Read Елизаветинская Библия, 1751 3 Ездра 13 Bible Online

3 Ездра 13 - Елизаветинская Библия, 1751 bible

3 Ездра 13

¹И бысть по днех седми, и видех сон нощию:

²и се, от моря ветр воставаше, да возмутитъ вся волны его.

³И видех, и се, возмогаше той человекъ с тысящьми небесными, и аможе лице свое обращаше, да воззрит, трепетаху вся, яже под ним видяхуся,

⁴и аможе исхождаше глас от уст его, возжизахуся вси, иже слышаху глас его, якоже покоится земля, егда услышит огнь.

⁵И видех по сем, и се, собирашеся множество людий, ихже не бе числа, от четырех ветръ небесных, да победят человека, иже изыде от моря.

⁶И видех, и се, сам себе извая гору велику и возлете на ню:

⁷аз же исках видети страну или место, откуду изваяна бысть гора, и не могох.

⁸И по сем видех, и се, вси, иже собрани суть на него, да поборют его, бояхуся зело, обаче дерзаху ратовати.

⁹И се, егда увиде стремление множества грядущаго, не воздвиже руки своея, ни оружия держаше и ни котораго орудия браннаго, токмо якоже видех:

¹⁰понеже испусти из уст своих аки дохновение огня, и от устен его яко дух пламене, и от языка своего испускаше искры и бури, и соединена суть вся вкупе сия, дохновение огня и дух пламене и множество бури:

¹¹и нападе на множество во устремлении, еже уготовано бысть ополчатися, и пожже всехъ (и искорени), яко абие ничтоже видено бяше от безчисленна множества, разве токмо прахъ и дыма воня. И видех и устрашихся.

¹²И по сих видех того человека сходящаго с горы и зовуща к себе множество иное мирное:

¹³и приступаху к нему лица человеков многих, некиих радующихся и некиих скорбящих, нецыи же привязани, нецыи приводяще от тех, иже приношахуся. И изнемогох от множества страха, и возбудихся и рекох:

¹⁴ты от начала показал еси рабу твоему чудеса сия, и достойна мя имел еси, да приимеши молитву мою:

¹⁵и ныне покажи мне еще толкование сна сего,

¹⁶якоже бо мню в чувстве моем, горе иже оставлени будут во дни тыя, и наипаче горе сим, иже не суть оставлени,

¹⁷иже бо не суть оставлени, скорбни бяху:

¹⁸разумею ныне, яже суть отложена на последния дни, и усрящут их, но и тех, иже оставлени суть:

¹⁹сего бо ради приидоша в беды великия и в нужды многия, якоже показуют сония сия:

²⁰обаче легчае есть бедствующему приити на сие, неже прейти яко облаку от века и ныне видети, яже случатся в последняя времена. И отвеша ко мне и рече:

²¹и видения толкование реку тебе, и о нихже глаголал еси, отверзу ти.

²²Понеже о сих рекл еси, иже оставлени суть, сие есть толкование:

²³иже отимет беду в то время, той сохранися: иже в беду впадоша, сии суть, иже имеютъ дела и веру к крепчайшему:

²⁴веждь убо, яко болши ублажени суть иже оставлени, паче тех, иже мертви суть.

²⁵Сия толкования видению: яко видел еси мужа восходяща от сердца морскаго,

²⁶той есть, егоже хранит вышний многа времена, иже самим собою избавит сотворение свое и той разсмотрит, иже оставлени суть.

²⁷А яко видел еси от уст его исходити аки дух и огнь и бурю,

²⁸и яко не держаше меча и ни орудия браннаго, порази бо стремление его множество, еже прииде ратовати его, сие есть толкование:

²⁹се, дние грядут, егда начнет вышний избавляти сих, иже на земли суть,

³⁰и приидет ужас ума на тех, иже обитают на земли,

³¹и инии иных помыслят воевати, град на град и место на место, и язык на языкъ и царство на царство:

³²и будет, егда будут сия, и случатся знамения, яже прежде показах ти, и тогда открыется сын мой, егоже видел еси яко мужа восходяща:

³³и будет, егда услышат вси языцы глас его, и оставит един кийждо во стране своей брань свою, юже имут другъ на друга,

³⁴и соберется во едино собрание множество безчисленно, яко хотяще приити и ополчитися на него:

³⁵той же станет на верху горы сиона:

³⁶сион же приидет и явится всем уготованъ и создан, якоже видел еси гору изваяну без рук:

³⁷той же сын мой обличит, яже изобретоша языцы, нечестия их та, яже к бури приближишася ради лукавых помышлений их и мучений, имиже начнут мучитися,

³⁸яже подобна суть пламени: и погубит ихъ без трудности, по закону, иже огню подобенъ есть.

³⁹А яко видел еси его собирающаго к себе иное множество мирное:

⁴⁰сии суть десять колен, иже пленени быша от земли своея во дни осии царя, егоже плени салманасар царь ассирийский и преведе ихъ за реку, и преведени суть в землю иную,

⁴¹тии же себе даша совет той, да оставятъ множество языков, и дабы прошли в дальную страну, идеже никогда обиташе род человеческий,

⁴²или тамо хранити законная своя, ихже не храняху во стране своей:

⁴³входами же тесными реки евфрата внидоша:

⁴⁴сотворил бо им тогда вышний знамения и уставил жилы речныя, дондеже пройдут:

⁴⁵оною бо страною бяше путь мног, путьствовати лето едино и пол, ибо страна та зовется арсареф:

⁴⁶тогда обиташа тамо даже до последняго времене: и ныне паки егда начнут приходити,

⁴⁷паки вышний уставит жилы речныя, да возмогут пройти: сих ради видел еси множество с миром:

⁴⁸но и иже оставлени суть от людий твоих, сии суть, иже обрящутся внутрь предел моих:

⁴⁹будет убо, егда начнет погубляти множество тех, иже собрани суть языцы, защититъ их, иже премогоша людий,

⁵⁰и тогда покажет им велие множество чудес.

⁵¹И рекох аз: владыко Господи, сие ми покажи, чесо ради видех мужа восходяща от сердца морскаго? И рече мне:

⁵²якоже не можеши сия испытати, или знати, яже суть во глубине морстей, тако не можетъ кийждо видети на земли сына моего, или тех, иже с ним суть, токмо во время дне.

⁵³Сие есть толкование сония, еже виделъ еси и егоже ради просвещен еси зде един:

⁵⁴оставил бо еси твой и окрест моего упражднялся еси закона и искал еси:

⁵⁵житие бо твое устроил еси в премудрости и чувство твое назвал еси материю:

⁵⁶и того ради показах тебе мзды у вышняго: будет бо по инех триех днех, иная к тебе возглаголю и изявлю тебе тяжкая и дивная.

⁵⁷И идох и приидох на поле, много славя и хваля вышняго о дивных, яже по времени творяше,

⁵⁸и яко управляет сие, и яже суть во временех сотворена: и седох ту три дни.