Read Елизаветинская Библия, 1751 3 Ездра 16 Bible Online

3 Ездра 16 - Елизаветинская Библия, 1751 bible

3 Ездра 16

¹Горе тебе, вавилоне и асиа! горе тебе, египте и сириа!

²Препояшитеся вретищем и власяницами и плачите сынов ваших и болезнуйте, яко приближися сокрушение ваше:

³послан есть на вас мечь, и кто есть, иже отвратит его?

⁴послан есть на вас огнь, и кто есть, иже угасит его?

⁵послана суть на вас злая, и кто есть, иже отметнет я?

⁶еда отженет кто льва алчуща в лес? или угасит огнь во хврастии скоро, егда начнет возгарати?

⁷еда отразит кто стрелу от стрелца крепкаго испущенную?

⁸Господь крепкий посылает злая, и кто есть, иже отженет я?

⁹изыде огнь от гнева его, и кто есть, иже угасит его?

¹⁰блеснет молниею, и кто не убоится? возгремит, и кто не ужаснется?

¹¹Господь воспретит, и кто до основания не сокрушится от лица его?

¹²Земля сотрясеся и основания ея, море волнуется из глубины, и волны его возмутятся и рыбы его от лица Господня и от славы силы его.

¹³Понеже крепка десница его, яже лукъ напряже: стрелы его остры, яже от него посылаются, не оскудеют, егда начнут посылатися в концы земли.

¹⁴Се, посылаются злая и не возвратятся, дондеже приидут на землю.

¹⁵Огнь возгарается и не угаснет, дондеже скончает основания земли.

¹⁶Имже образом не возвращается стрела послана от сильнаго стрелца, тако не возвратятся злая, яже послана будут на землю.

¹⁷Горе мне, горе мне! кто мя избавит во дни тыя?

¹⁸Начало болезней, и многа стенания: начало глада, и многи погибели: начало браней, и убоятся власти: начало зол, и вострепещутъ вси.

¹⁹Во время же то что сотворю, егда приидутъ злая?

²⁰Се, глад и казнь, и скорбь и теснота, послани суть бичи во исправление:

²¹и во всех сих не обратятся от беззаконий своих, ни биения памятствовати будут всегда.

²²Се, будет обилие ни во чтоже на земли, тако яко возмнят себе быти управленъ мир, и тогда возрастут злая на земли, мечь, глад и велико смятение.

²³От глада бо мнози, иже обитают на земли, погибнут, и мечь изгубит прочих, иже останутъ от глада.

²⁴И мертвии яко мотыла извержени будут, и не будет, иже утешит их: опустеетъ бо земля, и гради ея разорени будут.

²⁵Не останется, иже возделает землю и иже посеет на ней.

²⁶Древеса дадут плоды, и кто обымет я?

²⁷гроздие созреет, и кто потопчет е? будет бо мест великое опустение.

²⁸Восхощет бо человек человека видети, или глас его слышати,

²⁹зане останут от града десять, и два от нивы, иже сокрыются в густых дубравах и въ разселинах каменных.

³⁰Имже образом оставляются в масличиихъ и на всяцем древе три или четыри маслины,

³¹или якоже в винограде обранем гроздие оставляются от тех, иже прилежно виноградъ обирают:

³²тако оставятся во днех онех три или четыри от изследующих домы их мечем.

³³И оставлена будет земля пуста, и нивы ея состареются, и путие ея и вся стези ея тернием зарастут, зане не пройдут человецы по ним.

³⁴Восплачут девы не имущия обручников, восплачутъ жены не имеющия мужей, восплачут дщери их не имеющия помощи:

³⁵обручницы их в брани скончаются, и мужие их во гладе истребятся.

³⁶Слышите сия и познайте я, раби Господни.

³⁷Се, слово Господне, приимите е: не веруйте богом, о нихже рече Господь:

³⁸се, приближаются злая и не умедлят.

³⁹Имже образом бременатая егда родитъ в девятый месяц сына своего, приближающуся часу рождения ея, прежде часов двух или триехъ болезни обдержат чрево ея, и исходящу младенцу от чрева, не закоснят ни на едину черту:

⁴⁰тако не укоснят злая произыти на землю, и век возстенет, и болезни обымут и.

