Read Елизаветинская Библия, 1751 3 Ездра 5 Bible Online

3 Ездра 5 - Елизаветинская Библия, 1751 bible

3 Ездра 5

¹О знамениих же: се, дние приидут, в нихже живущии на земли обременени будут даньми многими, и скрыется путь правды, и будет вселенная неплодна от веры,

²и умножится неправда паче сея, юже ты видиши, и паче тоя, о нейже еси слышалъ издревле:

³и будет земля, в нюже вшед ныне видиши царствуюшую, и узрят ю опустену:

⁴аще же тебе даст вышний живу быти, узриши по третией трубе, и возсияет внезапу солнце в нощи, и луна трижды в день,

⁵и воскаплет кровь от древа, и камень дастъ глас свой, и поколеблются людие:

⁶и той будет царствовати, егоже не надеются живущии на земли, и птицы прейдут от места своего,

⁷и море содомское рыбы изринет и даст гласъ нощию, егоже мнози не знаша, и вси услышатъ глас его:

⁸и смятение будет на местех мнозех, и огнь часто низпустится, и зверие польстии преселятся, и жены болезнивыя породят щуда,

⁹и в сладких водах сланы обрящутся, и друзи вси сами на ся ополчатся: и скрыется тогда ум, и разум отлучится в хранилище свое,

¹⁰и взыщется от многих и не обрящется: неправда же и невоздержание умножится на земли,

¹¹и вопросит страна ближнюю свою и речет: не прейде ли по тебе правда праведнаго творящая? и сего отречется:

¹²и будет в то время, и уповати будутъ человецы и не восприимут: трудитися будут, и не управятся путие их.

¹³Сия знамения попущено есть мне глаголати к тебе: и аще помолишися паки, и восплачешися, якоже и ныне, и попостишися седмь дний, еще болшая сих услышиши.

¹⁴И возбнух, и тело мое устрашися зело, и душа моя утрудися, аки бы исчезала.

¹⁵И удержа мя, иже прииде ангел, иже глаголаше ко мне, и укрепи мя и постави мя на ногах.

¹⁶И бысть в нощь вторую, и прииде ко мне салафиил вождь людем и рече мне: где былъ еси, и вскую лице твое скорбно?

¹⁷или не веси, яко тебе вверен есть израиль во стране преселения их?

¹⁸востани убо и вкуси хлеба, и не остави нас, якоже пастырь стадо свое в руках волковъ лукавых.

¹⁹И рекох ему: иди от мене и не приближайся ко мне. И услыша, якоже рекох, и отиде от мене.

²⁰И аз постихся дний седмь стеня и плачя, якоже мне заповеда уриил ангел.

²¹И бысть по днех седмих, и паки помышления сердца моего трудна бяху мне зело:

²²и восприя душа моя дух разума, и паки начах глаголати пред вышним словеса

²³и рех: о, владыко Господи! от всех дубравъ земли и от всех древес ея избрал еси виноград един,

²⁴и от всего круга земнаго избрал еси себе юдоль едину, и от всех цветовъ вселенныя избрал еси себе крин един,

²⁵и от всех бездн морских исполнил еси себе источник един, и от всех созданныхъ градов освятил еси себе сион,

²⁶и от всех сотворений летающих именовалъ еси себе голубицу едину, и от всехъ сотворенных скотов промыслил еси себе овцу едину,

²⁷и от всех умноженных людий взыскалъ еси себе народ един, и от всех искушенъ закон дал еси сим, ихже возлюбил еси, людем:

²⁸и ныне, Господи, вскую предал еси единаго многим и уготовал еси на един корень многи иныя и расточил еси един твой во многи?

²⁹и потопташа его, иже противу глаголаша обетованием твоим и иже твоим заветомъ не вероваху:

³⁰и аще ненавидящь возненавидел еси люди твоя, твоими руками долженствуют наказатися.

³¹И бысть егда глаголах словеса, и посланъ есть ангел ко мне, иже прежде прииде ко мне в прешедшую нощь,

³²и рече ми: послушай мя, и научу тя: и вонми ми, и предложу пред тобою.

³³И рекох: глаголи, господи мой. И рече ко мне: зело ты во ужасе ума сотворился еси ради израиля: или паче возлюбил еси его, неже сотворивый его?

³⁴И рех к нему: ни, господи, но болящь глаголалъ есмь: мучат бо мя лядвия моя по вся часы ищущаго постигнути стезю вышняго, изследовати часть суда его.

³⁵И рече ко мне: не можеши. И рекох: чесо ради, господи? почто родихся? или вскую не сотворися утроба матере моея мне гроб, да не виделъ бых труда иаковля и изнеможения рода израилева?

³⁶И рече ко мне: сочти ми сия, яже еще не приидоша, и собери ми разсеянныя капли, и озелени ми сухия цветы,

³⁷и отверзи ми запертая хранилища, и изведи ми заключенныя в них ветры: покажи ми гласа образ, и тогда покажу ти труд, егоже жадаеши видети.

³⁸И рех: о, владыко Господи! кто бо есть, иже может сия ведети, разве той, иже съ человеки обитания не имать?

³⁹аз же безумен, и како могу глаголати о сих, о нихже мене вопросил еси?

⁴⁰И рече ко мне: якоже не можеши сотворити едино от сих, яже глаголана суть, тако не можеши обрести суда моего, или в конецъ любве, юже людем обещах.

⁴¹И рех: но се, Господи, ты близ еси сих, иже при концы суть, и что сотворят, иже прежде мене быша, или мы, или иже последи нас?

⁴²И глагола ко мне: венцу уподоблю суд мой: якоже не последних умедление, тако ниже первых ускорение.

⁴³И отвещах и рекох: не могл ли еси сотворити сих, иже сотворени быша, и иже суть, и иже будут вкупе, дабы сеорее судъ твой показал еси?

⁴⁴И отвеща ко мне и рече: не может ускорити творение над творца, ниже снести век сих, иже в нем творими суть вкупе.

⁴⁵И рех: како рекл еси рабу твоему, понеже оживляя оживил еси от тебе сотвореное творение во едино, и сносило творение: можетъ и ныне носити настоящих во едино.

⁴⁶И рече ко мне: вопроси ложесн женскихъ и речеши к ней: и аще родиши, вскую по времени? моли убо ю, да родит десять во едино.

⁴⁷И рекох: не может, но по времени.

⁴⁸И рече ко мне: и аз дах ложесна земли сим, иже посеяни суть на ней по времени:

⁴⁹имже бо образом младенец не родит тех, яже старых суть, тако аз устроих от мене сотвореный век.

⁵⁰И вопросих и рекох: понеже уже даеши ми путь, возглаголю пред тобою: ибо мати наша, о нейже глаголал еси мне, еще млада есть, а уже к старости приближается.

⁵¹И отвеща ко мне и рече: вопроси тоя, яже родит, и речет тебе.

⁵²Речеши бо ей: вскую, коих родила еси, ныне не суть подобни тем, иже прежде тебе, но менши возрастом?

⁵³И речет тебе и та: инии суть, иже въ юности силы рождени суть, и инии иже под время старости оскудевающим ложеснам родишася.

⁵⁴Разумей убо и ты, яко менши возрастомъ есте от тех, иже прежде вас,

⁵⁵и иже последи вас, менши неже вы, аки уже стареющаяся творения, и крепость юности преминующая.

⁵⁶И рекох: молю, Господи, аще обретох благодать пред очима твоима, покажи рабу твоему, имже посетиши творение твое.