Read Елизаветинская Библия, 1751 3 Ездра 2 Bible Online

3 Ездра 2 - Елизаветинская Библия, 1751 bible

3 Ездра 2

¹Сия глаголет Господь: аз изведох люди сия из работы, имже повеления дах рабы моими пророки, ихже слушати не восхотеша, но отвергоша моя советы.

²Мати, яже их роди, глаголет им: идите, сынове, понеже аз вдовица есмь и оставлена,

³воспитах вы с радостию и лишихся вас со плачем и скорбию, яко согрешисте пред Господемъ Богом вашим, и еже лукавое есть пред ним, сотвористе:

⁴ныне же что сотворю вам? аз вдова есмь и оставлена: идите, сынове, и просите от Господа милости.

⁵Аз же тебе, оч~е, свидетеля призываю на матерь сынов, иже не восхотеша завета моего хранити:

⁶да даси им посрамление и матерь их на расхищение, да рода их не будет,

⁷да расточатся во языки имена их, да изгладятся от земли, зане презреша завет мой.

⁸Горе тебе, ассур, иже сокрываеши неправедныя у себе. Роде лукавый, воспомяни, что сотворихъ содому и гоморре,

⁹ихже земля лежит в жупелней груде и въ холмех пепелных: тако дам тех, иже мя не слушаша, глаголет Господь вседержитель.

¹⁰Сия глаголет Господь ко ездре: возвести людемъ моим, яко дам им царство Иерусалимское, еже дати имех израилю,

¹¹и возму мне славу их и дам им селения вечная, яже пред(у)готовах им:

¹²древо жизни будет им в благовоние масти, и не имут труждатися, ниже утрудятся.

¹³Идите и приимите, просите себе дний малых, да закоснят: уже готово есть вам царство, бдите.

¹⁴Засвидетелствуй небом и землею: сотрох бо злое и сотворих благое, яко живу аз, глаголетъ Господь.

¹⁵Мати, обыми сыны твоя, воспитай их со веселием, яко голубица утверди нозе их, зане тебе избрах, глаголет Господь.

¹⁶И воскр~шу мертвыя от мест своих и из гробов изведу их: познах бо имя мое во израили.

¹⁷Не бойся, мати сынов, зане тебе избрах, глаголет Господь.

¹⁸Послю тебе помощь отроки моя, исаию и иеремию, по ихже совету освятих и уготовахъ тебе древес дванадесять отягченых различными плоды,

¹⁹и толикожде источников текущих млекомъ и медом, и гор превысоких седмь имеющихъ шипок и крин, на нихже веселием исполню сыны твоя.

²⁰Вдову оправдай, сиру суди, нищему дай, сироту защити, нагаго одей,

²¹о сокрушеннем и немощнем попецыся, хромому не посмейся, защити безрукаго, а слепаго къ видению света моего припусти:

²²стараго и младаго между стенами твоими сокрый:

²³мертвыя идеже обрящеши, назнаменав отдай гробу, и дам тебе первое седение в воскресние мое.

²⁴И утишитеся и препокойтеся, людие мои, зане приидет покой ваш.

²⁵Кормилице благая, корми сыны твоя, утверждай нозе их.

²⁶Рабов, ихже тебе дах, ни един от них погибнет, их бо аз взыщу от числа твоего.

²⁷Не изнемогай: егда бо приидет день печали и тесноты, инии восплачутся и печальни будут, ты же радостна и обилна будеши.

²⁸Поревнуют (тебе) языцы и ничтоже противу тебе возмогут, глаголет Господь.

²⁹Руце мои покрыют тя, да сынове твои геенны не узрят.

³⁰Утешайся, мати, с сыны твоими, зане аз тя избавлю, глаголет Господь.

³¹Воспомяни чада твоя спящия, понеже аз изведу их из боков земли и милость с ними сотворю: милостив бо есмь, глаголет Господь вседержитель.

³²Обыми чада твоя, дондеже аз прииду и сотворю им милосердие: источницы бо мои изобилуютъ и благодать моя не оскудеет.

³³Аз ездра взях повеление от Господа на горе орив, да иду ко израилю, к нимже егда приидох, отринуша мя и уничижиша заповедь Господню.

³⁴И сего ради вам глаголю, языцы, иже слышите и разумеете: ждите пастыря вашего, иже даст вам покой вечный: понеже он уже близ есть и имать приити во скончании века.

³⁵Будите готови к воздаянием царствия, светъ бо вечный возсияет на вы во веки:

³⁶бежите сени века сего, приимите наслаждение славы вашея, аз яве свидетелствую спасителемъ моим.

³⁷Вверенный дар приимите и веселитеся, благодаряще призвавшаго вы в царство небесное.

³⁸Востаните и стойте, и смотряйте число знаменаныхъ на пиру Господнем,

³⁹иже преселишася от сени века сего, восприяша светлая одеяния от Господа.

⁴⁰Восприими число твое, сионе, и заключи одеянныхъ твоих в белая, иже исполниша закон Господень.

⁴¹Исполнено есть число чад твоих, ихже желал еси: моли царства Господня, да будут освящени людие твои, призваннии из начала.

⁴²Аз ездра видех на горе сионстей народъ мног, ихже исчислити не могох, и вси песньми хваляху Господа:

⁴³посреде же их бе юноша высочае возрастомъ паче всех оных, иже полагаше венцы на главу коегождо и паче возвышашеся, аз же дивихся зело.

⁴⁴Тогда вопросих ангела, глаголя: что суть сии, господи?

⁴⁵Он же отвеща: сии суть, иже совлекошася одеяния смертнаго и облекошася в безсмертное и исповедаша имя Божие: ныне венчаются и приемлют финики.

⁴⁶И вопросих ангела о юноши: кто есть оный юноша, иже возлагает на них венцы и финики в руце дает?

⁴⁷Он же отвеща ми: сей есть сын Божий, егоже исповедаша в веце сем. Аз же начах величати их, иже крепко за имя Господне вооружашася.

⁴⁸Тогда рече ми ангел: иди и возвести людемъ моим, каковая и коликая чудеса Господа Бога виделъ еси.