⁴¹Слышите слово, людие мои, уготовайтеся на брань, и во злых тако будите, якоже пришелцы земли:

⁴²продаяй аки бегаяй, а купуяй аки погубляяй,

⁴³торгуяй аки плода не приемляй, и созидаяй аки той, иже обитати не имать:

⁴⁴сеяй, яко иже не пожнет: тако иже виноградъ режет, яко не имый обирати его:

⁴⁵иже посягают, тако аки чад не сотворят: и иже не посягают, тако яко вдовицы.

⁴⁶Того ради, иже трудятся, вотще трудятся:

⁴⁷плоды бо их иноплеменницы пожнут и имения их расхитят, и домы превратят и сынов ихъ пленят, ибо во пленении и гладе родят чада своя.

⁴⁸И иже куплю деют хищением, коль долго украшают грады и домы своя, и одержания и лица своя,

⁴⁹толико паче возненавижду их за грехи их, рече Господь.

⁵⁰Якоже ненавидит блудница жену мудру и добру зело,

⁵¹тако возненавидит правда неправду, егда украшается, и клевещет на ню в лице, егда приидет иже защищает изыскующаго всяк грехъ на земли:

⁵²сего ради не уподобляйтеся ей, ни деломъ ея.

⁵³Яко еще мало, и возмется беззаконие от земли, а правда воцарится над вами.

⁵⁴Да не глаголет грешник, яко не согреши, понеже углие огненное возгорится на главе его, иже глаголет: не согреших пред Господемъ Богом и славою его.

⁵⁵Се, Господь весть вся дела человеческая и начинания их, и помышления их и сердца их.

⁵⁶Рече бо: да будет земля, и бысть: да будетъ небо, и бысть.

⁵⁷И словом его звезды сотворены суть, и знает число звезд:

⁵⁸иже испытует бездны и сокровища их, иже измерил есть море и зачатие его,

⁵⁹иже заключи море посреде вод и повеси землю на водах словом своим,

⁶⁰иже простре небо яко камару, на водахъ основа е,

⁶¹иже положи в пустыни источники водныя и на верху гор езера, во испущение рек из высокаго камене, да напаяют землю,

⁶²иже сотвори человека и положи сердце его посреде тела, и вложи ему дух и животъ и разумъ

⁶³и дыхание Бога вседержителя, иже сотвори вся и испытует вся сокровенная в сокровенныхъ земли:

⁶⁴той знает начинание ваше, и яже мыслите в сердцах ваших согрешающе и хотяще утаити грехи ваша.

⁶⁵Сего ради Господь испытуяй испыта вся дела ваша и обличит вас всех,

⁶⁶и вы посрамлени будете, егда произыдутъ греси ваши пред человеки, и беззакония предстанут, яже обвиняти будут в день той.

⁶⁷Что сотворите, или како сокрыете грехи ваша пред Богом и ангелы его?

⁶⁸Се, судия Бог, бойтеся его, останитеся от грех ваших и забудите беззакония ваша уже творити их во век, и Бог изведетъ вас и избавит от всякия скорби.

⁶⁹Се бо, возгарается огнь на вас, языцы мнози, и восхитят некиих от вас и заколютъ на жертву идолом:

⁷⁰и иже соизволят им, будут им в посмехъ и в поношение и в попрание.

⁷¹Будет бо местом место, и от соседнихъ градов востанут мнози на боящихся Господа.

⁷²Будут аки неистови, ни когоже щадяще на расхищение и запустение еще боящимся Господа:

⁷³ибо опустошат и расхитят стяжания ихъ и из домов их изженут я.

⁷⁴Тогда явится искушение избранных моих, якоже злато, еже искушается от огня.

⁷⁵Слышите, возлюбленнии мои, рече Господь: се, пред вами суть дние скорби, и от сих избавлю вас.

⁷⁶Не бойтеся, ни сумневайтеся, яко Бог предводитель ваш есть.

⁷⁷И иже хранит заповеди и повеления моя, рече Господь Бог, да не преотягчат вас греси ваши, ниже превзыдут беззакония ваша.

⁷⁸Горе иже стисняются от грех своих и покрываются беззаконии своими:

⁷⁹имже образом нива стисняется от дубравы, и тернием покрывается стезя ея, еюже не проходит человек, и исторгается, и посылается на сожжение огню.