Read Елизаветинская Библия, 1751 3 Ездра 12 Bible Online

3 Ездра 12 - Елизаветинская Библия, 1751 bible

3 Ездра 12

¹И бысть, егда глаголаше лев словеса сия ко орлу, и видех:

²и се, яже оста глава, и не явишася четыри крила оная, яже к нему преидоша и воздвигошася да царствуют, и бяше царство их скудно и молвы полно.

³И видех, и се, та не являхуся, и все тело орлее возжигашеся, и устрашися земля зело, и аз от молвы и ужаса ума и от велика страха воспрянух и рех духу моему:

⁴се, ты подал еси мне то в том, яко испытуеши пути вышняго:

⁵се, еще утружден есмь душею и духомъ моим изнемогох зело, и ниже малая есть во мне сила от множества боязни, еюже устрашихся нощи сея:

⁶ныне убо помолюся вышнему, да мя укрепитъ даже до конца.

⁷И рекох: владыко Господи, аще обретох благодать пред очима твоима, и аще оправдан есмь пред тобою паче многих, и аще истинно взыде моление мое пред лицем твоим,

⁸укрепи мя и яви мне рабу твоему толкование и разделение видения грознаго сего, да совершеннее утешиши душу мою:

⁹достойна бо мене имел еси показати мне времена последняя. И рече ко мне:

¹⁰сие есть толкование видения сего:

¹¹орла егоже видел еси восходяща от моря, то есть царство, еже видено бысть в видении даниила брата твоего,

¹²но несть ему протолковано, яже азъ ныне тебе протолкую.

¹³Се, дние грядут, и востанет царство на земли, и будет боязнь вящшая всем царством, яже быша прежде его:

¹⁴царствовати же будут на ней царие дванадесять, един по единому,

¹⁵ибо вторый начнет царствовати, и той одержитъ вящшее время паче дванадесяти:

¹⁶сие есть толкование дванадесяти крил, яже видел еси.

¹⁷И егоже слышал еси глас, иже глаголаше, не от глав его исходящь, но от средины тела его,

¹⁸сие есть толкование: яко после времене царства того родятся рвения не мала, и бедствовати имать, яко да падет, и не падет тогда, но паки возставится в свое начало:

¹⁹а яже видел еси подкрилец осмь прилепляющихся крилам его,

²⁰сие есть толкование: востанут в томъ осмь царей, ихже будут времена легка и лета скорая, и два убо от них погибнут:

²¹приближающуся же времени среднему, четыри сохранятся во время, егда начнет приближатися время его да скончается, двое же на конец сохранятся.

²²А яко видел еси три главы покоящияся,

²³сие есть толкование: в последняя его воздвигнет вышний три царства и призовет въ ня многих, и пообладают землею:

²⁴и иже обитают на ней, с трудом многимъ на всех, иже быша прежде сих, сего ради тии названи суть главы орли:

²⁵сии бо будут, иже возоглавят нечестия его и иже совершат последняя его.

²⁶А яко видел еси главу болшую неявляющуюся, сие есть толкование ея: яко единъ от них на одре своем умрет, но обаче с мучением,

²⁷ибо два, иже пребудут, мечь их пояст:

²⁸единаго бо мечь пояст сущих с ним, но обаче и сей мечем на последок падет.

²⁹А яже видел еси два подкрилия восходящая на главу, яже есть о десную страну,

³⁰сие есть толкование: сии суть, ихже соблюде вышний в конец свой, то есть царство скудное и скорбей полно.

³¹Якоже видел еси и льва, егоже виделъ еси от леса возбудившася, рыкающа и глаголюща ко орлу, и обличающа его и неправды его всеми словесы его, якоже слышал еси:

³²сей есть ветр, егоже сохранил вышний на конец на них и на нечестия их, и обличитъ тех и обявит пред теми прелести их,

³³поставит бо их на суде живых: и будет, егда обличит их, тогда накажет их:

³⁴ибо останок людий моих избавит с бедностию, иже сохранени суть на концах моих, и ублажитъ их, дондеже приидет конец день суда, о немже глаголах тебе от начала.

³⁵Сей сон, егоже видел еси, и сия суть толкования.

³⁶Ты убо един достоин был еси знати тайну сию вышняго:

³⁷напиши убо вся сия в книгу, яже виделъ еси, и положи я в месте сохранне,

³⁸и научиши сим мудрыя от людий твоих, ихже сердца веси, яко могут прияти и хранити тайны сия:

³⁹ты же еще потерпи зде иных дний седмь, да тебе показано будет все, еже изволится вышнему показати тебе. И отиде от мене.

⁴⁰И бысть, егда услыша весь народ, яко проидоша седмь дний, и аз не возвратихся во град, и собрашася вси от меншаго даже до болшаго, и приидоша ко мне и рекоша ми, глаголюще:

⁴¹что согрешили есмы тебе и что неправо содеяхом на тя, яко оставляяй нас селъ еси на месте том?

⁴²ты бо нам остался еси един от всехъ людий, якоже грозд от винограда и яко светилникъ в месте мрачне и яко пристанище и корабль спасеный от бури:

⁴³или недоволна нам суть злая, яже приключаются?

⁴⁴аще убо ты нас оставиши, коль лучше бы нам было, аще быхом сожжени были и мы с сожжением сиона?

⁴⁵ниже бо мы есмы лучши тех, иже тамо умроша. И плакаша гласом великим. И овещахъ к ним и рекох:

⁴⁶уповай, израилю, и не скорби ты, доме иаковль:

⁴⁷есть бо память о вас пред вышним, и крепкий не забы вас в напасти:

⁴⁸аз бо не оставих вас, ни отидох от вас, но приидох на сие место, да помолюся о разорении сиона, да взыщу милосердие за смирение святыни вашея:

⁴⁹и ныне идите един кийждо в дом свой, и аз прииду к вам по днех сих.

⁵⁰И отиде народ, якоже рекох ему, во град:

⁵¹аз же седох на поли седмь дний, якоже ми повеле, и ядох токмо от цветов селных, и от трав сотворена бысть мне пища во днехъ тех.