Read Елизаветинская Библия, 1751 3 Ездра 11 Bible Online

3 Ездра 11 - Елизаветинская Библия, 1751 bible

3 Ездра 11

¹И видех сон, и се, восхождаше от моря орел, емуже бяху дванадесять крил пернатых и главы три.

²И видех, и се, простираше криле свои по всей земли, и вси ветри небеснии надыхаху въ него и собирахуся.

³И видех, и от перия его раждахуся сопротивная перия, и тая творяхуся в перийцах дробныхъ и малых:

⁴ибо главы его бяху покойны, и средняя глава бе болши инех глав, но та покояшеся с ними.

⁵И видех, и се, орел летяще крилами своими и воцарися на земли и над живущими на ней.

⁶И видех, яко повиновена бяху ему вся поднебесная, и никтоже ему противляшеся ни един от твари, яже есть на земли.

⁷И видех, и се, воста орел на ногти своя и испусти глас перием своим, глаголя:

⁸не бдите вси вкупе, спите един кийждо в месте своем и по времени бдите,

⁹главы же на последок да сохранятся.

¹⁰И видех, и се, глас не исхождаше от глав его, но от среды тела его.

¹¹И исчислих противная перия его, и се, сих бяше осмь.

¹²И видех, и се, о десную страну воста едино перо и воцарися над всею землею.

¹³И бысть, егда царствоваше, прииде ему конец, и не явися место его, и ино воста и царствоваше: тое много держа время.

¹⁴И бысть, егда царствоваше, и грядяше конецъ его, да не явится якоже прежднее,

¹⁵и се, глас испущен бысть тому, глаголя:

¹⁶слыши ты, еже толико время держало еси землю, сия возвещаю тебе, прежде неже начнеши не являтися:

¹⁷никтоже последи тебе одержит время твое, но ни пол его.

¹⁸И воздвижеся третие и одержа началство, якоже и преждняя, и не явися и тое.

¹⁹И тако случашеся всем иным, коемуждо особно началство содержати и паки никогда явитися.

²⁰И видех, и се, во время последствующее перие воздвизахуся о десную страну, да одержатъ и тии началство, и от тех быша, иже содержаху, но обаче абие не являхуся:

²¹ибо и нецыи от них воздвизахуся, но не содержаху началства.

²²И видех по сих, и се, не явишася дванадесять перий и два перийца.

²³И ничтоже бяше остало в теле орли, токмо две главы покоящияся и шесть перийц.

²⁴И видех, и се, шестим перийцам разделена суть два и пребыста под главою, яже есть на десней стране, ибо четыри пребыша в месте своем.

²⁵И видех, и се, подкрилия мышляху себе воздвигнути и одержати началство.

²⁶И видех, и се, едино воздвижено есть, но абие не явися,

²⁷и вторая скорее, неже прежняя, не явишася.

²⁸И видех, и се, два, яже остастася въ себе сами, помышляста и тая царствовати.

²⁹И в том егда помышляста, и се, едина от покоящихся глав, яже бяше средняя, возбуждашеся: сия бо бяше от дву главу болшая.

³⁰И видех, яко соединены суть две главы с собою,

³¹и се, обращена есть глава с теми, яже с нею бяху, и снеде два подкрылята, яже помышляста царствовати.

³²Сия же глава устраши всю землю и обладаше на ней теми, иже обитают на земли, с трудностию многою, и власть обдержа над кругом земнымъ паче всех крил, яже быша.

³³И видех по сих, и се, средняя глава внезапу не явися, и сия якоже криле.

³⁴Остастеся же две главы, яже и те такожде царствовасте на земли и над обитающими на ней.

³⁵И видех. и се, пожре глава, сущая о десную страну, оную, яже о шуюю.

³⁶И слышах глас глаголющь ми: зри противу тебе и разсмотряй еже видиши.

³⁷И видех, и се, якоже лев разгневанъ от леса рыкающь, и видех, яко испускаше глас человеческии ко орлу, и рече глаголя:

³⁸слыши ты, и возглаголю тебе, и речет вышний тебе:

³⁹не ты ли еси, иже остался от четырехъ животных, яже сотворих царствовати в веце моем, и да чрез них приидет конец века их?

⁴⁰и четвертый грядый победи вся животная, яже преидоша, и властию одержа век со трепетомъ многим и всю вселенную с трудностию лютою, и обиташе толико времен на крузе земнем съ лестию:

⁴¹и судил еси землю не со истиною,

⁴²сокрушил бо еси кротких и повредил еси миролюбивых, и возлюбил ложных, и разорилъ еси жилища их, иже плод творяху, и смирилъ еси стены их, иже тебе не повредиша:

⁴³и взыде укорение твое к вышнему и гордыня твоя ко крепкому,

⁴⁴и узре вышний гордая времена, и се, скончана суть, и беззакония его исполнишася:

⁴⁵сего ради не являйся ты, орле, и криле твои грозныя и перийца твоя строптивая, и главы твоя лукавыя, и ногти твои злейшии, и все тело твое суетное,

⁴⁶яко да прохладится вся земля и обратится свободна от твоея силы, и уповает на судъ и милосердие того, иже сотвори ю.