Read Елизаветинская Библия, 1751 От Матфея 25 Bible Online

От Матфея 25 - Елизаветинская Библия, 1751 bible

От Матфея 25

¹Тогда уподобися Царствие небесное десятим девам, яже прияша светилники своя и изыдоша в сретение жениху:

²пять же бе от них мудры и пять юродивы.

³Юродивыя же, приемшя светилники своя, не взяша с собою елеа:

⁴мудрыя же прияша елей в сосудех со светилники своими:

⁵коснящу же жениху, воздремашася вся и спаху.

⁶Полунощи же вопль бысть: се, жених грядет, исходите в сретение его.

⁷Тогда восташа вся девы тыя и украсиша светилники своя.

⁸Юродивыя же мудрым реша: дадите нам от елеа вашего, яко светилницы наши угасают.

⁹Отвещаша же мудрыя, глаголющя: еда како не достанет нам и вам: идите же паче к продающым и купите себе.

¹⁰Идущым же им купити, прииде жених: и готовыя внидоша с ним на браки, и затворены быша двери.

¹¹Последи же приидоша и прочыя девы, глаголющя: господи, господи, отверзи нам.

¹²Он же отвещав рече им: аминь глаголю вам, не вем вас.

¹³Бдите убо, яко не весте дне ни часа, в оньже Сын Человеческий приидет.

¹⁴Якоже бо человек некий отходя призва своя рабы и предаде им имение свое:

¹⁵и овому убо даде пять талант, овому же два, овому же един, комуждо противу силы его: и отиде абие.

¹⁶Шед же приемый пять талант, дела в них и сотвори другия пять талант:

¹⁷такожде и иже два, приобрете и той другая два:

¹⁸приемый же един, шед вкопа (его) в землю и скры сребро господина своего.

¹⁹По мнозе же времени прииде господин раб тех и стязася с ними о словеси.

²⁰И приступль пять талант приемый, принесе другия пять талант, глаголя: господи, пять талант ми еси предал: се, другия пять талант приобретох ими.

²¹Рече же ему господь его: добре, рабе благий и верный: о мале был еси верен, над многими тя поставлю: вниди в радость господа твоего.

²²Приступль же и иже два таланта приемый, рече: господи, два таланта ми еси предал: се, другая два таланта приобретох има.

²³Рече (же) ему господь его: добре, рабе благий и верный: о мале (ми) был еси верен, над многими тя поставлю: вниди в радость господа твоего.

²⁴Приступль же и приемый един талант, рече: господи, ведях тя, яко жесток еси человек, жнеши, идеже не сеял еси, и собираеши идеже не расточил еси:

²⁵и убоявся, шед скрых талант твой в земли: (и) се, имаши твое.

²⁶Отвещав же господь его рече ему: лукавый рабе и ленивый, ведел еси, яко жну идеже не сеях, и собираю идеже не расточих:

²⁷подобаше убо тебе вдати сребро мое торжником, и пришед аз взял бых свое с лихвою:

²⁸возмите убо от него талант и дадите имущему десять талант:

²⁹имущему бо везде дано будет и преизбудет: от неимущаго же, и еже мнится имея, взято будет от него:

³⁰и неключимаго раба вверзите во тму кромешнюю: ту будет плачь и скрежет зубом. Сия глаголя возгласи: имеяй ушы слышати да слышит.

³¹Егда же приидет Сын Человеческий в славе своей и вси святии ангели с ним, тогда сядет на престоле славы своея,

³²и соберутся пред ним вси языцы: и разлучит их друг от друга, якоже пастырь разлучает овцы от козлищ:

³³и поставит овцы одесную себе, а козлища ошуюю.

³⁴Тогда речет Царь сущым одесную его: приидите, благословеннии Отца моего, наследуйте уготованное вам Царствие от сложения мира:

³⁵взалкахся бо, и дасте ми ясти: возжадахся, и напоисте мя: странен бех, и введосте мене:

³⁶наг, и одеясте мя: болен, и посетисте мене: в темнице бех, и приидосте ко мне.

³⁷Тогда отвещают ему праведницы, глаголюще: Господи, когда тя видехом алчуща, и напитахом? или жаждуща, и напоихом?

³⁸когда же тя видехом странна, и введохом? или нага, и одеяхом?

³⁹когда же тя видехом боляща, или в темнице, и приидохом к тебе?

⁴⁰И отвещав Царь речет им: аминь глаголю вам, понеже сотвористе единому сих братий моих менших, мне сотвористе.

⁴¹Тогда речет и сущым ошуюю (его): идите от мене, проклятии, во огнь вечный, уготованный диаволу и аггелом его:

⁴²взалкахся бо, и не дасте ми ясти: возжадахся, и не напоисте мене:

⁴³странен бех, и не введосте мене: наг, и не одеясте мене: болен и в темнице, и не посетисте мене.

⁴⁴Тогда отвещают ему и тии, глаголюще: Господи, когда тя видехом алчуща, или жаждуща, или странна, или нага, или больна, или в темнице, и не послужихом тебе?

⁴⁵Тогда отвещает им, глаголя: аминь глаголю вам, понеже не сотвористе единому сих менших, ни мне сотвористе.

⁴⁶И идут сии в муку вечную, праведницы же в живот вечный.