Read Елизаветинская Библия, 1751 3 Ездра 3 Bible Online

3 Ездра 3 - Елизаветинская Библия, 1751 bible

3 Ездра 3

¹Лета тридесятаго от разорения града, бех въ вавилоне и смятохся на одре моем лежащь, и помышления моя восхождаху на сердце мое,

²понеже видех опустение сиона и изобилие велие живущих в вавилоне.

³(Того ради) смутися дух мой зело, и начахъ умиленными словесы глаголати к вышнему

⁴и рекох: о, владыко Господи! ты (самъ) реклъ еси от начала, егда создал еси землю, и сие един, и повелел еси людем,

⁵и дал еси адаму плоть мертвену, но и сия бяше дело рук твоих, и вдохнул еси в него дух жизни, и бысть жив пред тобою:

⁶и ввел еси его в рай, егоже насади десница твоя, прежде неже прозябе земля:

⁷и завещал еси ему сохранити заповедь твою, и преступи ю, и абие предал еси его смерти и род его, и родишася языцы и племена, и людие и народи, имже несть числа:

⁸и хождаше кийждо народ по похотем своим, и дивная делаша пред тобою, и презираша заповеди твоя:

⁹паки же во время навел еси на них потопъ и потребил еси живущих на земли,

¹⁰и бысть коемуждо их, якоже адаму умрети, тако сим потоп:

¹¹оставил же еси единаго от них ноя с домом его, из негоже (родишася) вси праведнии:

¹²и бысть, егда начаша множитися живущии на земли, и умножиша сыны и люди и языки многи, и начаша паки нечестие творити множае прежних:

¹³и бысть, егда беззаконие творяху пред тобою, избрал еси себе мужа от сих, емуже имя бе авраам,

¹⁴и возлюбил еси его, и показал еси ему единому хотение твое,

¹⁵и положил еси ему завет вечный, и рекл еси ему, яко никогда оставиши семене его, и дал еси ему исаака, исааку же дал еси иакова и исава:

¹⁶и избрал еси себе иакова, исава же отринул еси, и размножися иаков во множество велие:

¹⁷и бысть, егда извел еси из египта семя его, привел еси к горе синайстей,

¹⁸и преклонил еси небеса, и уставилъ еси землю, и поколебал еси вселенную, и трепетати сотворил еси бездны, и возмутилъ еси мир,

¹⁹и пройде слава твоя враты четырьми, огнемъ и земным трясением, и ветром и мразом, да даси закон семени иаковлю и роду израилеву прилежание:

²⁰и не отял еси от них сердца лукаваго, да закон твой сотворит в них плод:

²¹сердце бо лукаво нося первый адам, преступи и побежден бысть, и тако вси, иже от него родишася:

²²и пребываше немощь и закон с сердцем человеческим, с лукавстом корене, и преста благое, и наста злое:

²³и преидоша времена, и скончашася лета, и воздвигл еси себе раба именем давида,

²⁴и повелел еси ему создати град имени твоему и приносити в нем тебе фимиам и жертвы:

²⁵и бысть сие чрез многа лета, и согрешиша живущии в том граде,

²⁶во всех творяще, якоже сотвори адамъ и вси родове его, понеже и сами быша сердцемъ лукави,

²⁷и того ради град твой предал еси въ руки врагов твоих:

²⁸еда лучшая творят, иже обитают в вавилоне, и того ради владеют сионом?

²⁹и бысть егда приидох семо и видехъ нечестия, имже несть числа, и многих согрешающихъ виде душа моя в сие тридесятое лето, и ужасеся сердце мое,

³⁰понеже видех, како терпиши согрешающимъ и пощадил еси нечествующих и погубил еси люди твоя, сохранил же еси враги твоя и не возвестил еси (ни комуже):

³¹воистинну не вем, како сия уразумети имам? еда суть дела лучшая вавилонская, нежели сионская?

³²еда познаша тебе инии языцы кроме израиля? или кая племена вероваша свидениемъ твоим, якоже иаков?

³³ихже мзда не явися, ниже труд их творитъ плода, понеже прохождая проидох посреде языкъ и видех я процветающя и не помнящия повелений твоих:

³⁴ныне убо измери на мерилех неправды наша и живущих на земли, и нигде обрящется имя твое, токмо во израили:

³⁵и когда не согрешиша пред тобою живущии на земли? или кий язык тако сохранил заповеди твоя?

³⁶сих убо по именом обрящеши сохранившихъ повеления твоя, языков же не обрящеши.