Read Елизаветинская Библия, 1751 3 Ездра 14 Bible Online

3 Ездра 14 - Елизаветинская Библия, 1751 bible

3 Ездра 14

¹И бысть в третий день, и аз седях под дубом, и се, глас изыде противу мене от купины и рече: ездро, ездро! И рекох:

²се, аз, Господи. И востах на нозе мои. И рече ко мне:

³открываяся откровен есмь на купине и глаголах ко моисею, егда служаху людие мои во египте,

⁴и послах его и изведох люди моя от египта, и возведох его на гору синайску и держах его пред собою дни многи,

⁵И возвестих ему чудеса многа и показахъ ему времен тайная и конец, и заповедахъ ему глаголя:

⁶сия во явление сотвориши словеса и сия скрыеши:

⁷и ныне тебе глаголю:

⁸знамения, яже показах, и сония, яже видел еси, и толкования, яже ты веделъ еси, в сердцы твоем положи я,

⁹ты бо восприят будеши от всех, обратишися остатний с советом моим и с подобными твоими, дондеже скончаются времена:

¹⁰яко век погуби юность свою, и времена приближаются старетися:

¹¹на дванадесять бо частей разделен есть век, и проидоша его десятая и полдесятыя части,

¹²осташася же его после полдесятыя части:

¹³ныне убо устрой дом твой и накажи люди твоя, и утеши смиренных их и отрецыся уже тления,

¹⁴и отпусти от себе смертное помышление и отверзи от себе тягости людския, и извлецы уже от себе немощное естество и отстави во едину страну смущающая тя помышления, и тщися преселитися от времен сих:

¹⁵яже бо видел еси ныне случившаяся злая, паки тех горшая сотворят:

¹⁶колико бо изнеможет век от старости, толико умножатся на обитающих злая:

¹⁷удалибося далече истина, и приближися лжа: уже бо тщится приити еже виделъ еси видение.

¹⁸И овещах и рекох: пред тобою, Господи:

¹⁹се бо, аз пойду, якоже повелел еси мне, и накажу настоящия люди: а иже родятся, кто научит я?

²⁰поставлен бо есть век во тме: иже обитают в нем, без света:

²¹понеже закон твой сожжен есть, того ради никтоже знает, яже от тебе сотворена суть, или яже начнутся дела:

²²аще бо обретох благодать пред тобою, посли в мя дух свят, да напишу все, еже сотворено бысть в веце от начала, яже быша в законе твоем писана, да возмогут человецы обрести стезю, и иже восхотят жити в последних временех, да живут.

²³И отвеща ко мне и рече: шед собери люди и речеши к ним, да не ищут тебе дний четыредесять,

²⁴ты же уготови себе дщиц много и возми с собою сариа, давриа, салемиа, ехана и асиеля, пять их, иже уготовани суть к писанию скоро:

²⁵и приидеши семо, и аз возжгу в сердцы твоем светилник разума, и не угаснет, дондеже скончаются, яже начнеши писати:

²⁶и когда совершиши, некая явственно да сотвориши, некоторая мудрым сокровенно предаси, в заутрии бо в сей час начнеши писати.

²⁷И идох, якоже ми повеле, и собрахъ вся люди и рекох:

²⁸слыши, израилю, словеса сия:

²⁹странствоваша отцы наши от начала во египте и избавлени суть оттоле,

³⁰и прияша закон жизни, егоже не сохраниша, егоже и вы по них преступисте:

³¹и дана вам есть земля в жребий, и земля сион, и отцы ваши и вы беззаконие сотвористе и не содержасте путий, ихже повеле вам вышний:

³²а понеже праведный судия есть, отял от вас во время, еже дарова:

³³и ныне вы зде есте, и братия ваша въ вас суть:

³⁴аще убо повелите чувству вашему и поучите сердце ваше, живи содержани будете и по смерти милость наследите:

³⁵суд бо по смерти приидет, егда паки оживем, и тогда праведных имена явятся и нечестивыхъ дела покажутся:

³⁶ко мне убо никтоже да приступит ныне, ни взыщет мене даже до четыредесяти дний.

³⁷И приях пять мужей, якоже заповеда мне, и идохом в поле и пребыхом ту.

³⁸И бысть в заутрии, и се, глас воззва мя глаголя: ездро! отверзи уста твоя и пий, имже тя напою.

³⁹И отверзох уста моя, и се, чаша полна подаяшеся мне: и сие, имже бе исполнена, бяше якоже вода, цвет же ея огню подобен.

⁴⁰И приях и пих: и тогда, егда пиях, сердце мое мятяшеся разумом, и в персех моихъ возрасташе премудрость, ибо дух мой содержашеся памятию:

⁴¹и отверста быша уста моя и не быша затворена ктому.

⁴²Вышний даде разум пятим мужем, и писаша, яже глаголахуся ужасы нощныя, ихже не ведяху.

⁴³Нощию же ядяху хлеб, аз же во дни глаголахъ и нощию не молчах.

⁴⁴И написаны суть за четыредесять дний книги двести четыри.

⁴⁵И бысть егда совершишася четыредесять дний,

⁴⁶глагола вышний, рекий: первая, яже ппсалъ еси, в яве постави, и да чтут достойнии и недостойнии:

⁴⁷последняя же седмьдесят сохрани, да предаси их мудрым от людий твоих:

⁴⁸в тех бо есть корень разума, и премудрости источник, и ведения река. И сотворих тако.