Read Елизаветинская Библия, 1751 От Луки 18 Bible Online

От Луки 18 - Елизаветинская Библия, 1751 bible

От Луки 18

¹глаголаше же и притчу к ним, како подобает всегда молитися и не стужати (си),

²глаголя: судия бе некий в некоем граде, Бога не бояся и человек не срамляяся.

³Вдова же некая бе во граде том: и прихождаше к нему, глаголющи: отмсти мене от соперника моего.

⁴И не хотяше на долзе времени. Последи же рече в себе: аще и Бога не боюся, и человек не срамляюся:

⁵но зане творит ми труды вдовица сия, отмщу ея: да не до конца приходящи застоит мене.

⁶Рече же Господь: слышите, что судия неправды глаголет?

⁷Бог же не имать ли сотворити отмщение избранных своих, вопиющих к нему день и нощь, и долготерпя о них?

⁸глаголю вам, яко сотворит отмщение их вскоре: обаче Сын Человеческий пришед убо обрящет ли (си) веру на земли?

⁹Рече же и ко другим уповающым собою, яко суть праведницы, и уничижающым прочих, притчу сию:

¹⁰человека два внидоста в церковь помолитися: един фарисей, а другий мытарь.

¹¹Фарисей же став, сице в себе моляшеся: Боже, хвалу тебе воздаю, яко несмь якоже прочии человецы, хищницы, неправедницы, прелюбодее, или якоже сей мытарь:

¹²пощуся двакраты в субботу, десятину даю всего елико притяжу.

¹³Мытарь же издалеча стоя, не хотяше ни очию возвести на небо: но бияше перси своя, глаголя: Боже, милостив буди мне грешнику.

¹⁴глаголю вам, яко сниде сей оправдан в дом свой паче онаго: яко всяк возносяйся смирится, смиряяй же себе вознесется.

¹⁵Приношаху же к нему и младенцы, да их коснется: видевше же ученицы запретиша им.

¹⁶Иисус же призвав их, глагола: оставите детей приходити ко мне и не браните им: таковых бо есть Царствие Божие:

¹⁷аминь бо глаголю вам: иже аще не приимет Царствия Божия яко отроча, не имать внити в не.

¹⁸И вопроси его некий князь, глаголя: Учителю благий, что сотворив, живот вечный наследствую?

¹⁹Рече же ему Иисус: что мя глаголеши блага? никтоже благ, токмо един Бог:

²⁰заповеди веси: не прелюбы твори, не убий, не укради, не лжесвидетелствуй, чти отца твоего и матерь твою.

²¹Он же рече: вся сия сохраних от юности моея.

²²Слышав же сия Иисус рече ему: еще единаго не докончал еси: вся, елика имаши, продаждь и раздай нищым: и имети имаши сокровище на небеси: и гряди вслед мене.

²³Он же слышав сие, прискорбен бысть: бе бо богат зело.

²⁴Видев же его Иисус прискорбна бывша, рече: како не удобь имущии богатство в Царствие Божие внидут:

²⁵удобее бо есть вельбуду сквозе иглине ушы проити, неже богату в Царствие Божие внити.

²⁶Реша же слышавшии: то кто может спасен быти?

²⁷Он же рече: невозможная у человек возможна суть у Бога.

²⁸Рече же петр: се, мы оставихом вся и по тебе идохом.

²⁹Он же рече им: аминь глаголю вам, яко никтоже есть, иже оставит дом, или родители, или братию, или сестры, или жену, или чада, Царствия ради Божия,

³⁰иже не приимет множицею во время сие, и в век грядущий живот вечный.

³¹Поемь же обанадесяте ученики своя, рече к ним: се, восходим во Иерусалим, и скончаются вся писанная пророки о Сыне Человечесте:

³²предадят бо его языком и поругаются ему, и укорят его и оплюют его,

³³и бивше убиют его: и в третий день воскреснет.

³⁴И тии ничесоже от сих разумеша: и бе глагол сей сокровен от них, и не разумеваху глаголемых.

³⁵Бысть же егда приближишася во иерихон, слепец некий седяше при пути прося:

³⁶слышав же народ мимоходящь, вопрошаше: что убо есть се?

³⁷Поведаша же ему, яко Иисус назарянин мимоходит.

³⁸И возопи, глаголя: Иисусе Сыне давидов, помилуй мя.

³⁹И предидущии прещаху ему, да умолчит: он же паче множае вопияше: Сыне давидов, помилуй мя.

⁴⁰Став же Иисус повеле привести его к себе. Приближшуся же ему к нему, вопроси его,

⁴¹глаголя: что хощеши, да ти сотворю? Он же рече: Господи, да прозрю.

⁴²Иисус же рече ему: прозри: вера твоя спасе тя.

⁴³И абие прозре, и вслед его идяше, славя Бога. И вси людие видевше воздаша хвалу Богови.