Read Елизаветинская Библия, 1751 От Луки 2 Bible Online

От Луки 2 - Елизаветинская Библия, 1751 bible

От Луки 2

¹Бысть же во дни тыя, изыде повеление от кесаря августа написати всю вселенную.

²Сие написание первое бысть владящу сириею киринию.

³И идяху вси написатися, кождо во свой град.

⁴Взыде же и иосиф от галилеи, из града назарета, во иудею, во град давидов, иже нарицается вифлеем, зане быти ему от дому и отечества давидова,

⁵написатися с Мариею обрученою ему женою, сущею непраздною.

⁶Бысть же, егда быста тамо, исполнишася дние родити ей:

⁷и роди сына своего первенца, и повит его, и положи его в яслех: зане не бе им места во обители.

⁸И пастырие беху в тойже стране, бдяще и стрегуще стражу нощную о стаде своем.

⁹И се, ангел Господень ста в них, и слава Господня осия их: и убояшася страхом велиим.

¹⁰И рече им ангел: не бойтеся: се бо, благовествую вам радость велию, яже будет всем людем:

¹¹яко родися вам днесь спас, иже есть Христос Господь, во граде давидове:

¹²и се вам знамение: обрящете Младенца повита, лежаща в яслех.

¹³И внезапу бысть со ангелом множество вой небесных, хвалящих Бога и глаголющих:

¹⁴слава в вышних Богу, и на земли мир, во человецех благоволение.

¹⁵И бысть, яко отидоша от них на небо ангели, и человецы пастырие реша друг ко другу: прейдем до вифлеема и видим глагол сей бывший, егоже Господь сказа нам.

¹⁶И приидоша поспешшеся, и обретоша Мариамь же и иосифа, и Младенца лежаща во яслех.

¹⁷Видевше же сказаша о глаголе глаголаннем им о отрочати сем.

¹⁸И вси слышавшии дивишася о глаголанных от пастырей к ним.

¹⁹Мариамь же соблюдаше вся глаголы сия, слагающи в сердцы своем.

²⁰И возвратишася пастырие, славяще и хваляще Бога о всех, яже слышаша и видеша, якоже глаголано бысть к ним.

²¹И егда исполнишася осмь дний, да обрежут его, и нарекоша имя ему Иисус, нареченное ангелом прежде даже не зачатся во чреве.

²²И егда исполнишася дние очищения ею, по закону моисеову, вознесоста его во Иерусалим, поставити его пред Господем,

²³якоже есть писано в законе Господни: яко всяк младенец мужеска полу, разверзая ложесна, свято Господеви наречется:

²⁴и еже дати жертву, по реченному в законе Господни, два горличища или два птенца голубина.

²⁵И се, бе человек во Иерусалиме, емуже имя симеон. И человек сей праведен и благочистив, чая утехи израилевы: и Дух бе свят в нем.

²⁶И бе ему обещанно Духом святым, не видети смерти, прежде даже не видит Христа Господня.

²⁷И прииде Духом в церковь. И егда введоста родителя отроча Иисуса, сотворити има по обычаю законному о нем,

²⁸и той приемь его на руку своею, и благослови Бога, и рече:

²⁹ныне отпущаеши раба твоего, Владыко, по глаголу твоему, с миром:

³⁰яко видесте очи мои спасение твое,

³¹еже еси уготовал пред лицем всех людий:

³²свет во откровение языком, и славу людий твоих израиля.

³³И бе иосиф и Мати его чудящася о глаголемых о нем.

³⁴И благослови я симеон, и рече к Марии Матери его: се, лежит сей на падение и на востание многим во израили, и в знамение пререкаемо:

³⁵и тебе же самой душу пройдет оружие: яко да открыются от многих сердец помышления.

³⁶И бе анна пророчица, дщи фануилева, от колена асирова: сия заматоревши во днех мнозех, живши с мужем седмь лет от девства своего:

³⁷и та вдова яко лет осмьдесят и четыре, яже не отхождаше от церкве, постом и молитвами служащи день и нощь.

³⁸И та в той час приставши исповедашеся Господеви и глаголаше о нем всем чающым избавления во Иерусалиме.

³⁹И яко скончашася вся по закону Господню, возвратишася в галилею, во град свой назарет.

⁴⁰Отроча же растяше и крепляшеся духом, исполняяся премудрости: и благодать Божия бе на нем.

⁴¹И хождаста родителя его на всяко лето во Иерусалим в праздник пасхи.

⁴²И егда бысть двоюнадесяти лету, восходящым им во Иерусалим по обычаю праздника,

⁴³и скончавшым дни, и возвращающимася има, оста отрок Иисус во Иерусалиме: и не разуме иосиф и Мати его:

⁴⁴мневша же его в дружине суща, преидоста дне путь, и искаста его во сродницех и в знаемых:

⁴⁵и не обретша его, возвратистася во Иерусалим, взыскающа его.

⁴⁶И бысть по триех днех, обретоста его в церкви, седящаго посреде учителей, и послушающаго их, и вопрошающаго их:

⁴⁷ужасахуся же вси послушающии его о разуме и о ответех его.

⁴⁸И видевша его, дивистася: и к нему Мати его рече: чадо, что сотвори нама тако? се, отец твой и аз боляща искахома тебе.

⁴⁹И рече к нима: что яко искаста мене? не веста ли, яко в тех, яже Отца моего, достоит быти ми?

⁵⁰И та не разуместа глагола, егоже глагола има.

⁵¹И сниде с нима и прииде в назарет: и бе повинуяся има. И Мати его соблюдаше вся глаголы сия в сердцы своем.

⁵²И Иисус преспеваше премудростию и возрастом и благодатию у Бога и человек.