Read Елизаветинская Библия, 1751 От Марка 4 Bible Online

От Марка 4 - Елизаветинская Библия, 1751 bible

От Марка 4

¹И паки начат учити при мори: и собрася к нему народ мног, якоже самому влезшу в корабль, седети в мори: и весь народ при мори на земли бяше.

²И учаше их притчами много и глаголаше им во учении своем:

³слышите: се, изыде сеяй сеяти:

⁴и бысть егда сеяше, ово паде при пути, и приидоша птицы, и позобаша е:

⁵другое же паде при камени, идеже не имяше земли многи, и абие прозябе, зане не имяше глубины земныя:

⁶солнцу же возсиявшу присвяде, и зане не имяше корене, изсше:

⁷и другое паде в тернии, и взыде терние, и подави е: и плода не даде:

⁸и другое паде на земли добрей, и даяше плод восходящь и растущь, и приплодоваше на тридесять, и на шестьдесят, и на сто.

⁹И глаголаше: имеяй ушы слышати да слышит.

¹⁰Егда же бысть един, вопросиша его, иже бяху с ним, со обеманадесяте о притчи.

¹¹И глаголаше им: вам есть дано ведати тайны Царствия Божия: онем же внешним в притчах вся бывают,

¹²да видяще видят, и не узрят: и слышаще слышат, и не разумеют: да не когда обратятся, и оставятся им греси.

¹³И глагола им: не весте ли притчи сея? и како вся притчи уразумеете?

¹⁴Сеяй, слово сеет.

¹⁵Сии же суть, иже при пути, идеже сеется слово, и егда услышат, абие приходит сатана и отемлет слово сеянное в сердцах их.

¹⁶И сии суть такожде иже на каменных сеемии, иже егда услышат слово, абие с радостию приемлют е:

¹⁷и не имут корения в себе, но привременни суть: таже бывшей печали или гонению словесе ради, абие соблажняются.

¹⁸А сии суть, иже в тернии сеемии, слышащии слово:

¹⁹и печали века сего, и лесть богатства, и о прочих похоти входящыя подавляют слово, и безплодно бывает.

²⁰И сии суть, иже на земли добрей сеяннии, иже слышат слово и приемлют, и плодствуют на тридесять, и на шестьдесят, и на сто.

²¹И глаголаше им: еда светилник приходит, да под спудом положат его или под одром? не да ли на свещнице положен будет?

²²несть бо тайно, еже не явится, ниже бысть потаено, но да приидет в явление:

²³аще кто имать ушы слышати, да слышит.

²⁴И глаголаше им: блюдите что слышите: в нюже меру мерите, возмерится вам, и приложится вам слышащым:

²⁵иже бо аще имать, дастся ему: а иже не имать, и еже имать, отимется от него.

²⁶И глаголаше: тако есть (и) Царствие Божие, якоже человек вметает семя в землю,

²⁷и спит, и востает нощию и днию: и семя прозябает и растет, якоже не весть он:

²⁸от себе бо земля плодит прежде траву, потом клас, таже исполняет пшеницу в класе:

²⁹егда же созреет плод, абие послет серп, яко наста жатва.

³⁰И глаголаше: чесому уподобим Царствие Божие? или коей притчи приложим е?

³¹яко зерно горушично, еже егда всеяно будет в земли, мнее всех семен есть земных:

³²и егда всеяно будет, возрастает, и бывает более всех зелий, и творит ветви велия, яко мощи под сению его птицам небесным витати.

³³И таковыми притчами многими глаголаше им слово, якоже можаху слышати.

³⁴Без притчи же не глаголаше им словесе: особь же учеником своим сказаше вся.

³⁵И глагола им в той день, вечеру бывшу: прейдем на он пол.

³⁶И отпущше народы, пояша его якоже бе в корабли: и инии же корабли бяху с ним.

³⁷И бысть буря ветрена велика: волны же вливахуся в корабль, яко уже погружатися ему.

³⁸И бе сам на корме на возглавнице спя. И возбудиша его и глаголаша ему: учителю, не радиши ли, яко погибаем?

³⁹И востав запрети ветру и рече морю: молчи, престани. И улеже ветр, и бысть тишина велия.

⁴⁰И рече им: что тако страшливи есте? како не имате веры?

⁴¹И убояшася страхом велиим и глаголаху друг ко другу: кто убо сей есть, яко и ветр и море послушают его?