Read Елизаветинская Библия, 1751 3 Ездра 8 Bible Online

3 Ездра 8 - Елизаветинская Библия, 1751 bible

3 Ездра 8

¹И отвеща ко мне и рече: сей век сотворилъ вышний многих ради, будущий же ради малых:

²реку же тебе уподобление, ездро: како же вопросиши земли, и речет ти, яко дастъ земли много болши, от неяже будет скудельное, мало же праха, отонудуже злато бывает: тако и деяние настоящаго века:

³мнози убо сотворени суть, не мнози же спасутся.

⁴И отвещах и рекох: душе моя! пожри убо разумение и поглоти мудрость,

⁵понеже обещала еси слушати, и пророчествовати хотящи, не бо дано есть тебе время, разве токмо жити:

⁶о, Господи! аще не попустиши рабу твоему, да помолимся пред тобою, и даси нам семя въ сердце и чувству очищение, отонудуже плодъ был бы, где жити возможет всяк растленный, иже носити будет место человека?

⁷един бо еси, и едино сотворение мы есмы руку твоею, якоже глаголал еси:

⁸и како ныне в ложеснах создано есть тело, и подаеши составы? содержится во огни и въ воде твое творение, и девять месяц терпит твое создание твою тварь, яже в нем создана есть:

⁹самое же еже хранит, и еже хранится, обоя сохранятся: сохраненая же некогда паки издают ложесна, яже в них растоша:

¹⁰повелел бо еси от самых членов, сиречь от сосцев издаяти млеко плоду сосцев,

¹¹да питается то, еже создано есть, даже до времене некоего, и потом управиши его твоему милосердию:

¹²воспитал еси его твоею правдою и научилъ еси его закону твоему и наказал еси его твоим разумом,

¹³и умертвиши его якоже твое сотворение, и паки оживиши его, якоже дело твое:

¹⁴аще убо погубиши его, иже толикими труды создан есть, твоим повелением удобно есть устроити, да и то, еже творяшеся, сохранится:

¹⁵и ныне, Господи, возглаголю: о всяцем человеце ты паче веси, и о людех твоих, о нихже болезную,

¹⁶и о наследии твоем, егоже ради азъ рыдаю, и ради израиля, о немже скорбен есмь, и иакова ради, о немже аз болезную:

¹⁷сего ради начну молитися пред тобою за мя и за них, яко вижду падение наше, иже обитаемъ на земли:

¹⁸но слышах скорость судии, иже приидет,

¹⁹сего ради услыши глас мой и разумей слово мое, и возглаголю пред тобою. Начало словес ездриных, прежде неже взят бысть.

²⁰И рех: Господи, иже обитаеши во век, егоже очи вознесенны на вышняя и на воздусе,

²¹и егоже престол безценный есть и слава непостижима, емуже предстоят вои ангелстии с трепетом, ихже сохранение в ветре и огни обращается, егоже слово истинно и глаголы вечнии,

²²егоже повеление крепко и разсмотрение страшно, егоже зрак изсушает бездны и гнев растаявати творит горы и истина свидетелствует:

²³услыши молитву раба твоего и во ушеса приими моление творения твоего:

²⁴егда бо живу, глаголати буду, и егда разумею, отвещати буду: не смотри на людий твоих грехи, но иже тебе во истине служат,

²⁵ни внемли нечестивым языков начинанием, но иже твоя свидения со болезнию сохраниша,

²⁶ни помысли иже пред тобою лживо пожиша, но помяни сих, иже по воли твоей страх познаша,

²⁷ниже хощи погубити, иже скотския обычаи имеша, но воззри на тех, иже закону твоему ясно учиша,

²⁸ни прогневайся на них, иже зверей горши осуждени суть,

²⁹но возлюби сих, иже всегда на правду твою надеются и славу:

³⁰яко мы и отцы наши таковыми болезньми исчезаем,

³¹ты же ради нас грешных милосерд наречешися:

³²аще бо пожелаеши, да нас помилуеши, тогда милосерд наречешися, не имеющим нам дел правды:

³³праведнии бо, ихже суть дела многа представленна, от своих дел приимут мзду:

³⁴что бо есть человек, да на него прогневаешися? или род растлен, да тако огорчен будеши на него?

³⁵воистинну бо никтоже от рожденных есть, иже бы нечестиво не сотворил, и от исповедающихся, иже бы не согрешил:

³⁶в том бо возвестится правда твоя и благость твоя, Господи, егда милосерд будеши им, иже не имеют существа благих дел.

³⁷И отвеща ко мне и рече: право глаголалъ еси некая, и по словесем твоим тако и будет:

³⁸понеже не истинно помышлю на здание сих, иже согрешиша прежде смерти, прежде суда, прежде погубления,

³⁹но услаждуся над праведных творениемъ и помяну пришелствие и спасение и мзды восприятие:

⁴⁰якоже убо глаголал есмь, тако и есть:

⁴¹якоже бо земледелец сеет на земли семена многа и саждения множество садит, но не во время вся, яже сеяна суть, спасутся, но ни вся, яже сажена суть, вкоренятся: тако и иже в веце насеяни суть, не вси спасутся.

⁴²И отвещах и рекох: аще обретох благодать, возглаголю:

⁴³якоже семя земледелца аще не взыдет, или не приимет дождя твоего во время, или аще растлено будет умножением дождя:

⁴⁴тако погибает подобне и человек, иже рукама твоима создан бысть, и ты ему образъ именовался еси: понеже подобен еси ему, егоже ради вся создал еси и уподобилъ еси семени земледелцеву:

⁴⁵не прогневайся на нас, но прости людем твоимъ и помилуй наследие твое, ты же творение твое милуеши.

⁴⁶И отвеща ко мне и рече: яже суть настоящая, настоящим, и яже будущая, будущим:

⁴⁷много бо тебе останет, да можеши возлюбити мое сотворение паче мене, тебе же часто и самому приближахся, к неправедным же никогда:

⁴⁸но и в сем дивен еси пред вышним,

⁴⁹яко смирился еси якоже подобает тебе, и не судил еси тебе, да между праведными много славишися:

⁵⁰того ради беды многи и нищеты сотворятся тем, иже обитают век на последок, понеже во мнозей гордыни ходиша:

⁵¹ты же о тебе разумей и о подобных тебе взыскуй славу:

⁵²вам бо отверст есть рай, насаждено есть древо жизни, пред(у)готовано есть будушее время, готово есть изобилие, создан есть град, искушен есть покой, совершенна есть благостыня и совершенна премудрость:

⁵³корень зла знаменан есть от вас, немощь и молие от вас скрыто есть, и во ад бежитъ растление в забвении:

⁵⁴преидоша болезни, и явлено есть на конецъ сокровище безсмертия:

⁵⁵не прилагай убо испытовати о множестве погибающих,

⁵⁶ибо и тии, приемлюще свободу, уничижиша вышняго, и закон его презреша, и пути его оставиша,

⁵⁷еще же и праведных его попраша,

⁵⁸и рекоша в сердцы своем: несть Бога, аще и ведяху, яко умирают:

⁵⁹якоже бо вас приимут яже предреченна суть, тако тех жажда и мучения, яже уготована суть: ибо не хотяше человека погубити,

⁶⁰но и тии, иже сотворени суть, оскверниша имя того, иже сотвори их, и неблагодарни быша тому, иже уготовал им живот:

⁶¹сего ради суд мой ныне приближается,

⁶²яже не всем показах, токмо тебе и тебе подобным не многим. И отвещах и рекох:

⁶³се, ныне, Господи, показал еси мне множество знамений, яже начнеши творити в последний час, но не показал еси мне, в кое время.