аз тебе реку: якоже ты с трудомъ родила еси, тако и земля дает плод свой человеку от начала ему, иже сотворил ю:

¹⁵ныне убо воздержи сама у себе болезнь твою и крепко носи яже тебе случишася падения:

¹⁶аще бо оправдиши предел Божий и советъ его, приимеши во время и в таковых похвалишися:

¹⁷вниди убо во град к мужу твоему.

¹⁸И рече ко мне: не сотворю, ни вниду во град, но зде умру.

¹⁹И приложих еще глаголати к ней и рекох:

²⁰не твори сего словесе, но соизволи совету моему: колико бо падение сиону? утешися ради болезни Иерусалима:

²¹видиши бо, яко освящение наше опусте, и олтарь наш сотрен есть, и церковь наша разорена есть,

²²и псалтир наш смирен есть, и песнь умолче, и радость наша разрушена есть, и свет светилника нашего угашен есть, и кивот завета нашего расхищен есть, и святая наша осквернена суть, и имя, еже воззвано есть над нами, едва не осквернено есть, и чада наша укорение претерпеша, и священницы наши сожжени суть, и левити наши в пленение отидоша, и девицы наша осквернены суть, и жены наша насилие пострадаша, и праведнии наши восхищени суть, и отроцы наши изгибнуша, и юноши наши служиша, и крепцыи наши изнемогоша:

²³а сие всех паче знамение сиону, яко испаде от славы своея, ибо и предан есть в руки ненавидящих ны:

²⁴ты убо оттряси твою печаль многую и отложи от себе множество болезней, да тя помилует крепкий, и покой сотворит тебе вышний, упокоение трудов.

²⁵И бысть егда глаголах к ней, лице ея возсия внезапу и зрак, блисташе видение ея, яко бых ужасен зело от нея и помышлях, что есть сие.

²⁶И се, внезапу испусти шум гласа великий, страха полный, яко поколебатися земли от шума жены.

²⁷И видех, и се, ктому жена не являшеся мне, но град созидашеся, и место показовашеся от оснований великих: и устрашихся и возопихъ гласом великимъ

²⁸и рекох: где есть уриил ангел, иже от начала прииде ко мне? понеже той мя сотвори приити во множестве ужаса ума сего, и бысть конец мой в растление, и молитва моя в поношение.

²⁹И егда бых глаголющь аз сия, се, прииде ко мне и виде мя:

³⁰и се, бых лежащь яко мертв, и разумъ мой отчужден бысть: и удержа десницу мою, и укрепи мя, и постави мя на нозе мои, и рече ми:

³¹что тебе есть? и вскую смущен есть разум твой и чувства сердца твоего? и вскую смущаешися? И рекох: яко оставил мя еси,

³²и аз убо сотворих по словесем твоим, и изыдох на поле, и се, видех и вижду, яко не могу провещати.

³³И рече ко мне: стани яко муж, и возвещу ти. И рекох:

³⁴глаголи, господи мой, ты ко мне и не остави мя, яко да не всуе умру,

³⁵яко видех, яже не ведях, и слышу, яже не вем: или чувство мое лжет, и душа моя мечтание видит?

³⁶ныне убо молю тя, да скажеши рабу твоему о ужасе сем.

³⁷И отвеща ко мне и рече:

³⁸слыши мя, и научу тя, и реку тебе о коихъ боишися, яко вышний откры тебе тайны многи,

³⁹виде прав путь твой, яко безпрестани скорбиши о людех твоих и зело рыдаеши сиона ради.

⁴⁰Сей убо разум видения, еже тебе явися мало прежде:

⁴¹юже видел еси рыдающую, начал еси утешати ю,

⁴²ныне же уже лица женска не видиши, но явися тебе град созидаемый,

⁴³и яко возвещаше тебе о падении сына своего, сие есть решение:

⁴⁴сия жена, юже видел еси, сия есть сион: и понеже рече тебе, юже и ныне узриши яко град создан,

⁴⁵и яко рече тебе, яко безплодна бяше лет тридесять: сиречь, за еже бяху летъ тридесять, егда не бысть в нем еще жертва приношена:

⁴⁶и бысть по летех тридесятих, созда соломонъ град и принесе приношения тогда, егда роди неплоды сына.

⁴⁷А еже рече тебе, яко воспита его с трудом, сие бяше обитание во Иерусалиме.

⁴⁸А еже рече тебе, яко сын мой грядый в свой чертог мертв бысть, и случися ему падение, то бяше, еже сотворено есть падение Иерусалиму.

⁴⁹И се, видел еси подобие ея, и яко сына рыдаше, начал еси утешати ю. И о сих, яже случишася, сия подобаше тебе открыти.

⁵⁰И ныне видит вышний, яко душею прискорбенъ еси и яко всем сердцем терпиши о нем, яви тебе светлость славы его и красоту лепоты его.

⁵¹Сего бо ради рекох тебе, да живеши в поли, идеже несть дом создан.

⁵²Ведях бо аз, яко вышний начинаше тебе показовати сия:

⁵³сего ради рекох тебе, да приидеши на ниву, идеже несть основания зданию:

⁵⁴ниже бо можаше дело здания человеческаго содержатися на месте, идеже начинаше вышняго град показоватися.

⁵⁵Ты убо не бойся, ниже да устрашится сердце твое, но вниди и виждь светлость и величество созидания, колико возможно есть тебе видениемъ очес (видети).

⁵⁶И по сих услышиши, колико приемлет слышание ушес твоих слышати.

⁵⁷Ты бо блажен еси паче многих и званъ еси пред вышняго яко не мнози.

⁵⁸В нощи же, яже заутра будет, пребуди зде,

⁵⁹и покажет тебе вышний оная видения вышших, яже сотворит вышний обитающим на земли въ последния дни.

⁶⁰И спах ту нощь и другую, якоже рече мне.